Efesios 2 - Tüpä Ñe'ëngagwer

Tüpä yande pɨsɨrö Cristo mano agwer pɨpe

¹ Pe rumo yɨpɨndar peiko omano va'e nungar ite mba'e-mba'e tëi aposa pɨpe peyemboangaipasa pɨpe avei.

² Ko ɨvɨ pɨpendar pɨ'a ñemoñetasa rupi tëi peiko iyavei ɨvate rupindar karugwar rerekwar porokwaita tëi avei peroya, a'e Tüpä reroyasare'ɨ̇ ombo'e va'e oiko.

³ Yɨpɨndar opakatu yande avei yagwata, yande remimbotar rupi tëi yande rekokwerai pɨpe, yande pi'añemoñeta raisa rupi tëi avei yayapo mba'e. Sese Tüpä ñemoɨrösa yaipɨsɨra opakatu ambuae ava rupive avei.

⁴ Tüpä rumo yande paraɨsuereko ite, yande raɨsu eteprɨ avei,

⁵ yepe angaipa pɨpe yaiko omano va'e nungar viña, a'e rumo ombou Gwa'ɨrɨ yande rekove agwä. A'e oporovasasa pɨpe yande pɨsɨrö.

⁶ Iyavei Cristo Jesús reroya pɨpe yande mbogwerayevɨ iri ete, yande mbogwapɨ avei supive ɨvave.

⁷ Ko oyapo opakatu imboyekwa pɨrä kuri katu narä, iporovasasa iporoaɨsusa avei tuvicha va'e yandeu Cristo Jesús rese yeroya agwä.

⁸ Esepia Tüpä oporovasasa pɨpe pe pɨsɨrö Jesús rese peyeroyase. Nda'ei rumo pe rekokwer sui tëi peñepɨsɨrö, Tüpä ni'ä ombou oporerekosa peü.

⁹ Nda'ei avei ava rembiapo sui tëi ou va'e, evokoiyase ndiyai chira yayemboɨvateai ipɨpe;

¹⁰ Tüpä ni'ä yande rekokwer mo'ɨ̇vi; a'e yande apo Cristo Jesús rese yande reko agwä, mba'e ikatuprɨ va'e apo agwä avei.

Cristo ombou yande reko tuprɨ agwä

¹¹ Supiete, pe nda'ei va'e judío peiko, “nimbocircuncidaiprɨ” e'i judío eta yuvɨreko peü (ombocircuncida va'e kuimba'e setekwer rese yuvɨreko, egwë e'i gwerer mondo “imbocircuncidaprɨ” yaiko e'i ete yuvɨreko),

¹² peyemoma'endu'a yɨpɨndar Cristo ndapereko vɨteise peyese, a'ese ipe'aprɨ peiko Israel tekwa gwasu sui, iyavei ndaperekoi ete Tüpä remimombe'ugwer peyese. Pe ɨvɨ pɨpe ndaperekoi ete peporoarösa iyavei ndaperekoi ete Tüpä.

¹³ Kurïtëi rumo Cristo Jesús rese ite peiko, a'e ni'ä oipɨyere vuvɨ pe repɨrä, esepia yɨpɨndar amombrɨ peiko Tüpä sui, kurïtëi rumo namombrɨi ete peiko ichui.

¹⁴ Cristo ni'ä sekoi teko tuprɨsa yandeu. Esepia a'e yande mboyese'a judío, nda'ei va'e judío ñepëi va'e nungar yande yeamotare'ɨ̇ iri agwä oyeupe, yande ñemoɨrösa ni'ä opa omokañɨ yandesui gwetekwer mondosa pɨpe.

¹⁵ Omomba opakatu Moisés porokwaita, a'e oipota ñepëi ava nungar teko pɨasu pɨpe yande reko agwä, judío iyavei nda'ei va'e judío. Egwë e'i imokañɨpa yande yeamotare'ɨ̇sa yandesui yande reko tuprɨ agwä.

¹⁶ Evokoiyase a'e ae omanose kurusu rese, ombou yandeu yandeyeupe ñerö agwä judío, nda'ei va'e judío ñepëi ava nungar Tüpä rupi yande reko agwä.

¹⁷ Cristo ou omombe'u ko tekokwer pɨasu peü pe amombrɨ Tüpä sui peiko va'e, omombe'u avei namombrɨi yuvɨrekoi va'e upe.

¹⁸ Esepia Cristo rembiapo pɨpe sui ni'ä oyoya yande judío iyavei nda'ei va'e judío yaiko va'e yayemboya va'erä Tüpä rese Espíritu ñepëi va'e pɨpe.

¹⁹ Sese, pe nda'e iri ambuae ɨvɨ pendar peiko, ndapeiko iri avei kokotɨ tëi pe ɨvɨ sui, kurïtëi rumo peiko Tüpä rese inungar ambuae yuvɨreko, iyavei oñemu gwasu ite yaiko Tüpä rese.

²⁰ Pe inungar tüpäro maräne'ɨ̇ imopü'ambrɨ i'ɨvɨpɨrä arɨ pendar peiko; Jesús ñe'ë mombe'usar iyavei Tüpä ñe'ë mombe'usar evokoiyase inungar i'ɨvɨpɨ yuvɨrekoi tüpäro movɨräkwä agwä Jesucristo rumo inungar ita yɨpɨndar va'e imo'ɨ̇visa yandeu.

²¹ Ichui Cristo opa yande mboyese'a oyese, inungar oɨ imopü'ambrɨ oyeupi katu-katu iri va'e tüpärogwä, egwë ya'e ipe'aprɨ yaiko yande Yar upe narä sese ite yande reko agwä.

²² Egwë peye aveira ni'ä Cristo rese peikose opakatu tuprɨ peyemboyoyase ñepëi reve inungar tüpäro, ipɨpe Tüpä Espíritu sekoira.