2 Corintios 13 - Tüpä Ñe'ëngagwer

¹ Ko imombosapɨsa yupagwer asora pe repia. Pemombe'u potase opakatu ava rembiapoai cheu, toime ñuvɨrïo, anise mbosapɨ oikwa va'e sembiapoai.

² Akoi yɨpɨndar oyemboangaipa va'e yuvɨreko, ambuae opakatu yuvɨrekoi va'e upe avei aipo a'e, kurïtëi aiko amombrɨ pesui amombe'u irira aipo peü asose imoñuvɨrïosa yupagwer rupi pe pɨri: asoirise rumo pe repia, ndopoparaɨsuereko iri chietera,

³ esepia peipota ite che rekoa'ä agwä Cristo pi'ä omoñe'ë uka pe yapave cheu. Cristo ndaseko mbegwemi peü mba'e apo oiko, a'e rumo omboyekwa opirätäsa peü.

⁴ Supiete ni'ä a'e yatɨkasa kurusu rese, inungar ava nipirätäi va'e, kurïtëi rumo a'e oikove Tüpä pirätäsa pɨpe. Egwë oro'e avei ore seko pirätä e'ɨ̇sa sereko, oroikose rumo sese oroiko Tüpä pirätäsa pɨpe pe rese añeko agwä.

⁵ Pema'ekwa tuprɨ katu pe rekokwer rese, peiko ite pi'ä pe Cristo rese yeroyasa pɨpe; ¿Ndapeikwai vo Jesucristo sekoise pe rese? ¡Pesëse pe rekoa'äsa sui!

⁶ Pe revo peikwara ore ndorokañɨ tëi va'e oroiko ore rekoa'äsa pɨpe.

⁷ Iyavei oroyerure pe rese Tüpä upe toyapo eme mba'e tëi yuvɨreko ore esave; nda'ei rumo ore ɨvate katu va'e mba'e tëi rasa pare mboyekwasave egwë oro'e, ko katu toyapo mba'e avɨye va'e yuvɨreko ore yapave, yepe peü ndoyavɨi orokañɨ tëi va'e oroiko viña.

⁸ Esepia ndiyai mba'e supi tuprɨ va'e amotare'ɨ̇ agwä oreu, egwë e'i rumo sese katu ite oroñe'ë.

⁹ Sese orovɨ'año ite norepirätäise, ore rumo oroipota pe momirätä agwä; iyavei ore oroyerure katuño itera pe rekokwer katuprɨ agwä rese.

¹⁰ Aikwachia ko che ñe'ë imondo peü pe pɨri che so agwä renonde, akoi asose, namboyekwa pirätäi chira che mborerekwasa eipeve, a'e ni'ä yande Yar ombou va'e cheu pe reko momirätä katu agwä, nda'ei pe reko momarä agwä, a'e rumo ombou pereko katuprɨ agwä.

Ma'endu'asa ipa va'e

¹¹ Imomba agwä, che rɨvrɨ eta, aipota pevɨ'aretera peiko. Peseka avei pereko tuprɨ katu agwä peyeupe, peyemongere'ɨ̇ katu, oyoya gwasu peiko tuprɨ avei peyese mba'e tuprɨ pɨpe. Evokoiyase Tüpä oporoaɨsusa pɨpe, gweko tuprɨsa pɨpe avei sekoira pe rese.

¹² Peyapo avɨrave ñepëi-pëi peyeupe pe yeovaupɨtesa pɨpe. Opakatu Jesús reroyasar avei omondo oma'endu'asa yuvɨreko peü.

¹³ Peipɨsɨ yande Yar Jesucristo porovasasa, Tüpä poroaɨsusa iyavei Espíritu Maräne'ɨ̇ tasekoi opakatu pe rese.