Filipenses 4 - Tüpä Ñe'ëngagwer

¹ Sese che rɨvrɨ eta, che rembiaɨsu, peyemovɨräkwära yande Yar rese yepi; che ni'ä opoepia pota ite, pe inungar porerekosa imbouprɨ peiko cheu, esepia che vɨ'asa peiko.

Yayembovɨ'a yande Yar rese yepi

² Evodia iyavei Síntique, toyuvɨrekoi oyekupɨ'ɨrɨ nungar yande Yar reroyasa pɨpe yuvɨreko.

³ Nde ni'ä che pɨtɨ̇vɨï tuprɨ va'ekwer che poravɨkɨsa rese eve, eipɨtɨ̇vɨï evokoi kuña, esepia a'e ni'ä oyembopɨ'avɨräkwä ite che pɨtɨ̇vɨïse Tüpä ñe'ëngagwer pɨsɨrösa resendar mombe'u agwä yuvɨreko, oyoya Clemente rese iyavei ambuae oporavɨkɨ va'e rese che rupi yuvɨreko. A'e serer opa ikwachiaprɨ Tüpä kwachiar tekovesa apɨre'ɨ̇ va'e resendar pɨpe.

Yande pɨ'añemoñetara opakatu mba'e avɨye va'e rese

⁴ Peyembovɨ'arete arɨ yakatu rupi yande Yar rese yepi. Amombe'u iri aipo peü: ¡Peyembovɨ'año katu!

⁵ Pemboyekwa katu ava upe pe reko mbegwesa. Esepia köimi ete yande Yar yevɨ iri agwä yandeu.

⁶ Ani ndapeyembovɨ'ai chira mba'e ipanese peü, iyakatu rumo peyerurera opakatu evokoi nungar mba'e rese Tüpä upe; peporandura mba'e rese, iyavei avɨye ndeu peyera chupe.

⁷ Evokoiyase Tüpä omondora gweko tuprɨsa peü, pe Jesucristo rese peiko va'e, ko teko tuprɨsa ni'ä avɨye katu ava pɨ'a ñemoñetasa sui, ipɨpe sui osäröra pe pɨ'a, pe pɨ'a ñemoñetasa avei peü.

⁸ Ko ipa, che rɨvrɨ eta, yande pɨ'añemoñetara opakatu mba'e supi tuprɨ va'e rese, poromboetei agwä rese, mba'e i'ɨ̇vi va'e rese, mba'e maräne'ɨ̇ rese, mba'e yande mbovɨ'a va'e rese, opakatu mba'e avɨye va'e ikwaprɨ va'e rese. Iyavei yande pɨ'añemoñetara ambuae mba'e avɨye va'e rese, imboeteiprɨ va'e rese avei.

⁹ Peyapoño itera mba'e che opombo'e va'ekwer amondo va'e rese peü, pesendu va'e che aipo a'ese, che repia va'ekwer yapose peye: evokoiyase Tüpä gweko tuprɨsa reseve sekoira pe rese.

Filipos pendar porerekosa Pablo upe

¹⁰ Avɨ'arete yande Yar rese esepia pema'endu'a irimi che rese pe porerekosa mbou agwä cheu. Sesarai yuvɨreko che sui nda'ei chira peü, pe rumo yɨpɨndar ndapeikatui ete che pɨtɨ̇vɨï agwä peye.

¹¹ Ipane mba'e cheu nda'ei chira peü, esepia ayembo'e che vɨ'arete agwä mba'e areko va'e rese.

¹² Aikwa marä ya'e yande paraɨsusa pɨpe yaiko, aikwa avei marä ya'e mba'e rereko atɨ agwä. Ayembo'e avei che vɨ'a agwä opakatu mba'e oimese cheu, inungar che ɨ̇taröse ndache rɨepoise avei, oimese sumbɨre va'e mba'e ipanese avei cheu.

¹³ Aikatu opakatu mba'e uve che yemovɨräkwä agwä, esepia Cristo ombou che pirätä agwä.

¹⁴ Pe rumo peyapo mba'e avɨye va'e cheu, che pɨtɨ̇vɨï eteprɨsave peye mba'e-mba'e tëi oimese cheu.

¹⁵ Iyavei pe Filipo pendar peikwa akoi yɨpɨndar peipɨsɨse pɨsɨrösa resendar Tüpä ñe'ëngagwer akoi che sose Macedonia sui, ndipoi ete Jesús reroyasar ambuae tekwa pendar iporereko va'e yuvɨreko che rese, pe gweraño pembou pe porerekosa, avɨye pe esa pɨpe che pɨtɨ̇vɨï agwä.

¹⁶ Iyavei aikose Tesalónica ve, pembou pe porerekosa cheu ñuvɨrïo yupagwer che pɨtɨ̇vɨï agwä.

¹⁷ Ndachepɨ'añemoñetai mba'e arokwaño tëi va'erä pe sui; che rumo aipota Tüpä omboyevɨra peü ko pe porerekosa pembou va'e cheu.

¹⁸ Che opa aipɨsɨ pe porerekosa Epafrodito upe pembou va'e, evokoiyase oimeño ite iyavei sumbɨre vɨte cheu. A'e pembou va'e cheu avɨye ite, inungar itaɨsɨ sɨäkwä va'e, iyavei inungar mba'e seropove'ëprɨ avɨye va'e Tüpä upe.

¹⁹ Evokoiyase yande Ru Tüpä, omba'e eta porañete va'e sui omondora opakatu mba'e ipane va'e peü, teko porañetesa Cristo Jesús rese oime va'e.

²⁰ ¡Egwë tëi timboeteisa yande Ru Tüpä yepi! Amén.

Pablo ma'endu'asa ipa va'e

²¹ Avɨye, pemombe'u che ma'endu'asa opakatu Tüpä reroyasar Jesucristo rese yuvɨrekoi va'e upe eipeve. Iyavei opakatu Jesús reroyasar yuvɨrekoi va'e che rese, a'e avei omondo oma'endu'asa yuvɨreko peü.

²² Iyavei opakatu ambuae yuvɨrekoi va'e ko'ave Jesús reroyasar, iyavei akoi mborerekwar ɨvate katu va'e rëtäve yuvɨrekoi va'e, a'e avei omondo oma'endu'asa yuvɨreko peü.

²³ Yande Yar Jesucristo taperovasa opakatu peiko va'e.