2 Corintios 7 - Tüpä Ñe'ëngagwer

¹ Che rɨvrɨ eta, che rembiaɨsu, ko Tüpä remimombe'u imboavɨyepɨrä yandeu. Sese yande yamoigätu tuprɨra yande rekokwer chupe yareko e'ɨ̇ agwä yande retekwer angaipa pɨpe, inungar yande rete iyavei yande rekokwer pɨpe; iyavei Tüpä mboeteisa pɨpe yasekara yande reko katuprɨ agwä chupe narä gweraño ite.

Pablo ovɨ'arete Corinto pendar opase oñekuñarö yuvɨreko

² ¡Che pɨsɨ peye pe pɨ'a pɨpe! Ndoroyapoi ni'ä mba'e tëi ava upe; ndoroyapoi avei mba'e naporäi va'e ava upe; ndorombopai avei ambuae ava.

³ Nda'ei pe rekokwer rese che ñe'ë raisave aipo a'e peü, supiete akoi yɨpɨndar amombe'u peü, “Che opoaɨsu che pɨ'a pɨpe ite pe rereko, yaikove tuprɨ va'erä yamano va'erä avei oyoya.

⁴ Añe'ë pota ite pe rese iyavei che yembovɨ'asa pɨpe. Opakatu yande paraɨsusa pa'üve, ayemongere'ɨ̇ katuño ite vɨ'aretesa pɨpe vichiko.

⁵ Ore yepotasa suive rumo Macedonia ve, ndoropɨtu'ui ete oroiko, opakatu rupi ete orosepia mba'e-mba'e tëi oime va'e oreu: oime ore amotare'ɨ̇mbar oime avei ore yepɨ'amondɨisa.

⁶ Tüpä rumo, ava ndoyemongere'ɨ̇i va'e, omongere'ɨ̇ iri yepi, a'e ore mongere'ɨ̇ katu iri Tito yepotase;

⁷ nda'ei rumo Tito yepotaseño orovɨ'arete, a'e avei oyembovɨ'a gwasu pe rese. A'e aipo e'i oreu pe aipo che repia pota ite peye, omombe'u avei che rese pe vɨ'are'ɨ̇ agwer cheu pema'endu'año ite aipo che rese; pe che raɨsusave yepi aipo nungar renduse ayembovɨ'a katu.

⁸ Yepe che ñe'ë aikwachia va'ekwer imondo peü ndape mbovɨ'ai viña, cheu rumo avɨyeño kurïtëi. Yɨpɨndar rumo ayepɨ'amboasɨ aikwase che ñe'ë tasɨ iteanga va'e peü chi'ï rupi tëi rumo ndapevɨ'ai peyerokɨ pare sese,

⁹ kurïtëi che avɨ'arete; nda'ei rumo pe vɨ'are'ɨ̇sa rese egwë a'e, esepia ko pe vɨ'are'ɨ̇sa sui pemboasɨ pe angaipa Tüpä upe pe yevɨ agwä. Evokoi nungar Tüpä oipota, evokoiyase ore ñe'ë ndoyapoi mba'e naporäi va'e peü;

¹⁰ esepia ko nungar vɨ'are'ɨ̇sa Tüpä oipota va'e yande angaipa mboasɨ uka chupe yande yevɨ agwä, ipɨpe sui ni'ä yañepɨsɨrö yande pɨ'añemoñeta rerova e'ɨ̇sa pɨpe. Ko ɨvɨ pɨpendar vɨ'are'ɨ̇sa rumo manosa tëi vɨreko yandeu.

¹¹ Pe vɨ'are'ɨ̇sa rumo Tüpä porokwaita rupi ete egwë e'i, ¡pesepia ru kurïtëi ko mba'e sembiapokwer! Oyapo ite mba'e che repɨsa pɨpe; omoñemoɨrö ombosɨkɨye avei. Ipare rumo che repia pota ite yuvɨreko, che rese gwekate'ɨ̇sa pɨpe oporonupa yuvɨreko. Ko opakatu mba'e imboyekwaprɨ nda'ei pe pɨ'a rupi egwë e'i yuvɨreko.

¹² Egwë e'i akoi yɨpɨndar aikwachia va'e imondo peü, nda'ei ava mba'e tëi aposar reseño, nda'ei avei mba'e tëi oiporara va'e reseño, che rumo aipota katu peikwa pe ore raɨsusa pereko va'e oreu narä Tüpä rovake.

¹³ Ko oime va'e mba'e yande mbovɨ'a ite oiko. Ko vɨ'aretesa yaipɨsɨ va'e sui rumo, yande mbovɨ'a katu ite Tito yembovɨ'asa yasepiase; esepia pe avei ni'ä opakatu pembovɨ'a katu pe rekokwer pɨpe.

¹⁴ Che amombe'u ite Tito upe che vɨ'aretesa pe resendar, che ñe'ë pe resendar avɨye ite ipɨpe nachi ete. Inungar oromombe'u mba'e supi tuprɨ va'e peü yepi; inungar tuprɨ avei supiete mba'e oromombe'u va'e pe rese yeroyasave Tito upe.

¹⁵ Iyavei kurïtëi a'e pe raɨsu katu ite pe rese oma'endu'asase opakatu pe poreroyasa rese, iyavei peipɨsɨ tuprɨ ite imboeteisave sereko.

¹⁶ ¡Ayeroya ite pe rese che vɨ'asa pɨpe!