1 Timoteo 2 - Tüpä Ñe'ëngagwer

Yeruresa opakatu ava ɨvɨ pɨpendar rese

¹ Iyavei no, ko che opomongere'ɨ̇ pe yerure agwä, peporandu, pemondo avei avɨye pe'esa Tüpä upe opakatu ava rekokwer rese.

² Iyavei peyerure opakatu mborerekwar rese, evokoiyase tayareko yande reko tuprɨ Tüpä mboetei tuprɨsa pɨpe, yande poromboeteisa pɨpe avei.

³ Ko avɨye ite, a'e ni'ä Tüpä oipota yande Pɨsɨrösar,

⁴ supiete a'e oipota opakatu ava ñepɨsɨrö iyavei ko porombo'esa supiete mba'ekwa tuprɨ agwä.

⁵ Esepia ñepëiño ite Tüpä, ñepëiño avei ava oikatu va'e yande reraso Tüpä upe; a'e Cristo Jesús sekoi.

⁶ Esepia a'e omano opakatu ava yangaipa va'e repɨrä ipɨsɨrö agwä avei, a'e imombe'usa chupendar arɨ iporavoprɨ rupi.

⁷ Sese che supiete Jesús ñe'ë mombe'usar, ikwaiprɨ aiko Tüpä ñe'ëngagwer mombe'u agwä, ava nda'ei va'e judío mbo'e agwä, ko yeroyasa rese iyavei supiete va'e rese; supiete ndopombopai.

Kuimba'e iyavei kuña rekokwer

⁸ Evokoiyase che aipota ava opakatu rupi oyerure yuvɨreko, tomopü'a opo opɨ'añemoñeta katuprɨsa pɨpe, omba'e mboasɨ e'ɨ̇sa pɨpe oyeakae'ɨ̇sa pɨpe avei yuvɨreko.

⁹ Iyavei kuña toyemonde tuprɨño turukwarño tëi pɨpe yuvɨreko, anichira rumo oakä moporañeteisa pɨpe yuvɨrekoi; tomondo eme avei mba'e sendɨ va'e inungar oro oyese yuvɨreko, iyavei turukwar sepɨrusu va'e tomonde eme yuvɨreko.

¹⁰ Iyakatu rumo yuvɨrekoi tuprɨra gwembiapo avɨye va'e pɨpe, inungar akoi kuña omboetei pota va'e Tüpä yuvɨreko yepi.

¹¹ Iyavei kuña tosendu porombo'esa okiririsa pɨpe imboyeroyasave;

¹² ndaipotai kuña oporombo'e ava re'ɨi pa'üve, iyavei toyokwai eme kuimba'e. Iyakatu rumo ikiririñora yuvɨreko,

¹³ esepia Tüpä oyapo yɨpɨndar Adán ipare oyapo Eva;

¹⁴ Adán nda'ei imbopaprɨ, kuña rumo oyembopa uka; ichui ovɨapi angaipa pɨpe.

¹⁵ Kuña rumo oñepɨsɨröra okwaita mboavɨyesa pɨpe Cristo reroyasa pɨpe, poroaɨsusa gweko maräne'ɨ̇sa pɨpe avei.