Filipenses 1 - Tüpä Ñe'ëngagwer

Pablo ma'endu'asa Jesús reroyasar Filipos pendar upe

¹ Che Pablo iyavei Timoteo oroiko Cristo Jesús rembigwai, aikwachia ko che ñe'ë peü, pe Tüpä upendar Cristo Jesús rese peiko va'e tekwa Filipos ve, Cristo Jesús reroyasar rärösar upe, seroyasar rese i'añeko va'e upe avei.

² Yande Ru Tüpä, yande Yar Jesucristo taperovasa pe reko tuprɨ agwä.

Pablo yeruresa Jesús reroyasar rese

³ Pe rese che ma'endu'asa pɨpe, avɨye ndeu a'e Tüpä upe yepi;

⁴ iyavei che ayerurese, arɨ rupi ayerure opakatu pe rese Tüpä upe che vɨ'aretesa pɨpe yepi;

⁵ esepia che pɨtɨ̇vɨï ete peye Jesucristo ñe'ësa ikatuprɨ va'e mombe'usa rese, yɨpɨsuive ite egwë peye, kurïtëi peikove.

⁶ Che aikwa ko Tüpä omboɨpɨ mba'e avɨye va'e gwemimbotar apo pe rese, a'e omboavɨye tuprɨ itera akoi arɨ pɨpe oyevɨse yande Yar Jesucristo.

⁷ Avɨye ite aipo rupi che pɨ'añemoñeta areko opakatu pe rese, esepia che opoaɨsu ite, opakatu ni'ä oyoya yaipɨsɨ Tüpä porovasasa yepe ko che rokendasave aï, anise kokotɨ rupi aiko mborerekwar rovai ko ñe'ësa pɨsɨrösa resendar repɨ agwä iyavei amboyekwa va'erä ñe'ësa supi tuprɨ va'e yuvɨreko chupe.

⁸ Tüpä oikwa ite che opoaɨsu eteprɨse opakatu pe rereko, esepia Cristo Jesús ni'ä pe raɨsu uka cheu.

⁹ Che aporandu vɨte Tüpä upe che yeruresa pɨpe, toikwa tuprɨ oarakwasa pɨpe oyeaɨsu katu-katu iri agwä yuvɨreko a'e peü,

¹⁰ ipɨpe sui peikwara mba'e avɨye katu va'e poravo agwä yepi. Egwë peye aveira pe rekokwer moatɨrö agwä peiko, evokoiyase ndipoi chira angaipa pe rese akoi Jesucristo ouse kuri,

¹¹ perekora pe rekokwer avɨye va'e ite Jesucristo ombou va'e peü Tüpä mboetei agwä.

Jesús ñe'ë reroyasar seta pota ite

¹² Che rɨvrɨ eta, aipota peikwara ko mba'e tëi oyapo va'e yuvɨreko cheu, a'e ichui seta katu ava osendura Jesucristo resendar ñe'ësa yuvɨreko.

¹³ Evokoiyase opakatu mborerekwar gwasu poravɨkɨsa pendar iyavei opakatu ambuae ava oikwapa che rokendasa Cristo rupi che gwata sui tëi yuvɨreko.

¹⁴ Iyavei che aikose poroekendasave, a'ese seta eteprɨ yande rɨvrɨ che repiase oyemongere'ɨ̇ katu Tüpä ñe'ëngagwer mombe'u agwä osɨkɨye e'ɨ̇sa pɨpe, oyeroya katu avei yande Yar rese yuvɨreko.

¹⁵ Supiete oime ava oñe'ë anga'u tëi va'e Cristo rese seroɨrösa pɨpe tëi, ambuae rumo oñe'ë tuprɨ opɨ'a ñemoñeta katuprɨsa pɨpe yuvɨreko sese.

¹⁶ Oime ava oñe'ë tuprɨ Cristo rese oporoaɨsusa pɨpe, a'e oikwa Tüpä che mbouse ko'ave che rokendase yuvɨreko ko ñe'ësa poropɨsɨrösa resendar sui;

¹⁷ ambuae ava rumo oñe'ë anga'u tëi yuvɨreko oyeupe narä mba'e potaraisa pɨpe, iyavei ndoyuvɨnochi ete, ipɨpe sui che reko momarä pota katu ite ko che rokendasave yuvɨreko.

¹⁸ ¿Marä etemo che areko aipo mba'e-mba'e tëi viña? Yepe amove ava ipɨ'a ñemoñetarai va'e yuvɨreko, opakatu rumo ñe'ësa Cristo rese; a'e ni'ä che mbovɨ'arete ñoite. Iyavei ayembovɨ'a katu ite ipɨpe,

¹⁹ esepia che aikwa ko opakatu mba'e-mba'e tëi sui añepɨsɨröra pe yeruresa pɨpe iyavei che pɨtɨ̇vɨïra Jesucristo Espíritu.

²⁰ Supiete asäro che ñemovɨräkwäsa pɨpe Tüpä, ndache mondoi e'ɨ̇ agwä ñemochisa pɨpe, a'e rumo oyemboyekwara opakatu ava rovake che rese Cristo pirätäsa, aikove vɨtese anise amanose avei.

²¹ Esepia, Cristo che rekovesa ite sekoi, amanose rumo, avɨyeño itera cheu.

²² Aikove vɨtese ko ɨvɨ pɨpe, aikatura aporavɨkɨ tuprɨ yande Yar rekokwer rese, evokoiyase ndaikwai uma revo avɨyera cheu.

²³ Ndaikatui ko ñuvɨrïo che pɨ'a ñemoñetasa rereko: amove amano pota che so agwä ɨvave Cristo pɨri, a'e avɨye katura cheu viña;

²⁴ peü narä rumo avɨye katu aikove vɨtese ko ɨvɨ pɨpe.

²⁵ Sese che aikwa aikove vɨte va'erä pe pɨtɨ̇vɨï agwä, pe gwata tuprɨ agwä pe vɨ'arete katu agwä avei Jesús reroyasa pɨpe.

²⁶ Egwë peyera che rereko peye pe pa'üve, iyavei a'ese opoeko mboɨvatera Cristo Jesús mboeteisa pɨpe vichiko.

Yaikora Jesús ñe'ëngagwer rupi

²⁷ Ko katu toyoya tuprɨ: pe rekokwer ko ñe'ësa avɨye va'e Jesucristo rese. Evokoiyase asose pe repia, anise amombrɨ aikose pe sui, asendu pota pe resendar ñe'ësa avɨye va'e, pe yemovɨräkwäsa resendar, pe pɨ'a ñemoñetasa yoyasa resendar iyavei pe poravɨkɨ pirätäsa resendar pe poreroyasave ko ñe'ësa poropɨsɨrösa rese,

²⁸ iyavei ndapeyembosɨkɨyei chira pe amotare'ɨ̇mbar sui. Evokoiyase a'e oikwara yuvɨreko chupe ite Tüpä omondora imokañɨ agwä, pe rumo peipɨsɨra poropɨsɨrösa Tüpä sui kuri.

²⁹ Supiete nda'ei Cristo rekokwer reroya agwä gweraño Tüpä oipota peü. Sese peyemombaraɨsu agwä avei oipota.

³⁰ Esepia oyoya tuprɨ yaporavɨkɨ pirätä yande amotare'ɨ̇mbar pa'üve yaiko. Peikwa avei yɨpɨndar che aporavɨkɨse, iyavei kurïtëi peyandu marä a'e aporavɨkɨ pirätä vɨte ipa'üve yuvɨreko.