1 San Pedro 2 - Tüpä Ñe'ëngagwer

Tekokwer pɨasu Tüpä upendar

¹ Sese peseya opakatu mba'e naporäi va'e, opakatu porombopasa, pe reko tuprɨ anga'u tëisa, ambuae ava mba'e pota raisa, opakatu ma'echiröi resendar avei.

² Inungar pitanimi okwakwa agwä oipota kambɨ; egwë peye aveira pe kere'ɨ̇sa pɨpe Tüpä ñe'ëngagwer rese pe yembo'e katu iri agwä, peiko va'erä avei poropɨsɨrösa pɨpe,

³ peikwa ni'ä yande Yar reko avɨyesa.

⁴ Peyemboya katu yande Yar rese, a'e inungar ita ndopai va'e ava rumo ovɨroɨröño yuvɨreko, Tüpä rumo a'e ita oiporavo avɨye katu va'e.

⁵ Egwë e'ira pe rereko oyeupe inungar ita ndopai va'e, ipɨpe sui Tüpä omopu'ära otüpärogwä pe rese, iyavei pa'i ndaseko maräi va'e nungar peikora semimbotar rupi, pe evokoiyase Jesucristo rembiapo pɨpe sui peyapora Espíritu upendar mba'e avɨye va'e, a'e inungar mba'e seropove'ëprɨ avɨye va'e Tüpä upe.

⁶ Esepia Ikwachiaprɨ pɨpe aipo e'i: “Che amondo ñepëi ita nungar ava avɨye va'e tekwa Sión ve a'e ita imovɨräkwä agwä, a'e che rembiporavo iporañete va'e imboeteiprɨ; akoi oyeroya va'e sese, a'e nimochisai chietera.”

⁷ Pe seroyasar peiko va'e upe evokoi ita avɨye va'e ite; seroyasare'ɨ̇ upe rumo imboavɨyesa ko Ikwachiaprɨ aipo e'i va'e: “Oɨ aposar rumo vɨroɨröño ko ita yuvɨreko, a'e ita rumo oyeapo vɨräkwäsa avɨye katu va'e.”

⁸ Iyavei Ikwachiaprɨ pɨpe aipo e'i: “Ko ita gwasu iyavei ita ta'ɨ katu va'e sese oyepɨapira yuvɨreko.” Esepia a'e ovɨapi mba'e tëi pɨpe yuvɨreko Tüpä ñe'ëngagwer rendu pota e'ɨ̇save, evokoi nungar ava yuvɨrekoira mba'e tëi pɨpe.

⁹ Pe rumo iporavoprɨ peiko Tüpä upe narä, inungar pa'i mborerekwar ɨvate katu va'e pɨtɨ̇vɨïsar, iyavei iporavoprɨ peiko Tüpä remimbotar rupi pereko maräne'ɨ̇sa pɨpe. Egwë peye Tüpä reko pirätäsa mombe'u agwä peiko, esepia a'e pe renose pɨ̇tümimbisa nungar pe rekokwerai sui, tesapesa porañete va'e pɨpe pe reike agwä.

¹⁰ Yɨpɨndar nda'e vɨtei ete Tüpä upendar peiko, kurïtëi rumo Tüpä upendar ite peiko; yɨpɨndar ndaperekoi Tüpä poroparaɨsuerekosa, kurïtëi rumo pereko ite iporoaɨsusa.

Perekora tekovesa avɨye va'e

¹¹ Che rɨvrɨ eta, che rembiaɨsu, peiko raimi tëi va'e ko ɨvɨ pɨpe, pepoi opakatu ko ɨvɨ pɨpendar pe pɨ'añemoñeta raisa sui. Esepia pemomarä uka tëi pe rekokwer ipɨpe.

¹² Pereko tuprɨ pe rekokwer avɨye va'e ava Tüpä ndoikwa vɨtei va'e rovake. Yepe ava remieroɨrö peiko inungar-ra mba'e tëi aposar viña, osepiase rumo pe rembiapo katuprɨ, omboeteira Tüpä yuvɨreko a'e arɨ pɨpe akoi yande Yar oporanduse opakatu ava rekokwer rese kuri.

Pemboyeroyara mborerekwa reta

¹³ Yande Yar raɨsusa pɨpe pemboyeroya opakatu pe rerekwar ko ɨvɨ pɨpe: mborerekwar ɨvate katu va'e, esepia a'e imborerekwasa ɨvate katu ite,

¹⁴ anise yɨvɨrindar, a'e pe rekwa pɨpendar rärösar imondoprɨ ava naporäi va'e mombaraɨsu agwä, iyavei ava seko katuprɨ va'e mboɨvate agwä.

¹⁵ Esepia Tüpä oipota peyapora mba'e avɨye va'e ava mba'e ndoikwai va'e upe, ndayarakwai va'e upe iyavei pe rese iñe'ë-ñe'ë tëi e'ɨ̇ agwä.

¹⁶ Peiko tuprɨ ava rovake mbigwai tëi nungar sui senoseprɨ pe rekosa pɨpe, ndiyai rumo ipɨpe peyapo iri mba'e tëi. Peiko tuprɨra Tüpä rembigwai pe rekosa pɨpe.

¹⁷ Pemboeteira opakatu ava. Pesaɨsu avei pe rɨvrɨ eta Jesús reroyasar, pemboetei Tüpä, pemboyeroya avei mborerekwar ɨvate katu va'e.

Mbigwai kwaita poreroyasa resendar

¹⁸ Mbigwai eta, pemboyeroya katu pe rerekwar imboeteisa pɨpe sereko, nda'ei chira ava seko katuprɨ va'e gweraño, ava ndasekoporäi va'e avei pemboyeroyara.

¹⁹ Esepia avɨye katu yañemosase mba'e-mba'e tëi ava rembiapo upe Tüpä mboyeroya tuprɨsa pɨpe.

²⁰ Akoi pe mombaraɨsuse yuvɨreko mba'e tëi aposa sui, ¿mba'e evokoiyase oipɨsɨra ichui akoi oñemosa va'e chupe? Pe mombaraɨsuse mba'e avɨye va'e aposa pɨpe yuvɨreko, peñemosañose chupe, a'e avɨye katu itera Tüpä upe.

²¹ Ko apo agwä rese ni'ä Tüpä pe poravo. Esepia Cristo oyemombaraɨsu pe rekokwer rese, esepia a'e ombou yandeu yaiko va'erä sekokwer rupi.

²² Esepia Cristo ndoyapoi ete angaipa ndoporombopai va'e avei.

²³ Akoi ava iñe'ë marä-marä tëise yuvɨreko chupe, nomboyevɨi ete iñe'ë raisa; iyavei akoi omombaraɨsuse yuvɨreko, ayepɨra sese nde'i ete, a'e rumo, che Ru Tüpä seko ɨ̇vi va'e oikwara chupe yuvɨreko e'iño oyeupe mba'e-mba'e tëi aposar upe.

²⁴ Cristo teiete vɨraso yande angaipagwer gwete rese kurusu rese, yande yepepɨ agwä angaipa sui yaiko teko ɨ̇vi tuprɨsa pɨpe. Esepia ni'ä Cristo imombaraɨsusa perekokwer moigätu agwä.

²⁵ Esepia pe ni'ä yɨpɨndar inungar ovesa okañɨ tëi va'e peiko viña, kurïtëi rumo peyevɨ Cristo upe, a'e pe rekokwer osärö kurïtëi inungar ovesa rärösar.