Hebreos 2 - Tüpä Ñe'ëngagwer

Yande ma'emo'ära yande pɨsɨrösa agwä rese

¹ Sese iyakatu ko ñe'ësa yasendu va'e rese yayapɨsaka tuprɨ katu, ko tekokwer pɨasu sui yande yepepɨ e'ɨ̇ agwä.

² Esepia porokwaita ombou va'e Tüpä mbigwai ɨva pendar rupi, seroyaprɨ ite sekoi, iyavei oyemboangaipa va'e, ndovɨroyai va'e avei imombaraɨsuprɨ sembiapo rupi yuvɨrekoi araka'e.

³ ¿Marä ya'era pi'ä evokoiyase yande yañemi Tüpä ñemoɨrösa sui viña akoi ndayandema'emo'ä tuprɨise ko yande pɨsɨrösa avɨye va'e rese? Esepia yande Yar a'e rane ite omombe'u yɨpɨndar ko ñe'ësa ñepɨsɨrösa resendar, ipare ramo oikwa yande pa'ü pendar sendusar yuvɨreko.

⁴ Iyavei Tüpä oyapo seta mba'e yavairai va'e poromondɨisa ndayasepiai va'e, iyavei Espíritu Maräne'ɨ̇ pɨpe, omboyoavɨratɨ mba'ekwasa imbou yandeu gwemimbotar rupi toikwa yuvɨreko ko ñe'ësa supi tuprɨ va'e oyapave.

Jesús ava nungar tuprɨ sekoi

⁵ Tüpä nomondoi mbigwai ɨva pendar povrɨve ko ɨvɨ oime va'e, sese akoi oroñe'ë va'e peü.

⁶ Oime rumo Ikwachiaprɨ pɨpe omombe'u tuprɨ va'e: “¿Mba'e vo ava yuvɨrekoi? ¿Mba'e vo yuvɨrekoi ava ɨvɨ pɨpendar? ¿Ma'erä nde ma'endu'a ava tëi rese, iyavei eresärö?

⁷ Erereko ɨvɨ kotɨ katu mbigwai ɨva pendar sui, ipare rumo eremondo nde porañetesa imboeteisave chupe;

⁸ iyavei opakatu erereko uka mba'e nde rembiapo ipovrɨve.” Egwë e'ise Tüpä, ndoseyai ete ñepëi yepe mba'e ipo pendare'ɨ̇, kurïtëi rumo nda'ei opakatu tuprɨ mba'e ipovrɨve.

⁹ Yaikwa ni'ä Jesús, a'e Tüpä gwembigwai sui ndaseta aravɨter ɨvɨ kotɨ katu vɨreko, oporoaɨsusa pɨpe oipota imano agwä opakatu ava repɨrä. Kurïtëi rumo Tüpä iyemombaraɨsu pare, omondo oporañetesa imboeteisave chupe.

¹⁰ Iyavei opakatu mba'e oime Tüpä upe, ichuindar avei toyuvɨroike opakatu che ra'ɨrɨ che reko porañetesave oyapave. Sese Tüpä omombaraɨsu uka Jesucristo Poropɨsɨrösar seko agwä yuvɨreko chupe.

¹¹ Esepia opakatu vɨreko ñepëi Vu yuvɨreko ko seko katuprɨ va'e, seko mbokatuprɨsar avei. Sese Tüpä Ra'ɨrɨ nochi ete, che rɨvrɨ eta peiko o'e agwä vɨroyasar upe.

¹² A'e aipo e'i Ikwachiaprɨ pɨpe: “Añe'ëra nde rese che rɨvrɨ eta upe, asapukai aveira sapukaisa ndeu opakatu ava ñemonu'äsave.”

¹³ Iyavei aipo e'i: “Che ayeroya itera sese.” Ichui aipo e'i iri: “Ko aiko, Tüpä ra'ɨrɨ cheu ombou va'e rese.”

¹⁴ Inungar ava vɨreko va'e gwa'ɨrɨ, oyoya so'o, suvɨ; egwë e'i avei Jesús vɨreko vo'o, vuvɨ yande nungar; omano pɨpe sui omokañɨ va'erä iporoyuka serai va'e pirätäsa; a'e karugwar.

¹⁵ Opakatu ava manosa sui osɨkɨyesa pɨpe mbigwai tëi nungar yuvɨrekoi va'e gwekove vɨteseve, evokoi nungar sui senose agwä, egwë e'i Jesús.

¹⁶ Esepia a'e ndoui mbigwai ɨva pendar pɨtɨ̇vɨï agwä, a'e rumo ou Abraham suindareta pɨtɨ̇vɨï agwä.

¹⁷ Sese ni'ä sekoi vɨvɨreta nungar tuprɨ ite, sekoi va'erä pa'i eta rerekwar ɨvate katu va'e Tüpä upe oporavɨkɨ agwä, tomondo gwetekwer ava angaipa repɨrä ñeröisa reime agwä oyapave.

¹⁸ Esepia, a'e avei oiporara karugwar poroätoisa, sese kurïtëi a'e oikatu ite ava karugwar remiatöi pɨtɨ̇vɨï agwä.