Filipenses 3 - Tüpä Ñe'ëngagwer

Ani peiko irira judío porokwaita rupi

¹ Iyavei che rɨvrɨ eta, peyembovɨ'año yande Yar rese peikose. Ndachekwerai ete ñe'ësa aikwachia va'ekwer kwachia iri agwä peü, iyavei avɨye katu ite peü narä.

² Peñearö akoi ava sekokwerai va'e sui, evokoi mboravɨkɨ naporäi va'e aposar iyavei ava retekwer momaräsar yuvɨrekoi va'e sui;

³ yande rumo imbocircuncidaprɨ nungar supiete va'e Tüpä mboyeroyasar yaiko, esepia yayerure Espíritu pɨpe Tüpä upe; yayembovɨ'a avei Jesucristo reroyasar yande rekosa rese. Nda'ei yande retekwer rese tëi yayeroya.

⁴ Yepe che supiete ayeroya katura ambuae ava sui evokoi nungar mba'e rese viña. Ndipoi chietera che nungar oyeroya katu va'e evokoi rese:

⁵ esepia che imbocircuncidaprɨ aiko mbosapɨ ova arɨ pɨpe che are, iyavei che aiko Israel tekwa pendar Benjamín suindar avei, che hebreo, hebreo ra'ɨrɨ avei aiko no. Che yɨpɨndar fariseo rekokwer areko, evokoiyase ayembo'e tuprɨ fariseo arakwasa judío porokwaita rese vichiko;

⁶ ipɨpe sui tëiete aseka-seka katu ayapo va'erä mba'e opakatu ava Jesucristo reroyasar upe vichiko; ko porokwaita reroyasa rese rumo, ndipoi ete ava marä e'i va'e yuvɨreko cheu.

⁷ Ko yɨpɨndar opakatu mba'e, avɨye ite cheu viña, Jesucristo rese aikose rumo, avɨye cheu egwë e'i tëi va'e kurïtëi.

⁸ Iyavei evokoi nungar mba'e opakatu aseya kokotɨ che yesui, che Yar Cristo Jesús rekokwer kwasa pɨpe. Cristo rekokwer sui opa ite mba'e amokañɨ, ipɨpe sui opakatu mba'e ɨtɨ nungar tëi cheu aiko va'erä supi

⁹ iyavei sese chereko agwä; nda'ei porokwaita mboavɨyesa rese tëi aseka che reko katuprɨ agwä, che rumo aseka Jesucristo rese che yeroyasa pɨpe sui egwë a'e va'erä, egwë e'i ete Tüpä che pɨsɨ seko katuprɨ va'e nungar Cristo rese che yeroyasa pɨpe.

¹⁰ Che rumo aikwa pota ite Cristo rekokwer, iyavei areko pota pirätäsa ikwerayevɨsa resendar cheyese aipɨsɨ pota avei iparaɨsu agwer; inungar a'e omano egwë a'e pota avei,

¹¹ egwë a'e aveira asärö che kwerayevɨ agwä omano va'e pa'ü sui vichiko.

Nde'i vɨtei ete yandeu yaiko va'erä teko maräne'ɨ̇sa pɨpe

¹² Asupitɨ opakatu ko mba'e nda'ei ete, iyavei ndaseko maräi va'e aiko nda'e vɨtei chietera; che rumo aseka vɨte a'e tekokwer che rekorä, esepia Cristo Jesús che pɨsɨ ite oyeupe narä.

¹³ Che rɨvrɨ eta, che ae tëi ko tekokwer i'ɨ̇vi va'e opa ite ayapo vichiko nda'ei chira peü; ko rumo mba'e che ayapo, ayemboesarai opakatu che reko agwer sui, iyavei opakatu che rekovesa rese agwata tenondeño ite,

¹⁴ esepia Tüpä che renoi ɨvave che so agwä aipɨsɨ va'erä iporerekosa ɨva pendar Cristo Jesús rese che rekose.

¹⁵ Aipo rupi iya yande pɨ'añemoñetara opakatu yande yarakwa tuprɨ va'e, avɨyeteramo pe pɨ'a ñemoñetara ambuae mba'e rese tëi, Tüpä avei oikwa ukara evokoi nungar mba'e peü.

¹⁶ Ko yande rekokwer yareko va'e sui rumo ndayande resarai chietera yepi.

¹⁷ Che rɨvrɨ eta, peiko che nungar iyavei pema'ekwa tuprɨ ava ore rekokwer moñasar rese.

¹⁸ Amombe'u akoi seta yupagwer rupi peü, kurïtëi rumo amboyevɨ irira imombe'u che yase'osa pɨpe peü, seta avei yuvɨrekove ava ko ñe'ësa Cristo mano agwer kurusu resendar amotare'ɨ̇mbar,

¹⁹ a'e rumo imokañɨpɨ̇ra yuvɨrekoira kuri. Iyavei itüpä ikaruaisa tëiete yuvɨreko, iyavei gweko ɨvate aisa pɨpe oyapo mba'e tëi yande mochiai va'e yuvɨreko. Ko ɨvɨ pɨpendar mba'e-mba'e tëi reseño ite ipɨ'añemoñeta yuvɨreko.

²⁰ Yande rumo ɨvave narä ite yaiko, yasärö avei yaiko ɨva sui ou va'erä yande Pɨsɨrösar, a'e yande Yar Jesucristo sekoi,

²¹ a'e opirätäsa pɨpe vɨrekora opakatu mba'e opovrɨve. A'e opirätäsa pɨpe avei osekuñaröpara yande retekwer egwë e'i tëi va'e, a'ese inungar a'e setekwer sendɨyai, nimaräi va'e, egwë ya'e aveira yande yaiko kuri.