2 San Pedro 2 - Tüpä Ñe'ëngagwer

Tüpä ñe'ëngagwer porombo'esa rese kokotɨ tëi va'e

¹ Yuvɨrekove rumo araka'e porombo'esar oporombopa tëi va'e Israel ɨvɨ rupi; oime aveira ni'ä pe pa'üve ko nungar oporombopa tëi va'e yuvɨreko. A'e ñemisa pɨpe oporombo'era kokotɨ tëi va'e ava reko momarä tëi agwä, evokoiya gweko pɨpe rumo ndoikwai yande Yar opɨsɨrösar; ko rumo gwekokwer momba pɨ'aivi agwä tëi egwë e'ira yuvɨreko.

² Seta ava ogwatara sekokwerai rupi, ipɨpe sui ambuae ava oñe'ërai tëira porombo'esa supi tuprɨ va'e rese yuvɨreko.

³ Gwarepochi potaraisa pɨpe pe mbopara yuvɨreko ko porombo'esa kokotɨ tëi va'e rese; kañɨsa rumo oimeño itera yuvɨreko chupe, yɨpɨsuive ite ni'ä a'e imokañɨpɨ̇ra yuvɨrekoi.

⁴ Esepia araka'e Tüpä niñeröi ete gwembigwai oyemboangaipa va'e upe, a'e opa ite omondo mba'e tëisave, egwë e'i seyapa pɨ̇tümimbisave inungar ñapɨ̇chimbrɨ karena pɨpe yapokatuprɨ yuvɨreko kañɨsave narä.

⁵ Iyavei Tüpä niñeröi ete ava araka'endar ɨvɨ pɨpe yuvɨrekoi va'e upe, a'e ombou amarusu ava ndasekoporäi va'e mokañɨpa agwä, Noé gweraño rumo oipɨsɨrö, esepia a'e ava ombo'e seko ɨ̇vi tuprɨ agwä rese, ipɨpe sui avei oipɨsɨrö ambuae ava ñuvɨrïo ova yuvɨrekoi va'e.

⁶ Iyavei Tüpä opa omokañɨ tata pɨpe tekwa Sodoma iyavei Gomorra, egwë e'i imbotanimbu tuprɨ, na'esa aveira ni'ä ambuae ava ndiporeroyai va'e rerekosa kuri.

⁷ Lot gweraño rumo oipɨsɨrö, esepia a'e mbɨa rekokwer avɨye va'e ite, ndoyembovɨ'ai tëi ambuae ava rekokwer mba'e-mba'e tëi yuvɨrekoi va'e repiase.

⁸ Ko mbɨa avɨye va'e sekoise a'e ava pa'üve, arɨ rupi tasɨ tëi ipɨ'a pɨpe, osepiase osenduse avei ava rembiapo mba'e naporäi va'e.

⁹ Esepia yande Yar oikwa vɨroyasar renose agwä mba'e tëi sui, oikwa avei mba'e tëi pɨpe yuvɨrekoi va'e rereko imombaraɨsu agwä arɨ kañɨse kuri.

¹⁰ Tüpä omombaraɨsura akoi ava ndopoi potai va'e gwemimbotarai sui, iyavei vɨroɨrö va'e imborerekwasa. Oyeekomboɨvateai va'e gwemimbotar aposa pɨpe, ndosɨkɨyei avei oñe'ërai agwä seko ɨvate pirätä katu va'e rese;

¹¹ yepe mbigwai eta ɨva pendar vɨreko katu pirätäsa iyavei mborerekwasa yuvɨreko viña, ndoikatui rumo yande Yar rovai evokoi ava reroɨrö agwä yuvɨreko.

¹² Evokoi ava yuvɨrekoi mba'e mɨmba nungar tëiete: ndovɨrekoi avei pɨ'a ñemoñetasa oyese avɨye va'e yuvɨreko, evokoi nungar yuvɨro'a yukapɨrä tëiete. A'e oñe'ërai tëi va'e mba'e gwemiendukwae'ɨ̇ rese, mba'e mɨmba nungar tuprɨ avei rumo omanora yuvɨreko gwekokwerai pɨpe,

¹³ oyemombaraɨsu uka ambuae ava mombaraɨsusa pɨpe sui tëi, yayembovɨ'a mba'e yande rembiapoai rese e'i tëiete yuvɨreko viña. ¡Oporomochi pɨpe tëi rumo yuvɨrekoi, yuvɨrasose pe pietasave pe pɨri, gwekorai reseve oyembovɨ'a oporombopasa tëi pɨpe yuvɨreko!

¹⁴ Osepiase kuña, oipota voiño tëi; ndaporambai avei iyemboangaipasa chupe, yayapoño mba'e e'iño ndoyembo'e katui va'e upe. Evokoi nungar oyembo'e-mbo'e katu mba'e pota raisa reka agwä oyeupe yuvɨreko, ava okañɨ tëi va'erä yuvɨrekoi.

¹⁵ Okañɨ tëi sekokwer yuvɨreko Tüpä ñe'ë mombe'usar Bosor ra'ɨrɨ Balaam rekokwerai nungar pɨpe, esepia oyepepɨ tekokwer avɨye va'e sui mba'e tëi apo agwä gwarepochi pota raisa pɨpe yuvɨreko.

¹⁶ Tüpä rumo oyaka yangaipa rese: gwariku omoñe'ë ukase ava ñe'ë pɨpe chupe, a'ese ramo opoi oarakwae'ɨ̇sa sui.

¹⁷ Ko ava oporombo'e va'e inungar ɨvɨkwar ipiru va'e, ɨva kɨ'a ɨvɨtu remimombo nungar tëi avei; apɨre'ɨ̇ va'e ite imombopɨrä yuvɨreko pɨ̇tümimbi katu va'esave narä.

¹⁸ Esepia oñe'ë tuprɨai anga'u tëi ava mongere'ɨ̇ agwä ava pɨ'añemoñeta raisa rupi seroyevɨ agwä, ipɨpe sui ombopa tëi a'e ava seko katuprɨ pota va'e yuvɨreko evokoi nungar mba'e tëi pɨpe iyevɨ iri agwä.

¹⁹ Opakatu mba'e apo yaikatu yande reko pɨpe e'i tëi yuvɨreko, a'e ae rumo mbigwai tëi nungar yuvɨrekoi gwekokwerai apo pɨpe, esepia ndoyuvɨnose katui ete ichui, supiete yayapoño itese mba'e tëi, a'e evokoiyase mbigwai nungar ite yande rereko uka.

²⁰ Esepia, akoi oikwa va'e yande Yar, yande pɨsɨrösar Jesucristo yuvɨreko, ipɨpe oyepepɨ ko ɨvɨ pɨpendar mba'e-mba'e tëi sui, oyeitɨ uka irise rumo ko nungar mba'e tëi pɨpe, ichui ndoikatu iri yuvɨnosë. Ipare mba'e tëi katu yɨpɨndar sekokwer sui yuvɨreko chupe.

²¹ Avɨye katura revo ndoikwaise tekokwer i'ɨ̇vi va'e yuvɨreko viña, ñe'ësa kwapare rumo oyepepɨño oyeupe porokwaita avɨye va'e mondore yuvɨreko.

²² Supiete yavɨye ñe'ësa imombe'uprɨ sesendar: “Kave rumo o'u iri ogwë'e”, iyavei aipo e'i “Kuchi oyasu pare oyevɨ iri tuyusave oyemboavaete agwä.”