Hebreos 1 - Tüpä Ñe'ëngagwer

Tüpä oñe'ë Gwa'ɨrɨ Jesucristo rupi yandeu

¹ Araka'e suive Tüpä oñe'ë yande ramoi eta upe oñe'ë mombe'usar upe avei. Ambuae mba'e rupi oseka imombe'u tuprɨ agwä yuvɨreko chupe.

² Kurïtëi rumo oñe'ë yandeu ipa va'e Gwa'ɨrɨ rupi, chupe avei oyapo opakatu mba'e. A'e mba'e sembiapo chupe narä ite.

³ A'e ni'ä Tüpä rekokwer porañetesa sekoi, egwë e'i ete, a'e Tüpä rekokwer tuprɨ ite, a'e opakatu mba'e omovɨräkwä oñe'ë pirätäsa pɨpe. Yande angaipagwer sui yande moatɨrö pare oso, ogwapɨ Tüpä akato kotɨ öi ɨvave,

⁴ iyavei seko ɨvate katu mbigwai ɨva pendar yuvɨrekoi va'e sui, a'e vɨreko omborerekwasa ɨvate katu va'e ichui.

Tüpä Ra'ɨrɨ seko ɨvate katu mbigwai eta ɨva pendar sui

⁵ Esepia Tüpä aipo nde'i ete mbigwai ɨva pendar upe: “Nde che Ra'ɨrɨ ereiko; ko pɨpe amondo nde rekove agwä.” Aipo nde'i avei mbigwai ɨva pendar upe: “Che aikora iyesupara, a'e evokoiyase sekoira che ra'ɨrɨ gwä.”

⁶ Ichui rumo ombouse Gwa'ɨrɨ ñepëi va'e ko ɨvɨ pɨpe, aipo e'i: “Tomboetei opakatu mbigwai Tüpä suindar yuvɨreko.”

⁷ Evokoiyase mbigwai ɨva pendar rese oñe'ë, Tüpä aipo e'i: “Ombou mbigwai ɨva pendar ɨvɨtu nungar, tata nungar avei vɨreko oporavɨkɨ va'e oyeupe narä.”

⁸ Ta'ɨrɨ rese ñe'ësa rumo aipo e'i ikwachiaprɨ araka'endar pɨpe: “Che Yar Tüpä, nde mborerekwasa rumo apɨre'ɨ̇ va'erä ite, ereporokwai nde reko ɨ̇vi tuprɨsa pɨpe yepi.

⁹ Mba'e i'ɨ̇vi va'e raɨsusar ereiko iyavei mba'e naporäi va'e raɨsue'ɨ̇sar; sese Tüpä nde poravo, a'e Yar Tüpä ite, omondo avei torɨvetesa ndeu ɨvate katu va'e opakatu nde mboetasa sui.”

¹⁰ Iyavei aipo e'i iri: “Nde, ore Yar, yɨpɨsuive eremovɨräkwä va'e ɨvɨ; nde avei ereyapo ɨva.

¹¹ Opakatu ko nde rembiapo opa va'erä tëi, nde rumo apɨre'ɨ̇ va'erä ite ereiko. Opakatu a'e oyearo va'erä tëi inungar turukwar;

¹² ¡ipare ereyapara inungar turukwar yapaprɨ, iyavei eresekuñaröra inungar oturukwar osekuñarö va'e! Nde rumo ndereñekuñaröi chietera; nde rekokwer avei ndopai va'erä ite.”

¹³ Tüpä aipo nde'i ete ñepëi mbigwai ɨva pendar upe: “Egwapɨ che akato kotɨ, a'ese che amondora nde amotare'ɨ̇mbar nde povrɨve.”

¹⁴ Esepia opakatu mbigwai eta ɨva pendar espíritu yuvɨrekoi Tüpä upe oporavɨkɨ yuvɨreko, imbouprɨ ava pɨtɨ̇vɨï agwä ipɨsɨröpɨrä.