Hebreos 12 - Tüpä Ñe'ëngagwer

Yama'ekwa tuprɨra yande yeroyasa pɨpe Jesús rese

¹ Sese yande, yaikwase seta ite evokoi ava oime omboyekwa va'e Tüpä rese oyeroyasa, iyakatu ite yaseyapa opakatu mba'e ndayande mbo'e katui va'e Tüpä upendar mba'e rese, iyavei angaipa yande mbo'a tuprɨ va'e, ichui yayemovɨräkwäño itera yande kwaita Tüpä ombou va'e rese yandeu inungar ivava katu va'e.

² Yama'e tuprɨ itera Jesús rese, a'e ichui ni'ä yareko yande yeroyasa Tüpä rese, a'e avei oyese yande mboporeroya tuprɨ katu, Jesús oiporara kurusu rese omano ochie'ɨ̇sa pɨpe, esepia a'e oikwa ite oparaɨsu pare vɨrekora ovɨ'aretesa, ogwapɨse omborerekwasave Vu Tüpä akato kotɨ öi.

³ Pe avei katu, pepɨ'añemoñeta Jesús rembiapokwer rese; a'e oiporara ite mba'e rasɨkwer ava yangaipa va'e marä-marä tëi vɨrekose, sese pekwerai eme Cristo rese peiko agwä iyavei, ndorekere'ɨ̇ iri ndapeyei chira.

⁴ Esepia pe ndapemano vɨtei ete angaipa upe peye mbopɨ'avɨräkwäsa pɨpe,

⁵ peresarai ete Tüpä pe mboarakwasa sui ta'ɨrɨ ite pe rekosa pɨpe. Esepia Ikwachiaprɨ pɨpe aipo e'i: “Che ra'ɨrɨ, eyemoigätu voiño Yar nde mombaraɨsusa upe nde reko mo'ɨ̇vi tuprɨ agwä, iyavei, ndachekere'ɨ̇ iri nderei chiaveira chupe ndeu oñe'ë pirätäse.

⁶ Esepia yande Yar osekomo'ɨ̇vi tuprɨ ava gwembiaɨsu, iyavei omombaraɨsu rane gwa'ɨrɨ sereko agwä.”

⁷ Peñemosaño katu pe mombaraɨsusa upe pe reko mo'ɨ̇vi agwä: esepia Tüpä egwë e'ise peü gwa'ɨrɨ ite pe rereko. ¿Oime pi'ä ñepëi ava gwa'ɨrɨ upe noñe'ë pirätäi va'e sekokwer mo'ɨ̇vi agwä?

⁸ Tüpä ndape rekokwer mo'ɨ̇vise inungar oyapo ambuae gwa'ɨreta upe yepi, pe evokoiyase inungar-ra chi'ïvä'e ndiyesupai va'e, egwë peye tëi peiko chupe.

⁹ Iyavei, chi'ïvä'e tëi vɨte yaikose, yande yesupa ko ɨvɨ pɨpendar yande nupa yande rekokwer mo'ɨ̇vi agwä. ¿Ma'erä evokoiyase ndayamboetei chira viña, a'e rumo iya yamboetei katura yande Ru Tüpä ɨva pendar tekovesa rereko agwä?

¹⁰ Yande yesupa ko ɨvɨ pɨpendar opɨ'añemoñetagwer rupi tëi yande nupa yaikove raimi tëise ko ɨvɨ pɨpe; Tüpä rumo yande mombaraɨsu yandeu mba'e tuprɨ agwä rese, yande reko maräne'ɨ̇ agwä inungar a'e ndaseko maräi va'e.

¹¹ Supiete yɨpɨndar, poronupasa yaipɨsɨ ramose tasɨ yandeu, koiye rumo yande imboyeroyasa pɨpe yayapo katura mba'e i'ɨ̇vi va'e, a'e evokoiyase yande rekokwer rerekora mba'e tuprɨ pɨpe.

¹² Sese, pemopoäse iri pe reko pirätäsa iyavei peyemongere'ɨ̇ iri pe gwata agwä yande Yar rupi,

¹³ ipare peseka perɨ i'ɨ̇vi va'e pe rekokwer upe narä toigätu che pɨ ndogwatai va'e pe yapave timarä katu iri eme pe'esa pɨpe.

Poromboarakwa ñearösa resendar

¹⁴ Peiko katu ava upe mba'e tuprɨ pɨpe, peiko avei pe reko maräne'ɨ̇ pɨpe; esepia ava ndovɨrekoi va'e gweko maräne'ɨ̇, ndosepiai chietera yande Yar.

