2 Tesalonicenses 2 - Tüpä Ñe'ëngagwer

Yande Yar Jesús yevɨsa imombe'u tuprɨsa resendar

¹ Iyavei che rɨvrɨ eta, ore oromombe'u potami peü opakatu akoi yande Yar Jesucristo yevɨsa resendar yande monu'ä va'erä oyese

² peikwa katu, tapepɨ'añemoñeta rerova eme iyavei peyembosɨkɨyei rene akoi ava che añe'ë Espíritu pɨpe e'i va'e sui, anise ikwachiaprɨ sui, ñe'ësa pesendu va'e sui inungar-ra ore ñe'ësa ite viña oyepota arɨ Jesús yevɨsa e'i tëi va'e yuvɨreko peü.

³ Peikwa katu peyembopa ukai rene ñepëi yepe ava upe. Esepia yɨpɨndar arɨ Jesucristo yu agwä renonde, oura mba'e-mba'e tëi aposar a'e Tüpä amotare'ɨ̇sar sekoi va'e, a'ese oyemboyekwara ava yangaipa gwasu va'e, a'e okañɨ tëi va'erä ite.

⁴ Evokoi ava oyemboɨvate aira opakatu Tüpä rer rerekosar amotare'ɨ̇save iyavei ndoipotai chira ambuae mboetei, oike aveira ogwapɨ Tüpä rëtä pɨpe inungar-ra Tüpä ite viña, supiete che Tüpä aiko e'i tuprɨ tëira öi.

⁵ ¿Ndapema'endu'ai vo akoi che ñe'ëngagwer rese aiko vɨtese pe pa'üve?

⁶ Iyavei kurïtëi peikwa ite mba'e omombɨta vɨte ava ndipɨ'ai va'e, ndoyemboyekwa vɨtei va'e oiko.

⁷ Ko porokwaita amotare'ɨ̇sar ndoyemboyekwa vɨtei va'e rembiapo oime kurïtëi; ko gweraño ipane imombɨtasar renose agwä ipa'ü sui.

⁸ A'ese oyemboyekwara akoi ava ndipɨ'ai va'e, yande Yar Jesús rumo oyukara oñe'ë pɨpe, omokañɨ itera gwendɨgwer pirätäsa pɨpe oyevɨse kuri.

⁹ Evokoi ava ndipɨ'ai va'e, oura Karugwar pirätäsa pɨpe; gwerura gweko pirätäsa tuvicha va'e; omboyekwa anga'ura poromondɨisa nda'ei va'e supi.

¹⁰ Oyapora opakatu mba'e-mba'e tëi oporombopasa pɨpe ava okañɨ tëi va'erä upe, esepia evokoi ava ndosendu potai porombo'esa supiete va'e oñepɨsɨrö agwä yuvɨreko.

¹¹ Sese Tüpä oseyara ko porombopasa reroya agwä yuvɨreko chupe,

¹² ipɨpe tokañɨ tëi ko ava, opakatu mba'e supiete va'e reroya e'ɨ̇sar, akoi oyembovɨ'a katu va'e mba'e-mba'e tëi rese yuvɨreko oyapave.

Tüpä rese yeroyasa

¹³ Ore rumo, avɨye ndeu oro'eño ite Tüpä upe pe rekokwer rese yepi, che rɨvrɨ eta, yande Yar rembiaɨsu peiko va'e, esepia Tüpä ni'ä pe poravo yɨpɨsuive pe pɨsɨrö agwä pe reko maräne'ɨ̇ agwä rese Espíritu pɨpe iyavei porombo'esa supiete va'e reroya agwä.

¹⁴ Ko rese ni'ä Tüpä oñe'ë peü, ko ñe'ësa pɨsɨrösa resendar ore oromombe'u va'e rupi: tovɨreko che Ra'ɨrɨ Jesucristo reko porañetesa yuvɨreko oyapave.

¹⁵ Sese che rɨvrɨ eta, peyemovɨräkwä iyavei peresarai rene akoi ore pembo'e agwer sui, oroikwachia va'e sui avei peü.

¹⁶ Yande Yar Jesucristo teiete, yande Ru Tüpä avei, yande raɨsu yande rovasasa pɨpe ombou vɨ'asa apɨre'ɨ̇ va'e yandeu, iyavei yande reko tuprɨ rärö agwä iporoaɨsusa rese,

¹⁷ a'e tape mongere'ɨ̇, tape movɨräkwä avei opakatu ñe'ësa avɨye va'e rese, opakatu mba'e pe rembiapo avɨye va'erä rese avei.