Hebreos 9 - Tüpä Ñe'ëngagwer

Tüpäro ɨvɨ pɨpendar iyavei tüpäro ɨva pendar

¹ Evokoiyase yɨpɨndar Tüpä remimbotar vɨreko ava kwaitarä iñemonu'ä agwä, Tüpä mboeteisa pɨpe iyavei vɨreko tüpäro ko ɨvɨ pɨpendar.

² A'e tüpäro pɨpe na e'i mba'e imoigätusa, yɨpɨndar oɨ serer Nimaräi Va'e, ipɨpe oime oro apoprɨ tataendɨ rɨru iyavei mboyape sovasaprɨ renda Tüpä upendar reseve.

³ Imoñuvɨrïosa turukwar tüpäro asɨasa kupeve oime ambuae oɨ, a'e serer Nimaräi Katu Va'e;

⁴ a'eve oime itaɨsɨ rapɨsa renda oro apoprɨ, a'eve avei oime Tüpä porokwaita rɨru oro pɨpe yaoprɨ. A'e ipɨpe oime kambuchi oro apoprɨ a'e tembi'u maná rɨru, ipɨpe avei oime Aarón pokoka a'e sorɨ va'e, iyavei mborokwaita kwachiaprɨ ita ipe va'e rese oime ipɨpe.

⁵ A'e mborokwaita rɨru arɨve oime Tüpä rembigwai ra'anga oyovai yuvɨno'ä, Tüpä oime ite ko'ave eagwä, a'e ipepo oyopɨ tuprɨ Tüpä porokwaita rɨru rovapɨsa yuvɨreko. Ko rupive amombe'ura ko mba'e peü.

⁶ Evokoi nungar mba'e moigätuprɨ pare, pa'i eta yuvɨroikeño yɨpɨndar oɨ asɨaprɨ pɨpe arɨ rupi okwaita apo agwä.

⁷ Imoñuvɨrïosa oɨ pɨpe rumo pa'i ɨvate katu va'eño oike ñepëi reseve ñepëi-pëi aravɨter pɨpe; iyavei gweike yakatu vɨroike mba'e mɨmba ruvɨ vɨropove'ë agwä Tüpä upe oangaipa rese, ava ikwa e'ɨ̇ pɨpe angaipa oyapo va'e repɨrä avei.

⁸ Ko rese Espíritu Maräne'ɨ̇ oikwa uka yandeu avaño tëi ndiya vɨtei ete oike ipa va'e oɨ imaräne'ɨ̇ katu va'e pɨpe Tüpä rovai oime vɨtese yɨpɨndar oɨ yasɨaprɨ.

⁹ Ko opakatu mba'e yande mbo'e mba'e kurïtëindar rese; esepia ko porerekosa iyavei mba'e seropove'ëprɨ a'eve Tüpä upe, nomoatɨröi ete imboeteisar pɨ'a ñemoñetasa.

¹⁰ Ñe'ësa tembi'u rese, ɨgwa rese iyavei ñemoatɨrösa nungar mba'e resendar tëi; yande retekwer resendar tëi porokwaita, a'e rumo egwë e'iño tëi yuvɨreko Tüpä remimbotar ipɨasu va'e yu agwä renonde.

Cristo gweru vuvɨ seropove'ëpɨ̇ra

¹¹ Cristo rumo ou, iyavei a'e ite kurïtëi yande Pa'i Ɨvate katu va'e sekoi mba'e avɨye va'e gweru yandeu. A'e pa'i reikesa rumo nda'ei ava rembiapo nungar tëi, a'e rumo avɨye katu iyavei nda'ei ete ko ɨvɨ pɨpe yapoprɨ.

¹² Cristo rumo oike imaräne'ɨ̇ katu va'esave ɨvave, nda'ei rumo ovesa iyavei gwaka ra'ɨrɨ ruvɨ reropove'ë agwä, a'e rumo vɨropove'ë vuvɨ ite opakatu rese; egwë e'i a'e ñepëi reseve oike apɨre'ɨ̇ va'e ñepɨsɨrösa reime agwä yandeu.

¹³ Supiete gwaka kuimba'e ruvɨ iyavei ovesa ruvɨ, gwaka kuña tanimbu akoi imondoprɨ va'e ava seko marä va'e rese, a'e avei vɨreko raimi tëi pirätäsa ava rete moatɨrö agwä.

