Hebreos 3 - Tüpä Ñe'ëngagwer

Jesús ɨvate katu va'e Moisés sui

¹ Evokoiyase, che rɨvrɨ eta iporavoprɨ, pe Tüpä remienoi peiko va'e chupe narä, peyapɨsaka tuprɨ Cristo Jesús rekokwer rese, a'e sekoi yandeu Jesús ñe'ë mombe'usar iyavei pa'i ɨvate katu va'e yande yeroya agwä.

² Esepia Jesús omboavɨye ite Tüpä remimbotar, osenoise imbou ko tekokwer moigätu agwä, inungar Moisés omboavɨye tuprɨ okwaita Tüpä mba'e rärö araka'e.

³ Jesús rumo imboeteiprɨ katu Moisés sui, inungar akoi oɨ aposar imboeteiprɨ katu oɨ sui sekoi.

⁴ Esepia ñepëi-pëi oɨ vɨreko oaposar viña; Tüpä rumo opakatu mba'e aposar sekoi.

⁵ Supiete Moisés Tüpä rembigwai gweko pɨpe omboavɨye opakatu oporavɨkɨsa sëtä rese, esepia omombe'u Tüpä omboyekwa pota va'e ava upe yepi.

⁶ Cristo rumo Ta'ɨrɨ gweko pɨpe omboavɨye okwaita Tüpä rëtä rese, a'e yande yaiko yayeroyaño sese yasäröño avei yande yembovɨ'asa pɨpe ko mba'e avɨye va'e oime va'erä yandeu kuri.

Mbɨtu'usa Tüpä upendar yuvɨrekoi va'e upe

⁷ Sese, inungar Espíritu Maräne'ɨ̇ aipo e'i Ikwachiaprɨ pɨpe: “Ko pɨpeve voi, pesenduse Tüpä ñe'ë,

⁸ peye pɨ'amoatäi rene chupe, ndapeikoi chira ava ndiava reroyai va'e nungar, akoi ɨvɨ iporupɨre'ɨ̇sa rupi Tüpä rekoa'äsar yuvɨrekoi va'e araka'e.

⁹ A'eve avei akoi che rekoa'ä tëi pe ramoi mba'e gwembiapo pɨpe, yepe cuarenta aravɨter rupi osepia tëi mba'e che rembiapo yuvɨreko viña.

¹⁰ Sese añemoɨrö a'e ava upe, iyavei aipo a'e: ‘Kokotɨ tëi yuvɨrogwata opɨ'añemoñetasa rese yepi, ndoikwa potai ete che rekokwer yuvɨreko.’

¹¹ Sese che añemoɨrö aipo a'e yuvɨreko chupe ñepëi reseve ndapepɨtu'ui chietera che pɨtu'usa pɨpe.”

¹² Che rɨvrɨ eta, peñearö katu tipo eme ñepëi ipɨ'añemoñeta naporäi va'e Tüpä reroya e'ɨ̇sa pɨpe oyepepɨ va'erä ichui.

¹³ Iya rumo peyemongere'ɨ̇ katu ñepëi-pëi arɨ yakatu rupi “kurïtëi” sese oñe'ë ko Ikwachiaprɨ, pe rekove pɨpe angaipa upe pe yembopa uka iri e'ɨ̇ agwä, pe mba'e reroya iri e'ɨ̇ agwä rese avei.

¹⁴ Esepia yayemovɨräkwä tuprɨse Cristo rese, yande yeroyasa yɨpɨsuive yareko va'e pɨpe yande mano agwä rupi ete, a'ese yaiko itera sese.

¹⁵ Supi ni'ä akoi aipo e'i ñe'ësa: “Ko pɨpe voi pesenduse Tüpä ñe'ë, peye pɨ'amoatäi rene katu chupe, ndapeikoi chira ava ndiava reroyai va'e nungar.”

¹⁶ ¿Uma pi'ä akoi ava iñe'ë marä va'e yuvɨreko Tüpä ñe'ë rendu pare chupe? Moisés remienose Egipto ɨvɨ sui egwë e'i yuvɨreko.

¹⁷ ¿Uma upe vo akoi Tüpä oñemoɨrö cuarenta aravɨter rupi? Akoi oyemboangaipa va'e omanopa va'e yuvɨreko ɨvɨ iporupɨre'ɨ̇sa rupi.

¹⁸ ¿Uma upe pi'ä akoi ñepëi reseve ndapeikei chietera che pɨtu'usa pɨpe pe pɨtu'u agwä e'i Tüpä? Akoi vɨroya e'ɨ̇sar upe aipo e'i.

¹⁹ Ipɨpe sui yaikwa ndoikatui ete yuvɨroike agwä a'e ɨvɨ imoigätuprɨ pɨpe, esepia ni'ä ndovɨroyai ete yuvɨreko.