Hebreos 5 - Tüpä Ñe'ëngagwer

¹ Opakatu pa'i ɨvate katu va'e iporavoprɨ sekoi ava pa'ü sui, ava rekokwer reropove'ë agwä Tüpä upe iyavei porerekosa mondo agwä chupe, mba'e mɨmba yukaprɨ reropove'ë agwä avei ava angaipa repɨrä.

² A'e pa'i ni'ä oiporara avei teko asɨsa ambuae ava nungar, sese gwekoasɨ e'ɨ̇sa pɨpe oipɨtɨ̇vɨï ava ndayarakwai va'e mba'e oyavɨ va'e avei;

³ a'e rumo gweko pirätä e'ɨ̇sa pɨpe vɨropove'ë mba'e mɨmba yukaprɨ Tüpä upe oangaipa repɨrä, opakatu ambuae ava angaipa repɨrä avei.

⁴ Ndiyai chira ava oyesui tëi pa'i oyeapo, Tüpä rumo osenoira imboetei uka agwä inungar akoi Aarón upe araka'e.

⁵ Egwë e'i avei Cristo, a'e noñeenoi Pa'i Ɨvate katu va'e gweko agwä oyesui tëi, Tüpä ite osenoi imboetei uka agwä, esepia a'e aipo e'i chupe: “Nde ereiko che ra'ɨrɨ; ko pɨpe che amondo nde rekove agwä.”

⁶ Aipo e'i avei ambuae Ikwachiaprɨ pɨpe: “Nde ereiko pa'i ɨvate katu va'e apɨre'ɨ̇ va'erä, inungar tuprɨ mbɨa Melquisedec serer va'e.”

⁷ Ko ɨvɨ pɨpe Cristo oikove vɨtese, oyerure pirätä oyase'osa pɨpe Vu Tüpä upe, esepia a'e oikatu ipɨsɨrö agwä manosa sui; egwë e'i iporeroya tuprɨsa pɨpe, Tüpä osendu ite iyeruresa.

⁸ Yepe Cristo Ta'ɨrɨ ite viña, gweko paraɨsu pɨpe rumo oyembo'e imboyeroya agwä;

⁹ evokoiya gweko pɨpe omboavɨye gweko katuprɨsa, ipɨpe sui gweru poropɨsɨrösa ndopai va'e opakatu vɨroyasar upe narä.

¹⁰ Esepia Tüpä ni'ä osenoi Pa'i Ɨvate katu va'e seko agwä, inungar Melquisedec araka'e.

Yemboarakwasa poreroyasa rereko agwä resendar

¹¹ Orovɨreko vɨtemo seta mba'e ore ñe'ë agwä peü ko mba'e tekokwer rese, yavai rumo imombe'u tuprɨ agwä, esepia pe ndapesendukwa tuprɨ vɨtei ete.

¹² Araka'e suive peporombo'era viña; peipota vɨte rumo peü mba'e ndayavaimi va'e imombe'u iri agwä yembo'esa Tüpä suindar. Ndapeyemovɨräkwäi rumo, peɨ'u iri pota kambɨ mba'e säta va'e u rägwer sui.

¹³ Esepia akoi egwë e'i va'e pitani osɨ rese okambu vɨte va'e nungar tëi pe rekokwer, ipɨpe sui ndapeyembo'ei ete Tüpä ñe'ëngagwer rese mba'e tuprɨ pe reko agwä.

¹⁴ Ko tembi'u säta va'e rumo a'e ava okwakwa va'e upe narä, esepia a'e oyembo'e tuprɨ katu iñe'ëngagwer rese gweko tuprɨ agwä yepi, ipɨpe sui oikwa ite mba'e avɨye va'e poravo mba'e naporäi va'e sui.