Filipenses 2 - Tüpä Ñe'ëngagwer

Cristo yemominisa, seko ɨvatesa resendar avei

¹ Iyavei Cristo pe mongere'ɨ̇, pe mbovɨ'a oporoaɨsusa pɨpe oiko, Espíritu avei sekoi pe rese. Peyeaɨsu tuprɨ iyavei pe yeaɨsusa pɨpe peñepɨtɨ̇vɨï,

² sese che mbovɨ'a katu peye, perekora pɨ'a ñemoñetasa ñepëi reseve, oyoya gwasu avei peyeaɨsura, oyoya aveira pe pɨ'a ñemoñetasa, ñepëi reseve mba'e pe remimbotar rese avei.

³ Ndapeyapoi chira mba'e peyeupe gweraño tëi, ndapeyapoi chiaveira mba'e pe yemboɨvate aisave, iyakatu rumo pe reko yemominisa pɨpe ambuae avɨye katu perekora peyesui.

⁴ Pesekai rene mba'e avɨye va'e peyeupe narä gweraño, iyakatu rumo peseka avei mba'e avɨye va'e ambuae ava reko tuprɨ agwä.

Yaikora teko yemominisa pɨpe Cristo mboɨvatesave

⁵ Pe pɨ'a ñemoñetara ñepëi-pëi peyese inungar Cristo Jesús rese yepi,

⁶ aipo e'i: Yepe Cristo sekoi Tüpä nungar tuprɨ ite viña, a'e rumo ndaseko potai ete inungar,

⁷ opa oseya gweko pirätäsa ɨva pendar ou sekoi rumo mbigwai nungar tëi ko ɨvɨ pɨpe. Sekoi inungar opakatu ava ko ɨvɨ pɨpendar iyavei oyemboyekwa ite gwekokwer inungar ava ko ɨvɨ pɨpendar.

⁸ Ava nungar gwekosa pɨpe oyeekomini ete, iyavei Tüpä mboyeroyasa pɨpe sekoi manosa povrɨve, yatɨkatasa avei kurusu rese imano agwä.

⁹ Sese Tüpä oseko mboɨvate katu sereko omondo avei serergwä ɨvate katu va'e opakatu ambuae rer sui,

¹⁰ evokoiyase, a'e terer ɨvate katu imondoprɨ Jesús upe, a'e senduse toñenopɨ'ä opakatu yuvɨreko ɨva pendar, ɨvɨ pɨpendar opakatu omano va'ekwer avei oyapave,

¹¹ ichui toikwa opakatu Jesucristo yande Yar sekoise yande Ru Tüpä mboetei agwä.

Jesús reroyasar tesapesa nungar yuvɨrekoi ko ɨvɨ pɨpe

¹² Sese, che rɨvrɨ eta che rembiaɨsu, inungar pe che mboreroyaño ite peye yepi, nda'ei rumo aiko vɨteseño pe pa'üve, kurïtëi iya che mboyeroya katu peye amombrɨ aikose pesui. Peyapo mba'e avɨye va'e peiko va'erä pɨsɨrösa pɨpe, Tüpä mboeteisave ichui pe sɨkɨyesa pɨpe avei;

¹³ esepia, Tüpä ombou pe kere'ɨ̇sa semimbotar apo agwä, gwemimbotar rupi avei ombou pirätäsa imboavɨye agwä peü.

¹⁴ Peyapo opakatu mba'e peñe'ë ñe'ë tëi e'ɨ̇sa pɨpe, pe yepoepɨ-epɨe'ɨ̇sa pɨpe avei,

¹⁵ sese tipo eme mba'e pe rembiavɨ pereko raisa rese, evokoiyase peikora Tüpä ra'ɨrɨ ndayangaipai va'e ava mba'e-mba'e tëi oyapo va'e pa'üve. A'e ipa'üve pe rekokwer osesapera, inungar yasɨtata osesape ko ɨvɨ pɨpe yepi,

¹⁶ peyemovɨräkwä katu ñe'ësa avɨye va'e tekovesa ombou va'e rese. Akoi ouse Cristo kuri avɨ'aretera pe rese, esepia pe rese che poravɨkɨsa egwë nde'i tëi va'erä.

¹⁷ Yepe che rekokwer seropove'ësara viña Tüpä upe peyeroyasa mboavɨye agwä rese, a'ese che avɨ'aretera iyavei aikora opakatu pe rese che vɨ'aretesa pɨpe.

¹⁸ Pe avei peyembovɨ'a, peiko avei che vɨ'aretesa rupi.

Timoteo

¹⁹ Che ayeroya yande Yar Jesús rese, amondo pɨ'aivi va'erä Timoteo pe repia, a'e omboyevɨse ñe'ësa pe rekokwer resendar, a'ese che avɨ'aretera.

²⁰ Iyavei ndipoi ete ambuae ava Timoteo nungar che pɨ'a ñemoñetasa rupi tuprɨ ima'endu'a va'e pe rese pe reko tuprɨ agwä;

²¹ esepia opakatu ava oseka gwemimbotar tëi apo agwä, ndosekai ete rumo Jesucristo remimbotar yuvɨreko.

²² Pe ni'ä peikwa Timoteo reko tuprɨsa opakatu upe, iyavei che pɨtɨ̇vɨï Tüpä ñe'ëngagwer mombe'u agwä, inungar chi'ïvä'e oipɨtɨ̇vɨï oyesupa, egwë e'i che pɨtɨ̇vɨï oiko.

²³ Sese che aipota imondo agwä pe repia akoi aikwase marä e'ira che rereko yuvɨreko;

²⁴ che rumo ayeroya yande Yar rese aso pɨ'aivi va'erä che teiete pe repia.

Epafrodito rekokwer

²⁵ Iyavei revo avɨye katu ko yande rɨvrɨ Epafrodito, amboyevɨra pe pɨri a'e pembou va'e che pɨtɨ̇vɨï agwä mba'e cheu ipane va'e rese, a'e che ndugwer oporavɨkɨ pirätä va'e Tüpä upe.

²⁶ A'e pe repia pota ite opakatu, iyavei ndasesarai ete pesui esepia peikwapa ite imba'easɨse oiko.

²⁷ Supiete imba'easɨ oiko, seni ete omano viña; ipare rumo Tüpä oiparaɨsuereko, nda'ei a'e gweraño oipɨtɨ̇vɨï, che avei che paraɨsuereko ko vɨ'are'ɨ̇sa yeapɨ-apɨño e'ɨ̇ agwä cheu.

²⁸ Sese che amondo pota poyava pe pɨri, pe yembovɨ'a iri agwä sese, che mbovɨ'a iri agwä avei.

²⁹ Peipɨsɨ tuprɨ peü iyepotase pe vɨ'aretesa pɨpe, esepia a'e yande rɨvrɨ yande Yar rese sekoi va'e, pesaɨsu itera evokoi nungar ava yepi,

³⁰ yande Yar Cristo rese oporavɨkɨse che pɨri seni omano. A'e ni'ä oyemondo mba'e-mba'e tëi porara agwä che pɨtɨ̇vɨï pɨpe, esepia pe ndapeikatui che pɨtɨ̇vɨï peye.