¹⁴ ¡Cristo ruvɨ rumo vɨreko katu pirätäsa! Esepia Cristo Espíritu apɨre'ɨ̇ va'e pɨpe, oyemondo a'e ae Tüpä upe inungar mba'e seropove'ëprɨ nimaräi va'e, iyavei suvɨ yande pɨ'a ñemoñetasa moatɨrö opakatu yande rembiapoai manosave yande rereko va'e sui, a'ese yaikatura Tüpä oikove va'e upe mba'e apo uka agwä.

¹⁵ Sese, Jesucristo sekoi mba'e ipɨasu va'e moigätusar, esepia omanosa pɨpe oipɨsɨrö ava angaipa sui ipɨpe avei oime ñeröisa yɨpɨndar mborokwaita vrɨve yuvɨrekoi va'e upe, iyavei toipɨsɨ che rembiporavo yuvɨreko oyeupendar mba'e apɨre'ɨ̇ va'e che remimombe'ugwer rupi oyapave Tüpä egwë e'i.

¹⁶ Akoi ava oikwa ukase gwemimbotar omba'e mondo agwä omano renondeve, ikwasa tuprɨ ranera rumo imanosa semimbotar apo agwä renonde.

¹⁷ Esepia ndiya vɨtei ete omano va'erä rekove seve mba'e imondosa iyarä upe, imanore voi rumo avɨye imondosa.

¹⁸ Sese yɨpɨndar va'e Tüpä remimbotar yaposa mba'e mɨmba ruvɨ pɨyere pɨpe.

¹⁹ Esepia Moisés omombe'upase porokwaita opakatu ava upe; oipɨsɨ ovesa ragwer pirä va'e iyavei ɨvɨra hisopo serer va'e räkä, a'e omoakɨ̇ gwaka ra'ɨrɨ ruvɨ iyavei ovesa ra'ɨrɨ ruvɨ, ɨ rese oyese'a va'e pɨpe a'e opa osɨpɨi kwachiar mborokwaita resendar opakatu ava avei.

²⁰ Evokoiyase aipo e'i: “Ko mba'e ruvɨ oikwa tuprɨ uka ko porokwaita Tüpä ombou va'e omboyeroya agwä peü.”

²¹ Mba'e mɨmba ruvɨ pɨpe avei opa Moisés osɨpɨi tüpäro iyavei opakatu mba'e ipɨpendar iporuprɨ.

²² Porokwaita rupi ete tuvɨ pɨpe seni opakatu mba'e oñemoatɨröpa; ndipoi ete ñeröisa angaipa upe mba'e ruvɨ pɨyereprɨ pore'ɨ̇se.

²³ Iyakatu ite imoatɨrösa evokoi nungar mba'e mɨmba ruvɨ pɨpe seropove'ëprɨ, esepia ko mba'e ɨva pendar nungar tëi sa'angaposa; ɨva pendar ite rumo ipotasa seropove'ëpɨ̇ra mba'e avɨye katu va'e evokoi sui.

Cristo manosa sui oime ñeröisa angaipa upe

²⁴ Esepia Cristo ndoikei ava tëi rembiapo tüpäro maräne'ɨ̇ pɨpe, a'e rumo ɨva pendar ra'anga tëi, egwë e'i rumo a'e oike ɨvave, a'eve kurïtëi sekoi Tüpä rovai yande pɨtɨ̇vɨï agwä oyerure pɨpe.

²⁵ Iyavei Cristo ndoikei seta yupagwer tüpäro pɨpe mba'e reropove'ë agwä, inungar opakatu pa'i ɨvate katu va'e oyapo yuvɨreko yepi, yuvɨroike tüpäro maräne'ɨ̇ pɨpe vɨropove'ë va'erä mba'e ruvɨ tëi yuvɨreko yepi.

²⁶ Egwë e'ise rumo viña, Cristo evokoiyase omanora ɨvɨ apo suive oiko viña. Kurïtëi rumo Cristo oyemboyekwa ko ipa arɨ rupi ñepëi reseve, apɨre'ɨ̇ va'erä vɨropove'ë agwä gwete Tüpä upe tokañɨpa angaipa oyapave.

²⁷ Supiete opa rane itera ava omano yuvɨreko, ipare voi ñepëi reseve oimerä porandusa,

²⁸ egwë e'i avei Cristo oyeeropove'ë ñepëi reseve opakatu angaipa mokañɨ agwä. Ipare rumo oyevɨ irise ou kuri, nda'e iri chira angaipa rekokwer rese, a'e rumo oyevɨra ou gwarösar pɨsɨrö agwä.