Hebreos 13 - Tüpä Ñe'ëngagwer

Marä ya'era Tüpä mbovɨ'a

¹ Ndapepoi chietera pe yeaɨsusa sui ñepëi-pëi oyeɨvrɨ nungar pe rekosa pɨpe.

² Iyavei peresarai eme pe avasa sui ava oyepotase pe pɨri, esepia ko nungar apo pɨpe amove ava omoinge mbigwai ɨva pendar gwëtä pɨpe.

³ Peyemoma'endu'a avei sokendaprɨ rese inungar-ra pe avei supive sokendaprɨ peiko va'e viña. Iyavei peyemoma'endu'a ava marä-marä tëi serekoprɨ rese, esepia avɨyeteramo egwë e'i aveira yuvɨreko peü.

⁴ Pe opakatu pemboetei avei mendasa, iyavei peiko pe reko maräne'ɨ̇sa pɨpe mendasa rese; esepia Tüpä oikwara oyemboagwasa tëi va'e upe.

⁵ Ndape gwarepochi potarai chira; iya peyembovɨ'año mba'e pereko va'e rese, esepia Tüpä aipo e'i: “Ndoroeyai chietera, iyavei ndapoi chietera ndesui.”

⁶ Evokoiyase aipo ya'era yande yeroyasa pɨpe: “Che Yar che pɨtɨ̇vɨïsar; sese ndasɨkɨyei chietera. ¿Mba'e evokoiyase oyapora ava yuvɨreko cheu?”

⁷ Peyemoma'endu'a pe rerogwatasar rese, peü Tüpä ñe'ëngagwer mombe'usar rese avei, pepɨ'añemoñeta tuprɨ sekokwer rese seko aprɨ rese avei; Tüpä reroya agwer rupi tuprɨ avei peiko.

⁸ Jesucristo rekokwer noñekuñaröi va'e ite, yɨpɨsuive sekoi apɨre'ɨ̇ va'e.

⁹ Peyembopa ukai rene yembo'esa kokotɨ tëi va'e upe. Avɨye katu yayemomirätä Tüpä poroaɨsusa rese mborokwaita tembi'u resendar sui; esepia ko nungar mba'e ndovɨreko ukai mba'e avɨye va'e o'usar upe.

¹⁰ Yande rumo yareko ambuae Tüpä upe seropove'ëprɨ, a'e ni'ä ndiyai ete pa'i tüpäro yɨpɨndar yuvɨrekoi va'e pendar yuvɨro'u.

¹¹ Supiete judío pa'i ɨvate katu va'e vɨroike mba'e ruvɨ tëi Tüpä rëtä oɨ imaräne'ɨ̇ katu va'e pɨpe seropove'ë ava angaipa rerokwa agwä; a'e mba'e mɨmba rete rumo osapɨ tekwa ɨvɨi yuvɨreko yepi.

¹² Egwë e'i avei ni'ä, Jesús iparaɨsu omano tekwa ɨvɨi, ava reko mboatɨrö agwä vuvɨ pɨpe.

¹³ Egwë ya'e aveira yasora Jesús upe yande paraɨsu agwä supi ava yande reroɨrösa pɨpe yaiko.

¹⁴ Supiete, ko ɨvɨ pɨpe ndayarekoi ete tekwa apɨre'ɨ̇ va'e, yande rumo yaseka evokoi tekwa oime va'erä yandeu kuri.

¹⁵ Sese Jesús rembiapo rese iyakatu yamboeteira apɨre'ɨ̇ va'erä yande Yar Tüpä. Ko imboeteisa inungar mba'e seropove'ëprɨ arɨ rupi chupe. ¡Egwë ya'era imboetei yande ñe'ë pɨpe!

¹⁶ Peresarai eme katu ambuae ava upe mba'e tuprɨ aposa sui, iyavei pemondoño ite mba'e pereko va'e ambuae ava upe. Esepia evokoi nungar mba'e seropove'ëprɨ Tüpä oipota.

¹⁷ Pemboyeroya pe kwaisar peyapo semimbotar, esepia a'e ndopɨtu'ui ete pe rekokwer rärö yuvɨreko, esepia Tüpä oikwara mba'e sembiapo rese chupe kuri. Sese pemboyeroya katu tayavai eme iporavɨkɨsa chupe, esepia ndapenosei chietera mba'e avɨye va'e egwë e'ise ichui.

¹⁸ Peyerure Tüpä upe ore rese, supiete ore oroyandu mba'e avɨye va'e oroyapo ore pɨ'añemoñeta pɨpe yepi, esepia oroyapo pota mba'e avɨye va'e opakatu mba'e rese ava rembiepiave.

¹⁹ Che yevɨ pɨ'aivi agwä rese aporandu pe yeruresa rese peü Tüpä remimbotar rupi.

Porovasasa iyavei ma'endu'asa ipa va'e resendar

²⁰ Tüpä mba'e tuprɨ rerekosar, a'e ni'ä ombogwerayevɨ va'e yande Yar Jesús yande rärösar ɨvate katu va'e, suvɨ pɨpe omboyekwa gwemimbotar pɨasu ndopai va'e imbou yandeu,

²¹ tombou pe reko mo'ɨ̇visa iyavei pe reko avɨyesa opakatu pe semimbotar apo agwä; iyavei a'e toyapo mba'e opakatu gwemimbotar yande rese Jesucristo rembiapo sui. ¡Egwë te'i imboeteiprɨ apɨre'ɨ̇ tasekoi Cristo yepi! Amén.

²² Che rɨvrɨ eta, peñemosaño che opomboarakwa va'e rese, movɨrö tëi ni'ä ko ñe'ësa aikwachia peü.

²³ Peikwa yande rɨvrɨ Timoteo imosësa sokendasa sui, oyepota pɨ'aivise, arasora cheyeupi asose pe repia.

²⁴ Pemombe'u che ma'endu'asa opakatu ava pe kwaisar upe, opakatu Tüpä reroyasar upe avei. Ɨvɨ Italia rupindar avei ombou oma'endu'asa yuvɨreko peü.

²⁵ Yande Yar Tüpä taperovasa opakatu oporoaɨsusa pɨpe pe rereko.