¹⁵ Peñearö tuprɨ katu, tipo eme ava ndoipɨsɨi va'e Tüpä porovasasa pe pa'üve, iyavei tipo eme mba'e tëi ava pɨ'a pɨpe, avɨyeteramo opakatu rese ova tiëtera.

¹⁶ Tipo eme katu pe pa'ü pendar oyemboagwasa tëi va'e, tipo eme avei ava Tüpä upendar mba'e vɨroɨrö va'e pe pa'üve inungar Esaú araka'e, a'e omondo Tüpä porovasasa oyeupendar ta'ɨrɨ ɨpɨ gwekosa resendar mimoi repɨrä tëi vɨvrɨ upe.

¹⁷ Iyavei peikwa, akoi Esaú oipɨsɨ pota Tüpä porovasasa vu sui viña, a'e rumo ndiya iri ete sovasapɨrä sekoi; yepe oyase'o iteanga viña, ndiya iri ete rumo mba'e sembierekovɨ rägwer mboyevɨ agwä chupe.

¹⁸ Peyemboyase Tüpä rese, nda'ei inungar pe ramoi Israel pendar araka'endar, esepia a'e ɨvɨtrɨ Sinaí sese yapoko va'e rese tëi oyemboya va'e yuvɨreko; a'e ɨvɨtrɨ rese sendɨ ite inungar tata rendɨgwer; oime pɨ̇tü, pɨ̇tümimbi va'e, ɨvɨtuai avei sese,

¹⁹ iyavei ndapesendui mimbɨ imoñe'ëprɨ Tüpä ñe'ë avei. Araka'endar rumo osendu va'e yuvɨreko, iñe'ë renduse rumo osɨkɨyepave ndoipota iri a'e oyeupe ñe'ë yuvɨreko,

²⁰ esepia a'e oyembosɨkɨye ite evokoi porokwaita aipo e'i va'e sui: “Akoi opɨ̇ro va'e ɨvɨtrɨ rese, yepe mba'e mɨmba tëi viña, a'e peyapi-yapi yuka ita pɨpe, anise mba'e sakwävi va'e pɨpe avei.”

²¹ A'e mba'e oyekwa va'e aipo oporombosɨkɨye va'e evokoiyase Moisés teiete aipo e'i: “Che sɨkɨyepave arɨrɨi ete.”

²² Pe rumo peyemboya ɨva pendar ɨvɨtrɨ Sión rese, Tüpä oikove va'e rekwave a'e tekwa Jerusalén ɨva pendar, a'eve mbigwai ɨva pendar seta iteanga oñemonu'ä Tüpä mboetei agwä yuvɨreko yepi,

²³ iyavei opakatu yɨpɨndar Tüpä ra'ɨrɨ ikwachiaprɨ va'e ɨvave. Oyemboya Tüpä rese yuvɨreko, a'e opakatu mba'e Moigätusar, iyavei peyemboya ava seko avɨye va'e espíritu yuvɨrekoi va'e rese, a'e ni'ä Tüpä osekomo'ɨ̇vi tuprɨ sereko,

²⁴ peyemboya avei Jesús rese, a'e omoime yandeu Tüpä remimbotar ipɨasu va'e, a'e suvɨ yande moatɨrö va'e, avɨye katu Abel ruvɨ sui.

²⁵ Sese peikwa katu, ndorovɨroyai peye va'erä akoi peü oñe'ë va'e upe. Esepia Tüpä reroya e'ɨ̇sar noñemi ete iñemoɨrösa sui yuvɨreko ko ɨvɨ pɨpe. Egwë ya'e aveira yande, ndayaroyaise ɨva sui oñe'ëse yandeu.

²⁶ Tüpä oñe'ë pɨpe omborɨrɨi ete ɨvɨ araka'e, kurïtëi rumo aipo e'i: “Che amborɨrɨ irira ɨvɨ, nda'ei chira rumo ɨvɨ gweraño, ɨva avei amborɨrɨira.”

²⁷ Ko ñe'ësa pɨpe aipo e'i “amborɨrɨ irira ɨvɨ”, ikwasa ite opara gwembiapo mba'e ovɨï va'e omokañɨ, topɨta mba'e apɨre'ɨ̇ novɨi va'e oyapave.

²⁸ Tüpä mborerekwasa ombou va'e yandeu a'e novɨi chietera. Avɨye ndeu ya'era evokoiyase sese chupe, ipɨpe sui yayerure katu yande pɨ'a pɨpe imboeteisave semimbotar rupi.

²⁹ Esepia ni'ä yande Tüpä a'e inungar tata ñepëi reseve mba'e omokañɨpa va'e.