Filemón 1 - Tüpä Ñe'ëngagwer

Pablo ma'endu'asa Filemón upe

¹ Che Pablo, sokendasa Cristo Jesús rekokwer sui tëi, iyavei Timoteo rɨvrɨ reseve amondo ndeu Filemón ore avɨravesa, ore rembiaɨsu opakatu ore poravɨkɨsa rupi ore pɨtɨ̇vɨï va'e yepi,

² iyavei Jesús reroyasar toñemonu'ä nde rëtä pɨpe yuvɨreko, inungar yande reindrɨ Apia, Arquipo upe avei, yande ndugwer pɨtɨ̇vɨïsar.

³ Yande Ru Tüpä iyavei yande Yar Jesucristo tombou oporovasasa gweko tuprɨsa peü.

Pablo oyerure Filemón rese

⁴ Che ni'ä avɨye ndeu a'e yande Ru Tüpä upe che yeruresa pɨpe nde rese yepi,

⁵ esepia ni'ä aipɨsɨ ite ñe'ësa yeaɨsusa iyavei poreroyasa yande Yar Jesús rese pereko va'e opakatu ava ndaseko maräi va'e rese avei.

⁶ Iyavei aporandu Tüpä upe nde rese ereyeroyase yande Yar rese, inungar ore orovɨroya a'e ndererasora mba'e avɨye va'e apo agwä ore rupi yande Yar Cristo raɨsupave yepi.

⁷ Cherorɨvete ayemongere'ɨ̇ katu avei nde poroaɨsusa rese, nde evokoiyase che rɨvrɨ, eremongere'ɨ̇ katu ava pɨ'a ñemoñetasa avɨye va'e ko tekwa pɨpe yuvɨreko.

Pablo oporandu mba'e avɨye va'e rese Onésimo upe narä

⁸ Evokoiyase, areko ite Cristo rer pɨpe nde kwai agwä viña,

⁹ che aporandu potaño nde poroaɨsusa rese ndeu. Che Pablo, akwakwa ite, kurïtëi rumo aiko sokendaprɨ Jesucristo rer pɨpe sui,

¹⁰ aporandu pota mba'e avɨye va'e rese ndeu Onésimo upe narä, esepia a'e inungar che ra'ɨrɨ ite sekoi iyavei che amombe'u chupe ñe'ësa avɨye va'e ko'ave che rokendasave.

¹¹ Araka'e aipo, Onésimo sekoi ndeu mbigwai naporäi va'e, kurïtëi rumo egwë nde'i chira oiko ndeu iyavei cheu no.

¹² Che amboyevɨ imondo ndeu: evokoi che ra'ɨrɨ che rembiaisu.

¹³ Che aipota opɨta va'erä ko'ave che pɨri, nde nungar tuprɨ che pɨtɨ̇vɨï agwä viña, ko sokendaprɨ vɨte che rekose Jesucristo ñe'ëngagwer sui tëi.

¹⁴ Che rumo ndaipotai mba'e apo nde pɨ'a ñemoñetasa kwae'ɨ̇ vɨteseve, nde rumo ereyapora ko mba'e avɨye va'e cheu nda'ei chira nde remimbotar tëi nde kere'ɨ̇ gwer rupi ete.

¹⁵ Avɨyeteramo Onésimo oyepepɨ raimi tëi ndesui kurïtëi rumo ererekora arɨ rupi nde yese,

¹⁶ nda'e iri chira mbigwai tëi, a'e rumo avɨye katu itera mbigwai gweko agwer sui: inungar yande rɨvrɨ yande rembiaisu. Che asaɨsu eteprɨ, nde rumo eresaɨsu katura itera, anichira rumo inungar ava tëi iyavei inungar yande rɨvrɨ yande Yar upe narä.

¹⁷ Che rerekose, nde rɨvrɨ nungar eve nde pɨ'a ñemoñetasa pɨpe, eipɨsɨ katu inungar che itera viña.

¹⁸ Oyapose mba'e naporäi va'e akoi vɨnosese mba'e ndesui, cheu eporandu mba'e vɨnose va'e rese amboepɨ va'erä ndeu, anise vɨrokwase mba'e ndesui, cheu emombe'u. Che evokoiyase amboepɨra ndeu.

¹⁹ Che Pablo, aikwachia che po pɨpe ite seroya tuprɨ agwä: Che amboepɨra ndeu. Namombe'u potai rumo mba'e erenose va'e resendar ndeu, esepia nde kurïtëi erepɨta itera che povrɨve narä.

²⁰ Supiete, che rɨvrɨ, eyapomi mba'e ikatuprɨ va'e cheu yande Yar rer pɨpe; che movɨ'ami tëi eve che pɨ'a pɨpe inungar yande rɨke'ɨrɨ Cristo.

²¹ Che aikwachia ndeu esepia ereyapo tuprɨra, iyavei aikwa tuprɨra mba'e aporandu va'e rese ndeu.

²² Iyavei aporandu ndeu eremoigätu va'erä oɨ che pɨtu'u agwä; esepia Tüpä osendura pe yeruresa, asë va'erä che rokendasa sui aso agwä perepia.

Ma'endu'asa ipa va'e

²³ Epafras avɨravesa, che ndugwer sokendaprɨ sekoi va'e yande Yar Jesucristo rekokwer sui,

²⁴ iyavei Marcos, Aristarco, Demas, Lucas, che pɨtɨ̇vɨï va'e mboravɨkɨ rese yuvɨreko.

²⁵ Yande Yar Jesucristo tomondo oporovasasa perese apɨre'ɨ̇ va'erä yepi.