Efesios 6 - Tüpä Ñe'ëngagwer

Mbɨa chi'ïvä'e omboeteira oyesupa yande Yar rer pɨpe yuvɨreko

¹ Chi'ïvä'e, pemboyeroya pe yesupa, pe sɨ avei yande Yar raɨsu pɨpe, esepia a'e ni'ä pe kwaita.

² Ko porokwaita yɨpɨndar omombe'u va'e porovasasa pɨsɨ agwä imboavɨyesa pɨpe aipo e'i: “Pemboeteira pe ru, pe sɨ avei,

³ egwë peyese, pe rorɨvetera iyavei pe reko pa'ümbuku katura ko ɨvɨ pɨpe.”

⁴ Iyavei pe iyesupa, pemoñemoɨrö ukai rene pe ra'ɨrɨ, iyakatu rumo pemboakwa imboarakwasa tuprɨ pɨpe, imbo'esave avei yande Yar upe saɨsusa pɨpe.

Mbigwai iyavei mba'e yar

⁵ Pe aveino mbigwai, pemboyeroya katura pe rerekwar ko ɨvɨ pɨpe imboeteisave. Ichui pe sɨkɨyepave avei mba'e tuprɨ pɨpe mba'e peyapora inungar Cristo upe ite mba'e peyapo va'erä viña.

⁶ Peporavɨkɨ tuprɨ katu chupe narä, nda'ei chira rumo pe repiaseño imbovɨ'a agwä tëi, peporavɨkɨra rumo pe kere'ɨ̇sa pɨpe Cristo rembigwai pe rekosa pɨpe, peyapora opakatu mba'e Tüpä remimbotar rupi ete.

⁷ Peporavɨkɨra pe rorɨvetesa pɨpe, inungar yande Yar upe peyapo mba'e, nda'ei chira ava upe tëi.

⁸ Esepia peikwa Tüpä omboepɨra opakatu yandeu yayapose mba'e avɨye va'e mbigwai yaikose, anise nda'ei va'e mbigwai avei.

⁹ Iyavei pe serekwar, peiko tuprɨ aveira pe rembigwai upe pe rekoasɨ e'ɨ̇sa pɨpe. Peikwa ni'ä opakatu Tüpä pe rerekwar ɨvave chini va'e povrɨve peikose, a'e ndayande raɨsu yoavɨratɨi yande rereko.

Cristo reroyasa pɨpe ava vɨreko oyoepɨsa yuvɨreko

¹⁰ Sese peyemovɨräkwä katu yande Yar rese, ipirätäsa rese avei.

¹¹ Peñearö tuprɨ katu Tüpä pirätäsa pɨpe pe yemovɨräkwä agwä Karugwar pe mbopa tëi e'ɨ̇ agwä.

¹² Esepia yande nda'ei ava amotare'ɨ̇save yayepɨ'amovɨräkwä, yande rumo yayepɨ'amovɨräkwä espíritu naporäi va'e ndoyekwai va'e upe iyavei ko ɨvɨ pɨpendar Karugwar ipirätä va'e pɨ̇tümimbisa pendar reroya e'ɨ̇ agwä.

¹³ Sese, peipɨsɨ opakatu mba'e Tüpä ombou va'e peü pe yoepɨ agwä, evokoiyase yepe oime tëira mba'e tëi peü viña, peyemovɨräkwäño itera rumo chupe.

¹⁴ Egwë peye aveira peyemovɨräkwä katu ñe'ësa supi tuprɨ va'e pɨpe, iyavei peyoepɨra pe reko ɨ̇vi tuprɨsa pɨpe.

¹⁵ Peyemoigätu voi Tüpä ñe'ëngagwer ñeröisa resendar mombe'u agwä yepi.

¹⁶ Iyavei pereko katu Tüpä rese pe yeroyasa peyese, a'e inungar sundao yoepɨsa, ipɨpe peyoepɨra karugwar u'u tata resendar nungar pe ätoisa sui.

¹⁷ Poropɨsɨrösa inungar sundao akä ndɨru, ipɨpe tapeyoepɨ; peiporu avei Tüpä ñe'ëngagwer a'e ni'ä inungar kɨse puku Espíritu vɨreko va'e.

¹⁸ Peyerure katu: Espíritu pirätäsa pɨpe arɨ yakatu rupi Tüpä upe opakatu yeruresa pɨpe. Pema'emo'ä katuño pe yeruresa pɨpe, peyerureño avei opakatu ava Tüpä reroyasar rese yepi.

¹⁹ Peyerure avei che rese, evokoiyase Tüpä tombou che ñe'ë agwä cheu, che sɨkɨye e'ɨ̇sa pɨpe ñe'ësa ñepɨsɨrösa Tüpä suindar ikwapɨ ramo va'e kwa uka agwä ava eta upe.

²⁰ Tüpä ni'ä che kwai ko ñe'ësa mombe'u agwä ichui tëi kurïtëi sokendaprɨ aiko, peyerure katu che rese che sɨkɨye e'ɨ̇sa pɨpe ko ñe'ësa mombe'u agwä.

Ñe'ësa ipa va'e

²¹ Yande rɨvrɨ Tíquico, yande rembiaɨsu, che pɨtɨ̇vɨïsar omboavɨye va'e okwaita yande Yar upe mboravɨkɨsa rese, a'e omombe'ura opakatu che rekokwer mba'e che rembiapo avei peü.

²² Sese amondo eipeve peü ore rekokwer mombe'u agwä ipɨpe toyemongere'ɨ̇ katu yuvɨreko viya.

²³ Yande Ru Tüpä iyavei yande Yar Jesucristo tomondo opakatu vɨroyasar upe teko katuprɨsa, iporoaɨsu agwä, oyese yeroya agwä avei;

²⁴ Tüpä tosovasa opakatu yande Yar Jesucristo raɨsupar, saɨsusa ñepëi reseve va'e pɨpe.