Gálatas 3 - Tüpä Ñe'ëngagwer

Porokwaita iyavei yeroyasa

¹ ¡Ndapemba'ekwai ete pe Galacia pendar! ¿Pe ndoyavɨi ipaye va'e remimbopa peiko? Oromombe'u tuprɨ ni'ä pe rovai ete akoi Jesucristo kurusu rese yatɨka agwer peü.

² Aipota pemboyevɨ che porandusa cheu ¿Moisés porokwaita mboyeroya pɨpe pi'ä peipɨsɨ Espíritu Tüpä suindar, anise ko ñe'ësa pesendu va'ekwer reroya pɨpe tie?

³ ¿Ndapemba'ekwai ete yɨpɨndar, Espíritu pɨpe pemboɨpɨ Cristo rupi pe gwata agwä egwë peye aveira pi'ä pe pirätäsa pɨpe tëi pe gwata tuprɨ agwä kurïtëi?

⁴ ¿Peipɨsɨ tuprɨ tëi pi'ä mba'e avɨye va'e?... ¡Ani nda'ei egwë e'i tuprɨ tëi va'erä!

⁵ Akoi Tüpä omondose Espíritu peü iyavei oyapo va'e mba'e poromondɨisa pe pa'üve, ¿ma'erä pi'ä oyapo? Esepia ko ñe'ësa pesendu va'e peroya ite, sese egwë e'i peü nda'ei Moisés porokwaita tëi reroya pɨpe.

Tüpä oikwa ite Abraham seko maräne'ɨ̇se, oyese yeroyasa pɨpe

⁶ Egwë e'i ete Abraham Tüpä reroya, ipɨpe sui Tüpä oipɨsɨ seko katuprɨ va'e nungar oyeupe narä.

⁷ Sese iya peikwara opakatu akoi oyeroya va'e Tüpä rese yuvɨreko, a'e Abraham suindar ite.

⁸ Iyavei Ikwachiaprɨ pɨpe omombe'u ite senondeve Tüpä oipɨsɨ aveira opakatu oyese oyeroya va'e nda'ei va'e judío ko ɨvɨ pɨpendar oyeupe narä. Iyavei omombe'u ko ñe'ësa ikatuprɨ va'e Abraham upe: “Opakatu ava ɨvɨ pɨpendar sovasaprɨra yuvɨreko ndesui.”

⁹ Evokoiyase Tüpä osovasara kurïtëindar oyese yeroyasareta, inungar Abraham araka'e.

¹⁰ Akoi seko katuprɨ pota va'e Moisés porokwaita pɨpe tëi yuvɨrekoi va'e, a'e Tüpä ñemoɨrösavrɨve tëi yuvɨrekoira, esepia Ikwachiaprɨ pɨpe aipo e'i: “Opakatu ava nomboavɨyei va'e Tüpä porokwaita ikwachiaprɨ pɨpendar, a'e iñemoɨrösavrɨve tëi yuvɨrekoira.”

¹¹ Ko Moisés porokwaita pɨpe ndipoi ete ava Tüpä rovai seko ɨ̇vi tuprɨ va'e; esepia Ikwachiaprɨ pɨpe apo e'i: “Ava seko katuprɨ va'e oikovera Tüpä rese oyeroyasa pɨpe sui.”

¹² Moisés porokwaita nda'oyoyai Cristo rese yeroyasa rese. Esepia a'e porokwaita aipo e'i: “Akoi ava oiko pota va'e ko porokwaita pɨpe, tomboavɨye tuprɨ ite opakatu porokwaita gwekove agwä.”

¹³ Moisés porokwaita mboavɨye e'ɨ̇sa pɨpe yakañɨ tëira viña, Cristo rumo yande renose yande kañɨ tëi rägwer sui, a'e ae opa oipɨsɨ ñemoɨrösa yande repɨrä, esepia Ikwachiaprɨ pɨpe aipo e'i: “Opakatu ava imboyasekoprɨ ɨvɨra rese, oipɨsɨ ñemoɨrösa yuvɨreko.”

¹⁴ Sese ko Tüpä omondo porovasasa Abraham upe toipɨsɨ avei ava nda'ei va'e judío Cristo Jesús rer pɨpe oyapave; iyavei ipɨpe sui yande opakatu yaipɨsɨ Tüpä Espíritu imombe'uprɨ yayeroyase Cristo rese kurïtëi.

