2 Timoteo 2 - Tüpä Ñe'ëngagwer

Yaikora paraisusa pɨpe

¹ Iyavei nde no, che ra'ɨrɨ, eyemovɨräkwä mba'ekwasa Tüpä ombou va'e rese Cristo Jesús rupi ndeu.

² Akoi che porombo'esa eresendu va'e ava re'ɨi rovake amondo va'e ndeu, embo'e tuprɨ mbɨa oyeroya va'e, oikatu va'e avei ambuae mbo'e agwä oiko.

³ Nde eyemovɨräkwäño teko asɨ upe Jesucristo upe narä inungar sundao oyemovɨräkwä va'e yepi.

⁴ Ñepëi yepe sundao ndosɨrɨi ete okwaita sui, esepia a'e oyemoigätu voi ete okwai agwä gwerekwar upe.

⁵ Iyavei igwayɨ va'e, ndoipɨsɨi chira porerekosa ogwayɨ tuprɨ e'ɨ̇ pɨpe.

⁶ Iyavei oporavɨkɨ va'e mba'e tɨ̇sa rese, a'e rane omonu'ära gwemitɨ̇ yavɨyese oyeupe narä.

⁷ Eyapɨsaka tuprɨ ko che ñe'ë rese, yande Yar ni'ä osendukwa uka tuprɨra opakatu ko mba'e ndeu.

⁸ Iyavei nde ma'endu'ara Jesucristo rese, a'e ni'ä okwerayevɨ va'e, iyavei araka'endar mborerekwar David suindar sekoi, ko ni'ä ñe'ësa ñepɨsɨrösa resendar amombe'u va'e vichiko.

⁹ Ko ñe'ësa avɨye va'e mombe'usa sui tëi che mombaraɨsu yuvɨreko, che rokendasave avɨye oporapichi va'e che rereko yuvɨreko; Tüpä ñe'ëngagwer mombɨta rumo ndoikatui ete yuvɨreko.

¹⁰ Sese che añemosaño opakatu mba'e-mba'e tëi upe opakatu Tüpä rembiporavo rekokwer avɨye agwä rese, tovɨreko katu pɨsɨrösa porañete apɨre'ɨ̇ va'e Jesucristo rese yuvɨreko che yapave.

¹¹ Ko ni'ä supi tuprɨ va'e: Yamanose Cristo rese, a'ese yaikove aveira sese;

¹² yañemosase mba'e tëi upe, a'ese yande yaikora imborerekwasave ipɨri; ndaikwai Jesucristo ya'ese, a'e avei ndopokwai va'e e'iñora yandeu;

¹³ yepe kokotɨ tëi yarovara yande rekokwer seroya e'ɨ̇save, a'e rumo ndovɨrovai chietera gweko ɨ̇visa, esepia ndoikatui, nda'ei che a'e aiko e'i va'erä.

Timoteo osë tuprɨ tekoa'äsa sui

¹⁴ Emoma'endu'a yuvɨreko ko ñe'ësa rese, iyavei eyokwai Tüpä rovake topoi ñe'ëpoepɨ-epɨsa sui yuvɨreko. Ko ñe'ëpoepɨ-epɨsa egwë e'i tëi va'e. Esepia omomarä ambuae ava osenduse iñe'ë rai yuvɨreko.

¹⁵ Eyapo tuprɨ mba'e opakatu nde katugwer rupi nde rekokwer mboyekwa agwä Tüpä rovai inungar oporavɨkɨ tuprɨ va'e nochi ete va'e, egwë ere, eporombo'e tuprɨ ñe'ësa supiete va'e rese.

¹⁶ Eyepepɨ ñe'ësa naporäi va'e sui egwë e'i tëi va'e sui avei, esepia ko nungar ñe'ësa tëi ombouvicha katu mba'e naporäi va'e

¹⁷ iyavei iporombo'esa rai oyembouvicha inungar mba'erasɨ vai ndokwera katui va'e, oyembouvicha-vichaño yepi. Egwë e'i tuprɨ Himeneo iyavei Fileto,

¹⁸ oyavɨ porombo'esa supiete va'e, kwerayevɨsa ndipo iri chira e'i tëi, ipɨpe Jesús reroyasar oipɨ'añemoñeta rerova yuvɨreko.

¹⁹ Tüpä rumo omondo mba'e movɨräkwä tuprɨ agwä, sese ikwachiasa va'e pɨpe aipo e'i: “Yande Yar oikwa ite oyeupendar ava”, iyavei “Opakatu yande Yar rer vɨreko va'e, toyepepɨ mba'e naporäi va'e sui yuvɨreko yepi.”

²⁰ Oɨ gwasu pɨpe, nda'ei gwarepochi, oro apoprɨ gweraño oime, oime avei ɨvɨrape ñaɨ'u apoprɨ aveino, ñepëi iporupɨrä arɨ imboeteisa pɨpe narä, ambuae rumo arɨ rupi iporupɨrä.

²¹ Akoi ava oñemoatɨrö va'e ko tekokwerai sui yande Yar upe narä, a'e ipe'asa inungar ɨgwa rɨru oro apoprɨ poromboeteisa pɨpe iporupɨrä; a'e ava oyemoigätu voi ete oiko mba'e ikatuprɨ va'e apo agwä.

²² Eyepepɨ mbɨa chi'ïvä'e pɨ'añemoñeta raisa sui, emo'ɨ̇vi tuprɨño nde rekokwer sereko. Eyeroyaño Tüpä rese, esaɨsu katu avei ava eiko nde reko tuprɨ pɨpe, inungar yande Yar reroyasar oyapo opɨ'añemoñeta tuprɨsa pɨpe yuvɨreko.

²³ Eremboyeroyai rene ñe'ësa porandu-randu tëisa, egwë e'i tëi va'e; ereikwa ni'ä ichui tëi oime yeamotare'ɨ̇sa yepi.

²⁴ Iyavei yande Yar rese oporavɨkɨ va'e, ndiyai oyeekopɨ oñe'ë pɨpe yuvɨreko, iyakatu rumo avɨyera sekokwer opakatu upe, oporombo'e tuprɨra oñemosañora omba'e mboasɨ e'ɨ̇sa pɨpe oiko

²⁵ iyavei omboarakwara gwekoasɨ e'ɨ̇sa pɨpe akoi ava ndiporeroyai va'e, esepia avɨyeteramo Tüpä osekuñaröra ipɨ'añemoñeta raisa oyeupe yevɨ iri agwä, ipɨpe sui porombo'esa supiete va'e oikwara yuvɨreko.

²⁶ Ipɨpe sui avei toyemopoäse, toyuvɨnose karugwar povrɨ sui semimbotar apo iri e'ɨ̇ agwä.