2 San Pedro 3 - Tüpä Ñe'ëngagwer

Imoñuvɨrïosa yande Yar yevɨsa resendar

¹ Che rɨvrɨ eta, che rembiaɨsu, ko imoñuvɨrïosa rupi aikwachia che ñe'ë imondo peü. Ko ñuvɨrïo che rembikwachia pɨpe opombopɨ'añemoñeta tuprɨ pota che poromboarakwasa pɨpe.

² Peyemoma'endu'a araka'endar Tüpä ñe'ë mombe'usar seko katuprɨ va'e ñe'ëngagwer rese; yande Yar Poropɨsɨrösar porokwaita rese avei, akoi Jesús ñe'ë mombe'usar pe mbo'e va'ekwer rese yuvɨreko.

³ Peikwa ranera ko arɨ imombe'uprɨ ipa va'e vɨrovɨse: oimerä ava vɨroɨrö va'e ko tekokwer avɨye va'e Tüpä suindar gwemimbotarai pɨpe yuvɨreko,

⁴ oporandura yuvɨreko “¿Maräse vo aipo oyevɨra imombe'uprɨ yande Yar Cristo ou kuri? Esepia yande ramoi opa tëi omano yuvɨreko, kurïtëi opakatu a'e tuprɨño tëi tekokwer araka'e ɨvɨ apo suive.”

⁵ Evokoi ava ndoyemoma'endu'a potai yuvɨreko ko araka'endar rese, esepia Tüpä oyapo oñe'ë pɨpe ɨva, ɨvɨ avei, a'e ɨvɨ osë va'e ɨ sui, ɨ pa'üve avei sekoi.

⁶ Koiye ɨ pɨpe avei opa omokañɨ ɨvɨ, ombouse amarusu araka'e.

⁷ Kurïtëindar rumo ɨva, ɨvɨ imoigätuprɨ tata uve narä Tüpä porokwaita rupi. Evokoi tata pɨpe avei okañɨ tëira ava mba'e tëi aposar yuvɨrekoi va'e kuri.

⁸ Che rɨvrɨ eta, che rembiaɨsu, peresarai rene ko mba'e sui, yande Yar upe ñepëi arɨ inungar mil aravɨter, mil aravɨter evokoiyase inungar ñepëi arɨmi tëi chupe.

⁹ Esepia yande Yar ndiaraka'ei ete oñe'ë mboavɨye agwä, inungar amove ava, aipo e'i yuvɨreko viña, a'e rumo avɨye eteprɨ gweko mbegwesa pɨpe yandeu, esepia ndoipotai ñepëi yepe yande kañɨ tëi agwä; a'e rumo oipota opakatu tuprɨ ite yande rekokwer ñekuñarö agwä.

¹⁰ Yande Yar arɨ yande resapɨ'a tëira inungar imondarai va'e ou pɨ̇tü pɨpe yepi. A'ese ɨva okañɨ tuprɨ tëira vɨapugwer ipirätä va'e pɨpe kuri, opakatu mba'e yapoprɨ opara yuvɨrokai, ipɨpe sui ko ɨvɨ opakatu ipor reseve okañɨ tëietera.

¹¹ Opakatu ite ni'ä ko mba'e yapoprɨ okañɨ tëi va'erä sese, ¡peyemovɨräkwäño itera pe reko maräne'ɨ̇sa rese Tüpä rese pe pɨ'a ñemoñetasa pɨpe!

¹² Pesäröño Tüpä yepotasa resendar arɨ, iyavei peyapo opakatu peikatugwer rupi toyepota poyava voi pe yapave. A'e arɨ pɨpe ɨva opara okañɨ tëiete tata pɨpe, opakatu mba'e yapoprɨ tɨkupa tuprɨra kuri;

¹³ yande rumo yasärö ite ɨva, ɨvɨ ipɨasu va'e Tüpä remimombe'u, a'eve opakatu ava yuvɨrekoira gweko avɨyesa pɨpe.

¹⁴ Sese che rembiaɨsu, pesärö vɨteseve ko tekokwer, egwë peyera opakatu peikatugwer rupi pe reko tuprɨ agwä pe angaipa e'ɨ̇ pɨpe, peü Tüpä peyavɨ mba'e e'i e'ɨ̇ agwä.

¹⁵ Tapeikwa ko yande Yar seko mbegwe yandeu yande pɨsɨrö agwä. Egwë e'i avei yande rembiaɨsu Pablo ikwachia oyeupe Tüpä ombou va'e mba'ekwasa pɨpe peü.

¹⁶ Opakatu okwachiar pɨpe omombe'u evokoi nungar mba'e peü, yepe amove yavai sendukwa agwä yuvɨreko viña, sese amove ndoyemovɨräkwä tuprɨi va'e yande Yar rese iyavei ndoyemboarakwa tuprɨi va'e, a'e kokotɨ tëi vɨrova ñe'ësa, inungar oyapo ambuae ñe'ësa Ikwachiaprɨ Tüpä suindar rese, ipɨpe gwekokwer omokañɨ tëi a'e ae.

Ñe'ësa ipa va'e

¹⁷ Che rɨvrɨ, che rembiaɨsu, peikwa ite ni'ä evokoi mba'e, sese peñearö tuprɨra pe yembopa uka e'ɨ̇ agwä ava ndiporeroyai va'e upe Tüpä rese pe rekokwer yemovɨräkwäsa sui pe yepepɨ e'ɨ̇ agwä.

¹⁸ Peikwa tuprɨ katura rumo yande Yar Poropɨsɨrösar Jesucristo iyavei peikoveño itera iporovasasa pɨpe. ¡Egwë te'i imboeteiprɨ tasekoi kurïtëi apɨre'ɨ̇ va'erä! Amén.