1 Tesalonicenses 3 - Tüpä Ñe'ëngagwer

Timoteo mondo agwer Tesalónica ve

¹ Evokoiyase che nañemosa iri ete pe repia e'ɨ̇ rese, sese ore pɨ'a ñemoñeta oropɨta va'erä Atenas ve,

² iyavei yande rɨvrɨ Timoteo a'e oporavɨkɨ va'e Tüpä upe ore rupi, omombe'u va'e ko ñe'ësa pɨsɨrösa resendar Cristo suindar ou va'e. A'e amondo peü pe movɨräkwä katu agwä, pe mongere'ɨ̇ katu agwä avei peyeroya katu va'erä Cristo rese,

³ iyavei tipo eme oyembosɨkɨye va'e ko mba'e tëi pe mombaraɨsuse. Peikwa ni'ä yaiporara rane itera ko nungar mba'e yaiko.

⁴ Iyavei akoi oroiko vɨtese pe pɨri, yande paraɨsu rane itera mba'e yavai va'e apo agwä oro'e akoi peü; egwë e'i ete kurïtëi mba'e pesepiase.

⁵ Evokoiyase che nañemosa irise, amondo Timoteo pe rekokwer rese porandu agwä, che asɨkɨye tëi avɨyeteramo karugwar omondora mba'e tëi pɨpe, ore poravɨkɨ agwer evokoiyase okañɨ tëira che e'save.

⁶ Kurïtëi rumo Timoteo oyevɨ Tesalónica sui, gweru ñe'ësa avɨye va'e pe resendar oreu pe Tüpä reroyasa, pe poroaɨsusa resendar. Iyavei aipo pema'endu'asa ore rese pe poroaɨsusa pɨpe, iyavei pe ore repia pota tëi peye no, inungar ore pe repiasa pota tëi avei.

⁷ Sese che rɨvrɨ eta, ore paraɨsusa pa'üve ore mbovɨ'arete peye, ko oroikwase pe reko tuprɨ Tüpä reroyasa pɨpe.

⁸ Kurïtëi ore mopoäse katu iri ete oroyanduse pe yemovɨräkwäsa yande Yar rese.

⁹ ¿Marä ya'era pi'ä, avɨye ndeu yande'e tuprɨ agwä Tüpä upe, oro'e pe reko tuprɨsa rese, ore yembovɨ'a katusa pe rese aveino?

¹⁰ Pɨ̇tü arɨ rupi avei oroporandu Tüpä upe oreso agwä pe repia eipeve, iyavei Tüpä reroyasa ipane vɨte va'e mboavɨye tuprɨ agwä peü.

Pablo yeruresa

¹¹ Iyavei ore oroipota ore pɨtɨ̇vɨïra yande Ru Tüpä, yande Yar Jesús avei oreso agwä pe pɨri.

¹² Evokoiyase yande Yar tape movɨräkwä katu, tombou katu avei pe yeaɨsu agwä, iyavei opakatu raɨsu agwä, inungar ore orovɨreko pe raɨsusa.

¹³ Ipɨpe sui tape movɨräkwä pe reko maräne'ɨ̇ pɨpe pe mba'e avɨe'ɨ̇save yande Ru Tüpä rovai akoi oyevɨse yande Yar Jesús opakatu vɨroyasareta reseve. Amén.