1 Timoteo 5 - Tüpä Ñe'ëngagwer

Marä e'ira Jesús reroyasar oyepa'üve yuvɨreko

¹ Ereñe'ëgätai rene ava kwakwami upe; iyakatu rumo, eremboarakwara inungar nde yesupa sereko; iyavei mbɨa chi'ïvä'e upe ereñe'ë tuprɨra sekokwerä rese inungar nde rɨvrɨ upe.

² Kuña kwakwami upe avei ereñe'ë tuprɨra, inungar nde sɨ ite sereko; kuñatäi avei eremboarakwa tuprɨra inungar nde reindrɨ sereko, opakatu nde reko katuprɨsa pɨpe.

³ Iyavei akoi imer mano va'ekwer ereipɨtɨ̇vɨïra mba'e ipane va'e rese.

⁴ Akoi oimese imembrɨ anise semiarirö, toyembo'e rane okwaita mboavɨye agwä omu iyavei oyesupa poraɨsusa sereko, esepia a'e ni'ä Tüpä remimbotar.

⁵ Iyavei kuña imer mano va'ekwer, a'e ae sekoi va'e, oyeroya ite Tüpä rese, iyavei oyerureño ite arɨ, pɨ̇tü yakatu yepi.

⁶ Kuña imer mano va'ekwer oyemondose mba'e gwemimbotarai pɨpe yuvɨreko, a'ese omano va'e tëi sekokwer yuvɨrekoi.

⁷ Eyokwai tuprɨ ava ko ñe'ësa rese, ichui nda'ei chira ava ñe'ëpora tëi yuvɨrekoi.

⁸ Akoi ava nosäröi va'e omu, gwëtä pɨpendar nosäröi va'e avei, a'e ndogwata iri Tüpä rese iyavei mba'e tëi katu Jesús reroyasare'ɨ̇ sui sekoi.

⁹ Ikwachiasara rumo ambuae kuña imer mano va'ekwer pa'üve ɨvate katu sesenta sui i'aravɨter va'e, iyavei ñepëiño ite omer vɨreko va'ekwer.

¹⁰ Ikwaprɨra sekokwer ikatuprɨsa rese, omboakwa tuprɨse chi'ïvä'e oyesuindar, omoingese ava gwëtä pɨpe, i'añekose ava Tüpä reroyasar rese ipɨsei agwä, oipɨtɨ̇vɨïse ava iparaɨsu va'e, oyapo tuprɨse opakatu mba'e avɨye va'e.

¹¹ Ereikwachia eme kuña imer mano va'ekwer i'aravɨter ndosupitɨ vɨtei va'e sesenta kwachiar pɨpe; esepia amove gwemimbotar pɨpe tëi oyepepɨ Cristo sui yuvɨreko, omenda yupagwe pota iri agwä

¹² ipɨpe oimerä Tüpä poronupasa chupe, esepia yɨpɨndar oyemondo Tüpä upeño ite oyekwachiase, ipare rumo nomboavɨyei ete oñe'ë.

¹³ Iyavei oɨ yakatu rupi tëi ogwatase oiko, a'ese vɨrekora oate'ɨ̇sa; iyavei ima'echiröi tëira, oñangareko tëira opakatu rese, omombe'u-mbe'u tëi aveira mba'e naporäi va'e.

¹⁴ Sese ko aipota akoi imer mano va'ekwer kuñatäi vɨte va'e, tomenda iri timembɨ iri avei yuvɨreko, iyavei tosärö tuprɨ gwëtä pɨpendar, sese yamotare'ɨ̇mbar sekokwer nda'ei chira oñe'ëpora tëi vɨreko yuvɨreko.

¹⁵ Esepia oime amove kuña imer mano va'ekwer oyepepɨ Cristo sui Karugwar rupi gweko agwä.

¹⁶ Akoi oimese kuña Cristo Jesús reroyasar vɨreko va'e kuña imer mano va'ekwer oyepɨri, a'e toipɨtɨ̇vɨï yuvɨreko, a'e sese evokoiyase tüpäro pendar ni'añeko iri chira; a'ese tüpäro pendar oikatura imer mano va'ekwer pɨtɨ̇vɨï agwä yuvɨreko.

¹⁷ Iyavei Tüpä reroyasar rärösar osärö tuprɨ va'e, a'e toipɨsɨ katu ava poropɨtɨ̇vɨïsa imboyeroyasave, akoi oyemondo va'e Tüpä ñe'ëngagwer mombe'u agwä, ava mbo'e agwä avei, a'e ko poropɨtɨ̇vɨïsa oipɨsɨ katura.

¹⁸ Esepia Ikwachiaprɨ pɨpe aipo e'i: “Ereiyuru apɨ̇chi rene tɨvi oporavɨkɨ va'e trigo kambesar.” Iyavei aipo e'i: “Mbɨa oporavɨkɨ va'e iyakatu oipɨsɨra oporavɨkɨ reprɨ.”

¹⁹ Iyavei ndereroyai chira mba'e omombe'u va'e Tüpä reroyasar osärö va'e yamotare'ɨ̇save yuvɨreko, oimese ñuvɨrïo anise mbosapɨ sepiasar, a'ese ramo ereroyara.

²⁰ Akoi oimese rumo angaipa aposar ipa'üve, a'ese eremboarakwara opakatu ava rovake, evokoiyase ambuae osɨkɨyera angaipa apoe'ɨ̇ agwä yuvɨreko.

²¹ Iyavei che orokwai Tüpä rovake, Jesucristo rovake opakatu mbigwai ɨva pendar rovake avei, ereyapo tuprɨra ko mborokwaita, nderemoma'üatɨi chira ava imboarakwa nde remimbotar rupi tëi.

²² Nde pɨ'a ñemoñeta tuprɨ ranera eresenoi va'erä mbɨa mborokwaita rese i'añeko agwä, avɨyeteramo nde rese päve mba'e oimerä. Eñearö tuprɨ nde reko maräne'ɨ̇sa pɨpe.

²³ Nde rɨe mba'erasɨsa upe ndereɨ'ui chira ɨ gweraño tëi, ereɨ'uño aveira chi'ï rupi uva rɨkwer sai va'e chupe.

²⁴ Amove ava angaipa oyekwa tuprɨ oyeupe porandu agwä renonde, oime rumo akoi oñomi va'e oangaipa yuvɨreko ipare tëi ikwasa.

²⁵ Inungar ava rembiapo oyekwa tuprɨ avei mba'e sembiapo avɨye va'e; iyavei mba'e naporäi va'e nañomisai chietera.