1 Timoteo 6 - Tüpä Ñe'ëngagwer

¹ Akoi ava mbigwai tëi yuvɨrekoi va'e, a'e omboyeroyara gwerekwar imboeteisa pɨpe yuvɨreko, iñe'ë marä e'ɨ̇ agwä Tüpä rer rese, yande porombo'esa rese avei.

² Iyavei mbigwai vɨrekose gwerekwar Jesús reroyasar, sese ndiyai nomboyeroyai chira Jesús reroyasar rekosa rese yuvɨreko, iyakatu rumo omboyeroya tuprɨ katura gwerekwar yuvɨreko, esepia serekwar oipɨsɨ va'e iporavɨkɨsa, a'e Jesús reroyasar saɨsuprɨ yuvɨrekoi yepi. Eporombo'e iyavei emombe'u ko ñe'ësa eiko:

Porombo'esa kokotɨ tëi va'e iyavei gwarepochi resendar

³ Oimese oporombo'e va'e oyesuindar pɨ'a ñemoñetasa kokotɨ tëi va'e rese, ndoyoyai va'e yande Yar Jesucristo porombo'esa avɨye va'e rese, ndoyoyai va'e avei yande yembo'esa Tüpä rese yande yeroya tuprɨsa rese,

⁴ egwë e'i va'e oyemboɨvateai tëi mba'e rendukwa e'ɨ̇save. Iyavei oporandu-randu tëi ñe'ësa rese sekoa'ä agwä inungar imba'easɨ va'e; ichui osë mba'e pota raisa, ñemoɨrösa, ñe'ë-ñe'ë tëisa, yemboyeroya e'ɨ̇sa

⁵ iyavei iporoakasa ndopai va'e ava yarakwarai va'e pa'üve, ndoikwai rumo mba'e supi tuprɨ va'e yuvɨreko, ipɨ'añemoñeta Tüpä rese oma'endu'asa pɨpe mba'e rereko atɨ agwä yuvɨreko viña.

⁶ Supiete yayembovɨ'añose mba'e yande rembiereko rese, a'ese Tüpä rese yande pɨ'a ñemoñetasa inungar mba'e sepɨrusu va'e yandeu.

⁷ Esepia ndayarui ete ni'ä mba'e ya'ase ko ɨvɨ pɨpe, iyavei ndayarasoi chiaveira mba'e yamanose yande yeupi kuri.

⁸ Iyakatu rumo yarekose yande remi'urä, yande yemonde agwä avei, sese yayembovɨ'añora yaiko.

⁹ Iyavei akoi ava yuvɨrekoi pota va'e mba'e yar, ndoyemovɨräkwäi rumo tekoa'äsa upe, ipare ovɨapi mba'e tëi pɨpe, seta mba'e pota raisave, ipɨpe oyeekomomarä, ipare oyemokañɨ tëi.

¹⁰ Esepia gwarepochi pota raisa sui osë opakatu mba'e naporäi va'e; amove ava ipota raisa pɨpe oyepepɨ Tüpä reroyasa sui iyavei omombaraɨsu gwekokwer ipɨpe a'e ae yuvɨreko.

Arakwasa Timoteo upendar

¹¹ Nde rumo, Tüpä rese ereiko va'e, eyepepɨ opakatu ko nungar mba'e naporäi va'e sui. Eiko nde reko ɨ̇visa pɨpe, ndema'endu'año ite Tüpä rese, eroya esaɨsu, eñemosa avei eiko nde reko mbegwesave.

¹² Eyemovɨräkwä mba'e tëi upe Tüpä reroyasave; erepoi rene tekovesa apɨre'ɨ̇ va'e sui, sese ni'ä Tüpä oñe'ë ndeu, iyavei eremombe'u ite ni'ä Tüpä reroyasa nde reko agwä ava eta rovai.

¹³ Kurïtëi Tüpä rovake, a'e opakatu mba'e moingovesar iyavei Jesucristo rovake, a'e ni'ä omombe'u tuprɨ supiete va'e Poncio Pilato rovai, sese che orokwai

¹⁴ tovɨroya yuvɨreko che ñe'ë amombe'u va'e ndeu, vɨreko va'erä gwekokwer mba'e tuprɨ pɨpe yande Yar Jesucristo reko porañetesa ouse kuri.

¹⁵ Akoi oyepotase arɨ imombe'uprɨ kuri, a'ese Tüpä omboavɨyera opakatu oñe'ëngagwer, esepia a'eño ite ñepëiño va'e sekoi Mborerekwar ɨvate katu va'e rerekwar avei.

¹⁶ A'eño ite sekoi tesapesa apɨre'ɨ̇ ndopai va'e, ndipoi oyemboya va'e sese; ndipoi ete ambuae ava osepia va'e. ¡Egwë te'i, imboeteiprɨ tasekoi opakatu opirätäsa apɨre'ɨ̇ va'e rese! Amén.

¹⁷ Akoi imba'e eta va'e ko ɨvɨ pɨpe, eyokwai toyemboɨvateai eme, iyavei toyeroya rai eme omba'e eta rese tëi yuvɨreko, esepia a'e egwë e'i tëi va'e. Iyakatu rumo Tüpä rese oyeroyara yuvɨreko, a'e ni'ä opakatu mba'e ikatuprɨ va'e ombou yandeu narä yande rembiporugwä.

¹⁸ Eyokwai avei evokoi ava, toyuvɨrekoi mba'e yar nungar mba'e avɨye va'e aposa pɨpe, iyavei toyemoigätuño akoi mba'e vɨreko va'e mboya'o agwä ambuae ava upe yuvɨreko.

¹⁹ Evokoiyase vɨrekora mba'e avɨye va'e, apɨre'ɨ̇ va'e oyeupe narä yuvɨreko kuri, tekovesa supiete va'e rereko agwä.

Timoteo kwaitarä omondo Pablo ipa va'e

²⁰ Timoteo, esärö tuprɨ ko porombo'esa supi tuprɨ va'e. Ereyapɨsakai rene ava tëi pɨ'a ñemoñetasa egwë e'i tëi va'e rese, porombo'esa kokotɨ tëi va'e rese avei; esepia amove ava aipo e'i ko porombo'esa rese, ko ite yande mboarakwara e'i tuprɨ tëi va'e yuvɨreko chupe.

²¹ Ipɨpe sui ni'ä amove ava oyavɨ Tüpä reroyasa yuvɨreko. Yande Yar Jesucristo taperovasa opakatu pe rereko.