2 Corintios 9 - Tüpä Ñe'ëngagwer

¹ Porerekosa imonu'äprɨ Jesús reroyasar upe narä rese rumo ndaikwachia iri chira peü,

² esepia che aikwa pekere'ɨ̇ ite ipɨtɨ̇vɨï agwä. Evokoiyase che vɨ'aretesa pɨpe Macedonia ɨgwar Jesús reroyasar upe aipo a'e yepi, Acaya ɨgwar oyemoigätu voi ete ambuae Jesús reroyasareta pɨtɨ̇vɨï agwä ambuae aravɨter suive yuvɨreko, seta avei Macedonia ɨgwar ikere'ɨ̇ va'e pe pɨtɨ̇vɨï agwä yuvɨreko.

³ Che rumo amondo ko yande rɨvrɨ eta peü okañɨ tëi e'ɨ̇ agwä che vɨ'aretesa areko va'e ñe'ësa avɨye va'e pe resendar. Aipo amombe'u peü peyemoigätu tuprɨ agwä rese,

⁴ ani akoi arasose Macedonia pendar cheyeupi, sembiepiave ndapeyemoigätu vɨtei chira peiko. Egwë peyese ore mochi gwasu uka tiëtera peye, esepia oroyeroya ite pe rese, pe avei evokoiyase ndapeñe'ëise peyemochi ukara.

⁵ Sese che pɨ'añemoñeta yɨpɨndar añe'ë va'erä yande rɨvrɨ upe yuvɨreko, a'e ranei ore renonde yuvɨraso agwä pe pɨri pe pɨtɨ̇vɨï agwä ko porerekosa avɨye va'e monu'ä agwä, akoi pe mbou pota va'e rese. Evokoiyase a'e pe porerekosa pe remimonu'ä opara pemoigätu tuprɨ pe avagwer mboyekwa agwä, nda'ei chira rumo pe rekate'ɨ̇sa pɨpe.

Yamondo mba'e yande reko'etesa pɨpe

⁶ Peyemoma'endu'a ko rese: akoi noñotɨ̇ atɨimi va'e mba'e, chupe movɨrömi tëi avei i'a; akoi oñotɨ̇ atɨ va'e rumo mba'e, a'e seta katu avei i'a chupe.

⁷ Ñepëi-pëi iya opɨ'a ñemoñetasa rupi omondora oporerekosa Tüpä upe yuvɨreko, nda'ei chira opɨ'a vɨräkwäsa pɨpe tëi iyavei nda'ei chiaveira ambuae ava okwai pirätäsa pɨpe tëi, esepia Tüpä osaɨsu ava ovɨ'aretesa pɨpe omondo va'e oporerekosa chupe.

⁸ Tüpä ni'ä oikatu opakatu mba'e avɨye va'e mondo agwä peü arɨ yakatu rupi, pereko va'erä opakatu mba'e ipane va'e peü, iyavei sumbɨrer pɨpe opakatu ambuae mba'e avɨye va'e rese pe poropɨtɨ̇vɨï agwä.

⁹ Ikwachiaprɨ pɨpe aipo e'i: “A'e iporerekoai iparaɨsu va'e rese yepi, iyavei mba'e avɨye va'e sembiapo nokañɨi chietera.”

¹⁰ Tüpä ni'ä ombou mba'e rä'ɨi ava remitɨ̇rä, mba'e semi'urä avei, sese ombou katura mba'e peü, iyavei ombouvicha katura pe rembiapo avɨye va'e ava pɨtɨ̇vɨï agwä.

¹¹ Egwë peyese ombou katura opakatu mba'e pe rembierekorä ava upe imondo katu agwä pe avasa pɨpe. Ore orovɨrasose porerekosa pe remimbou yande rɨvrɨ eta upe, a'e evokoiyase avɨye ndeu e'ira Tüpä upe yuvɨreko.

¹² Esepia ko pemondo va'e yande rɨvrɨ eta pɨtɨ̇vɨï agwä, nda'ei peipɨtɨ̇vɨï mba'e ipane va'e rese gweraño, ichui avei ni'ä, avɨye Tüpä upe e'ira yuvɨreko.

¹³ A'e evokoiyase omboeteira Tüpä yuvɨreko, esepia ko pe poropɨtɨ̇vɨïsa pɨpe pemboyekwa itera pe Cristo ñe'ë reroyasa peiko, a'e avei omboeteira Tüpä yuvɨreko. Esepia pemondoño itera mba'e pe porerekosa chupe, iyavei opakatu ambuae ava upe.

¹⁴ Evokoiyase a'e oyerurera pe rese yuvɨreko pe raɨsusa pɨpe, esepia Tüpä pe pɨtɨ̇vɨï ete oporovasasa pɨpe.

¹⁵ ¡Avɨye Tüpä upe, esepia a'e ombou mba'e tuvicha va'e avɨye katu va'e yandeu, ndayaikatui va'e mombe'u tuprɨ agwä!