Porokwaita nomboyeoi ete Tüpä gwemimombe'ugwer

¹⁵ Che rɨvrɨ eta, amboyoya pota mba'e ko ɨvɨ pɨpendar mba'e rese: inungar akoi ava ñepëi reseve oikwachiase gwemimbotar omombe'u va'e, a'ese ndipoi ete ambuae ava omboye'o va'erä ndipoi avei ambuae ava omboyeapɨ iri va'erä.

¹⁶ Egwë e'i avei Tüpä remimombe'ugwer Abraham upe araka'e ichuindar upe avei. Esepia Ikwachiaprɨ pɨpe noñe'ëi ete “ichuindar rese”, ñe'ësa seta va'e pɨpe, a'e rumo ñe'ësa ñepëi va'e pɨpe; aipo e'i “iyavei ndesuindar” a'e Cristo ite sekoi.

¹⁷ Ko mba'e amombe'u pota peü: evokoi porokwaita Tüpä ombou va'ekwer cuatrocientos treinta aravɨter pare, ndoikatui chietera Tüpä ñepëi reseve Abraham upe omombe'u va'ekwer iyavei oñe'ë omboavɨye va'erä mboye'o agwä.

¹⁸ Supiete akoi Tüpä suindar ou va'erä porerekosa Moisés porokwaita mboavɨyesa pɨpe suise viña, a'ese nda'ei chiaveira Tüpä remimombe'ugwer sui; a'e rumo ñepëi reseve Tüpä remimombe'ugwer rupi Abraham upendar porerekosa.

¹⁹ Evokoiyase ¿ma'erä pi'ä avɨye Moisés porokwaita? Esepia ava poreroya e'ɨ̇sa kwa agwä Tüpä ombou oporokwaita Moisés upe araka'e. Ko porokwaitavrɨve rumo ava yuvɨrekoi akoi oyepotase voi “Abraham suindar” Jesús Tüpä remimombe'ugwer rupi, yɨpɨndar rumo Tüpä oyokwai gwembigwai ɨva pendar oporokwaita mombe'u agwä Moisés upe araka'e tomombe'u evokoiyase Moisés che porokwaita opakatu ava upe oyapave.

²⁰ Ñepëi ava rese oñemoñetase, ndipotasai ambuae imoigätu agwä Tüpä ni'ä ñepëi va'e sekoi.

Cristo ouse opa omokañɨ Moisés porokwaita

²¹ ¿Moisés porokwaita pi'ä kokotɨ tëi Tüpä remimombe'ugwer sui? ¡Ani nda'ei ete supi! Esepia akoi porokwaita ombouse tekovesa apɨre'ɨ̇, a'ese porokwaita reroya pɨpe yande reko katuprɨra Tüpä rovake viña.

²² Ikwachiaprɨ araka'endar pɨpe rumo aipo e'i, opakatu ava inungar mbigwai tëi oangaipa pɨpe yuvɨrekoi, akoi vɨroya va'e Jesucristo oipɨsɨra Tüpä remimombe'ugwer yuvɨreko kuri.

²³ Yɨpɨndar rumo mbigwai nungar yaiko Tüpä nomboyekwa vɨteise Gwa'ɨrɨ rese yande yeroya agwä.

²⁴ Inungar chi'ïvä'emi tëi, egwë ya'e porokwaitavrɨve yaiko yɨpɨndar, a'e porokwaita rumo yande mbo'e Cristo yu agwä toyeroya sese gweko katuprɨ agwä kuri oya yandeu.

²⁵ Kurïtëi rumo oime Jesucristo rese yeroya agwä, evokoiyase nda'e iri a'e porokwaitavrɨve yaiko,

²⁶ pe ni'ä opakatu Tüpä ra'ɨrɨ peiko Cristo Jesús rese yeroya pɨpe,

²⁷ opakatu pe ñapirämombrɨ peiko va'e Cristo rupi pe gwata agwä, Cristo rekokwer avei pereko.

²⁸ Iyavei ndipoi ete yemboya'osa Jesucristo rese yaikose, yepera judío viña, nda'ei va'e judío, anise mbigwai, nda'ei va'e mbigwai, kuimba'e anise kuña; esepia opakatu ñepëi va'e nungar ite peiko Cristo rese.

²⁹ Iyavei Cristo suindar peikose, evokoiyase Abraham suindar tuprɨ ite peiko, a'ese peipɨsɨra Tüpä remimombe'u porerekosa yandeundar.