1 Tesalonicenses 2 - Tüpä Ñe'ëngagwer

Pablo poravɨkɨ agwer tekwa Tesalónica ve

¹ Che rɨvrɨ eta, pe ni'ä peikwa oreso agwer pe pɨri nda'ei egwë e'i tëi va'e.

² Peikwa tuprɨ avei ni'ä akoi yɨpɨndar marä-marä tëi ava ore rereko yuvɨreko tekwa Filipos ve, Tüpä rumo ore pɨtɨ̇vɨï oñe'ëngagwer pɨsɨrösa resendar mombe'u agwä opakatu ore sɨkɨye e'ɨ̇sa pɨpe ore amotare'ɨ̇mbar pa'üve.

³ Esepia ndoroyavɨi ete ore ñe'ë iyavei ndoroñe'ëi ore pɨ'añemoñeta raisa tëi pɨpe peü, ndorombopai avei ava ore porombo'esa pɨpe.

⁴ Tüpä rumo ore rekoa'ä, ichui orekwai oñe'ëngagwer pɨsɨrösa resendar mombe'u agwä; egwë oro'e imombe'u. Nda'ei ava mbovɨ'a agwä tëi, Tüpä ñoite oikwa yande pɨ'a ñemoñetasa yepi.

⁵ Peikwa ni'ä ore ndoroñe'ëi ete ñe'ësa ikatuprɨ katu va'e rese pe mbopa agwä, iyavei nda'ei gwarepochi potasave tëi oroñe'ë tuprɨ. Tüpä oikwa ite ko opakatu mba'e ore rembiapo.

⁶ Ore ndorosekai ete ava ore mboetei katu agwä yuvɨreko: ndorosekai avei pesui ambuae ava sui aveino.

⁷ Yepe Cristo ñe'ë mombe'usar oroiko viña oroikatu ite oroporandu va'erä orepɨtɨ̇vɨï agwä peye viña, oroyemominiño rumo oroiko pe pa'üve. Inungar akoi kuña osärö tuprɨ va'e omembrɨ imboakwa agwä yepi,

⁸ egwë oro'e avei ore pe raɨsu, sese nda'ei Tüpä ñe'ëngagwer gweraño oromondo pota peü, ore rekokwer aveino. ¡Esepia orovɨreko ite poraɨsusa pe rese!

⁹ Che rɨvrɨ eta, peyemoma'endu'a akoi ore paraɨsu agwer rese, ore poravɨkɨ agwer rese arɨ pɨ̇tü reseve avei, nda'ei pe mañeko tëi agwä mba'e oromombe'u Tüpä ñe'ëngagwer oroiko peü.

¹⁰ Pe ni'ä ore repia peye, Tüpä avei oikwa ore reko tuprɨsa, ore rembiapo supiete va'e, i'ɨ̇vi va'e pe Jesús reroyasar pa'üve.

¹¹ Peikwa ni'ä, inungar mbɨa gwa'ɨrɨ upe, egwë oro'e pe mongere'ɨ̇, pe mbovɨ'asa avei ñepëi-pëi opakatu,

¹² iyavei oromondo pe kwaitarä pe reko tuprɨ agwä Tüpä remimbotar rupi. A'e ni'ä oñe'ë peü peiko va'erä sese imborerekwasa porañetesave.

¹³ Ko rese, avɨye ndeu oro'e Tüpä upe arɨ yakatu rupi, esepia Tüpä ñe'ëngagwer oromombe'u va'e peü, peipɨsɨ ite ko Tüpä ñe'ë, nda'ei ava tëi ñe'ë. Supiete Tüpä ñe'ë, a'e ni'ä osekuñaröpa ite pe rekokwer peroya pare.

¹⁴ Che rɨvrɨ eta akoi peiporara va'e, mba'e-mba'e tëi pemu eta pa'üve peikose, egwë e'i tuprɨ avei Tüpä reroyasar Judea pendar yuvɨrekoi va'e Cristo Jesús rekokwer rese. Imu judío ae oseka-seka yamotare'ɨ̇save yuvɨreko.

¹⁵ Judío ni'ä oyuka yande Yar Jesús yuvɨreko, a'e avei oyukapa Tüpä ñe'ë mombe'usar araka'e, ore avei opa ore mombo yuvɨreko. Ndovɨroyai Tüpä iyavei opakatu ava amotare'ɨ̇mbar tëi yuvɨrekoi,

¹⁶ esepia akoi oroñe'ë potase ava nda'ei va'e judío upe iñepɨsɨrö agwä rese, a'e rumo ndoipotai yuvɨreko oreu. Ipɨpe sui oyemboangaipa katu yuvɨreko. Kurïtëi rumo Tüpä ñemoɨrösa ipirätä va'e ou i'arɨve yuvɨreko.

Pablo oso pota iri Tesalónica pendar repia

¹⁷ Che rɨvrɨ eta, akoi oroyepepɨse pe sui movɨrö arɨ rupi, yepe ndaperepiasa iri ete viña, ore rumo ore pɨ'a ñemoñetaño ite pe rese iyavei oroso va'erä pe repia.

¹⁸ Orosa'ä tëi oreso agwä pe repia; che Pablo teiete seta yupagwer tëi aso pota, Karugwar rumo ndoipotai.

¹⁹ Evokoiyase ¿uma pi'ä orosäröra ore vɨ'asa pɨpe ore reko mboɨvate katu agwä akoi yande Yar Jesús oyevɨse kuri? Esepia nda'ei chira pe, nda'ei chira avei ambuae ava.

²⁰ Pe ni'ä ore reko mboɨvatesa peiko, orevɨ'asa aveino.