Apocalipsis 16 - Tüpä Ñe'ëngagwer

¹ Evokoiyase asendu ñe'ësa ipirätä va'e osë va'e Tüpä rëtä pɨpe sui, aipo e'i ñuvɨrïo ova mbigwai ɨva pendareta upe: “Peso, tapeipɨyerepa ɨvɨ arɨ rupi evokoi ñuvɨrïo ova tuprɨ ɨgwa rɨru pɨpendar Tüpä ñemoɨrösa.”

Ñuvɨrïo ova tuprɨ ɨgwa rɨru Tüpä ñemoɨrösa resendar

² Yɨpɨndar va'e mbigwai ɨva pendar opa oipɨyere ɨgwa rɨru pɨpendar ɨvɨ arɨ rupi; evokoi opakatu ava vɨreko va'e mba'e ɨpɨ vai rer oyese sa'anga mboeteisar tëi avei, a'e chupe oime mba'e rasɨ vai tasɨ va'e sete rese.

³ Imoñuvɨrïosa mbigwai ɨva pendar opa oipɨyere ɨgwa rɨru pɨpendar paragwasu pɨpe, evokoiyase ɨ paragwasu pɨpendar oyeapo tuvɨ nungar, ava yukaprɨ ruvɨ nungar, ichui opakatu tuprɨ yuvɨromano paragwasu pɨpe yuvɨrekove va'e.

⁴ Imombosapɨsa mbigwai ɨva pendar opa oipɨyere ɨgwa rɨru pɨpendar ɨai pɨpe, ɨ o'ë va'e pɨpe aveino, ipare opa oyeapo tuvɨ nungar.

⁵ Ko pare asendu mbigwai ɨva pendar ɨ rese i'añeko va'e ñe'ësa aipo e'i: “Nde seko tuprɨ va'e ite ereiko evokoi ava upe erembouse nde ñemoɨrösa, che Yar Tüpä, seko maräne'ɨ̇ va'e, nde yɨpɨsuivendar ite ereiko,

⁶ esepia a'e opa oyuka ava yuvɨreko nde rekwa maräne'ɨ̇ pendar nde ñe'ë mombe'usar avei, kurïtëi rumo eremboɨ'u uka tuvɨ pɨpe. ¡Evokoi nungar upe avɨyesa rupi ete!”

⁷ Asendu avei ambuae ñe'ësa mba'e reropove'ësa renda sui aipo e'i va'e: “Supiete, che Yar Tüpä, opakatu mba'e mboavaisare'ɨ̇, nde porandusa ava rembiapokwer rese supi tuprɨ va'e ite, seko ɨ̇vi va'e avei.”

⁸ Imoirugätusa mbigwai ɨva pendar, opa oipɨyere ɨgwa rɨru pɨpendar arɨ rese, ipare arɨ upe imondosa pirätäsa ava rapɨpa agwä.

⁹ Ipare opakatu ite ava yuvɨrokaipa tuprɨ; ndoyevɨi ete rumo Tüpä upe iyavei nomboetei ete yuvɨreko. Egwë e'i iñe'ë marä-marä tëiño mba'erasɨ rerekose Tüpä upe yuvɨreko.

¹⁰ Imbopoyandeposa mbigwai ɨva pendar oipɨyere ɨgwa rɨru pɨpendar mba'e ɨpɨ vai renda rese, a'ese avɨyeteramo tëi serekwar ipovrɨ pendar avei pɨ̇tümimbisave yuvɨrekoi. Ava evokoiyase oñeapëkusu'u-su'u tëi yuvɨreko mba'e rasɨkwer pa'üve;

¹¹ ndopoiño ite rumo mba'e-mba'e tëi aposa sui yuvɨreko, a'e rumo iñe'ë marä-marä tëiño Tüpä ɨva pendar upe oyeupe mba'e tasɨ va'e pa'üve yuvɨreko.

¹² Imoñepëi ovasa mbigwai ɨva pendar oipɨyere ɨgwa rɨru pɨpendar ɨai gwasu Éufrates pɨpe, evokoiyase a'e ɨ'ai opa ipiru supi osasa va'erä mborerekwareta ɨvate katu va'e yugweru va'e añi'ïvëi kotɨ sui.

¹³ Ipare asepia mba'e ɨpɨ oporomokañɨ va'e yuru, mba'e ɨpɨ vai yuru avei, nda'ei va'e Tüpä ñe'ë mombe'usar yuru, a'e iyuru rupi yuvɨnosë mbosapɨ karugwar vɨreke nungar.

¹⁴ Ko karugwar suindar yuvɨrekoi, a'e oyapo poromondɨisa mba'e mboyekwasa yuvɨreko, ipare opa yuvɨnosë opakatu ɨvɨ rupi mborerekwareta ɨvate katu va'e monu'ä agwä vavasave narä, akoi arɨ kañɨ pɨpe Tüpä mba'e mboavaisare'ɨ̇ amotare'ɨ̇save.

¹⁵ “Peyapɨsaka tuprɨ che ñe'ë rese, che avɨyeteramo tëi ayura imondarai va'e nungar kuri. Sorɨvetera akoi ava ima'emo'ä va'e oyemonde tuprɨ va'e gwembiapo avɨye va'e pɨpe, a'ese nochi chietera oiko che sui.”

¹⁶ Ipare opa omonu'ä mborerekwareta ɨvate katu va'e hebreo ñe'ë pɨpe serer Harmagedón ve.

¹⁷ Evokoiyase imoñuvɨrïo ovasa mbigwai ɨva pendar oipɨyere ɨgwa rɨru ɨvɨtu rupi, ipare ɨva pendar Tüpä rëtä pɨpe sui osë ñe'ësa ipirätä va'e ou va'e senda sui ipare aipo e'i: “¡Opa ite yaposa imombe'uprɨ!”

¹⁸ A'ese oime overa-vera va'e, mba'e sɨapu gwasu va'e iyavei osunu va'e, ipare ɨvɨ orɨrɨi ipirätä katu va'e opakatu ɨvɨ rɨrɨi sui ava yuvɨrekove vɨteseve ɨvɨ pɨpe.

¹⁹ Tekwa gwasu opa oyemombɨte-mbɨte mbosapɨ rupi, opakatu tekwa evokoiyase opa onduru ɨvɨ pɨpendar, ipare Tüpä oyemoma'endu'a evokoi tekwa gwasu Babilonia pendar rembiapoai rese, evokoiyase omondo oñemoɨrösa ipirätä katu va'e chupe.

²⁰ Opakatu ka'a pa'ü, ɨvɨtrɨ avei okañɨpa yuvɨreko,

²¹ iyavei ɨva sui yuvɨrovɨapi amanda gwasu ava arɨve, a'e iposɨigwer cuarenta sa'ämbrɨ rupindar rutei, ava rumo iñe'ë marä-marä tëiño vɨte ite Tüpä upe yuvɨreko amanda sui tëi, esepia ni'ä evokoi Tüpä poronupasa ɨvate katu va'e.