2 San Pedro 1 - Tüpä Ñe'ëngagwer

Ma'endu'asa resendar

¹ Che, Simón Pedro, Jesucristo ñe'ë mombe'usar iyavei sembigwai aiko, ko aikwachia che ñe'ë peü narä, peipɨsɨ va'e yande Yar rese pe yeroyasa avɨye va'e inungar ore, esepia yande Yar Tüpä, yande Pɨsɨrösar Jesucristo seko ɨ̇vi va'e yuvɨrekoi.

² Tapeipɨsɨ katu porovasasa iyavei teko tuprɨsa Tüpä yande Yar Jesús kwa tuprɨ pɨpe.

Yaikora Tüpä porokwaita rupi ete

³ Tüpä ombou gweko pirätä pɨpe opakatu mba'e ipane va'e yande rekove agwä, sese yande pɨ'añemoñeta katu agwä avei yande sekokwer kwa tuprɨ pɨpe. A'e yande poravo gweko porañetesa pɨpe, gwembiapo porañete va'e pɨpe avei.

⁴ Ipɨpe avei oseya oñe'ë imboavɨyepɨrä yandeu, a'e iñe'ë egwë nde'i tëi va'e, avɨye katu va'e ite, ko iñe'ësa pɨpe sui perekora Tüpä reko avɨye va'e peyese, pe yepepɨ agwä mba'e napörai va'e sui, a'e akoi oime va'e ko ɨvɨ pɨpe ava remimbotar tëi sui.

⁵ Sese peyemovɨräkwä katura peyapo va'erä mba'e avɨye va'e; peseka aveira Tüpä remimbotar kwa tuprɨ katu agwä;

⁶ iyavei peñearö tuprɨra, ipare peñemosaño aveira mba'e tëi upe, ipɨpe sui peyemondo tuprɨ katura Tüpä upe;

⁷ ipare peyeaɨsura peyeɨvrɨ nungar pe rekosa pɨpe; peseka katu aveira ava raɨsu tuprɨ agwä.

⁸ Esepia perekose evokoi nungar mba'e pe rekokwer pɨpe, pembouvicha katuse avei, a'ese pe rekokwer egwë nde'i tëi chira, peikwa tuprɨ katu aveira yande Yar Jesucristo.

⁹ Akoi ndovɨrekoi va'e rumo evokoi nungar mba'e oyese, a'e oyeapo inungar ndasesapɨsoi va'e, anise mba'e ndosepia tuprɨi va'e; sesaraiño oangaipa rese ñerö agwer sui.

¹⁰ Sese che rɨvrɨ eta, peyemovɨräkwä katu Tüpä pe renoisa mboyekwa agwä iporavoprɨ pe rekosave, egwë peyese ndapevɨapi chietera mba'e tëi pɨpe.

¹¹ Evokoi nungar pɨpe sui ɨva rokenda imboisara pereike agwä mborerekwasa ndopai va'esave, yande Yar yande Pɨsɨrösar Jesucristo mborerekwasave.

Porombo'esa supiete va'e

¹² Sese opomoma'endu'año itera evokoi nungar mba'e opakatu rese, peikwa avei peyemovɨräkwäsa mba'e supi tuprɨ va'e pembo'esa rese.

¹³ Che aikove vɨteseve, aikatu ite añe'ëgatä va'erä arakwasa mombe'u agwä rese peü.

¹⁴ Esepia yande Yar Jesucristo oikwa uka ite che mano agwä vɨrovɨse cheu;

¹⁵ opombo'era rumo opakatu che katugwer rupi ko tekokwer rese che manore pe ma'endu'a agwä sese.

¹⁶ Ko porombo'esa oromombe'u va'e peü yande Yar Jesucristo pirätäsa resendar, iyevɨ iri agwä resendar avei, nda'ei oreyesui tëi, ore rumo orosepia va'e ite ore resa pɨpe yande Yar mborerekwasa.

¹⁷ Orosepia ni'ä yande Ru Tüpä omboeteise Gwa'ɨrɨ iyavei omondose seko porañete iri agwä, aipo e'ise Tüpä oñe'ë gweko porañetesa pɨpe: “Ko che Ra'ɨrɨ, che rembiaɨsu, sese ni'ä che ayembovɨ'arete vichiko.”

¹⁸ Ore ite ni'ä aipo ñe'ësa orosendu ɨva suindar oroikose yande Yar rupi ɨvɨtrɨ imboeteiprɨ va'esave.

¹⁹ A'e ñe'ësa omboyekwa katu ñe'ësa araka'endar Tüpä ñe'ë mombe'usar remimombe'ugwer supi tuprɨ va'e Cristo resendar, iya ite peü pe yapɨsaka tuprɨ agwä sese; inungar tataendɨ pɨ̇tüsave osesape va'e akoi osëse voi ko'ë rerusar yasɨtata gwasu ou, egwë e'i ko ñe'ësa pe pɨ'a pɨpe sesape.

²⁰ Peikwa katu ko mba'e: ko ñe'ësa araka'endar Ikwachiaprɨ Tüpä suindar ite, nda'ei yande yesui tëi yaikwa imombe'u agwä,

²¹ esepia nda'ei Tüpä ñe'ë mombe'usar oyesui tëi omombe'u yuvɨreko, a'e rumo ava seko katuprɨ va'e ite, Tüpä omombe'u uka oñe'ë chupe Espíritu Maräne'ɨ̇ pirätäsa pɨpe araka'e.