1 San Juan 5 - Tüpä Ñe'ëngagwer

Yeroyasa sui ou poroaɨsusa

¹ Opakatu vɨroya va'e Jesús Poropɨsɨrösar seko rese, a'e Tüpä ra'ɨrɨ ite yuvɨrekoi; iyavei osaɨsu va'e ava, osaɨsu avei ta'ɨrɨ yuvɨreko.

² Akoi yande yasaɨsuse Tüpä yayapose avei iporokwaita, yaikwa avei yasaɨsuse Tüpä ra'ɨrɨ yuvɨrekoi va'e.

³ Yamboavɨyese Tüpä porokwaita, a'ese yamboyekwa Tüpä raɨsusa yaiko; iyavei iporokwaita nda'ei yavai eteprɨ yapo agwä,

⁴ esepia opakatu Tüpä ra'ɨrɨ yuvɨrekoi va'e osekopɨ mba'e-mba'e tëi ɨvɨ pɨpendar. Iyavei Cristo rese yeroyasa pɨpe yasekopɨpa mba'e naporäi va'e ko ɨvɨ pɨpe.

⁵ Akoi oyeroya va'e Jesucristo Tüpä Ra'ɨrɨ sekosa rese, a'e oikatu ko ɨvɨ pɨpendar mba'e-mba'e tëi rekopɨ agwä yuvɨreko.

⁶ Ko Jesucristo yusa ikwasa ɨ pɨpe ñapirämombrɨse iyavei tuvɨ rese; nda'ei ɨ reseño, ikwasa ɨ tuvɨ rese avei. Esepia Espíritu teiete oikwa sekokwer, Espíritu avei omombe'u mba'e supiete va'e yepi.

⁷ Evokoiyase oime mbosapɨ imboyekwasar:

⁸ Espíritu, ɨ, iyavei suvɨ; a'e mbosapɨ oyoya tuprɨ sekokwer yuvɨreko.

⁹ Yaroya revo ava remimombe'u; Tüpä remimombe'u rumo avɨye katu va'e ichui, esepia ni'ä Tüpä ombou Gwa'ɨrɨ gwemimombe'u gwer rupi.

¹⁰ Akoi vɨroya va'e Tüpä Ra'ɨrɨ vɨreko ite semimombe'u opɨ'a pɨpe, akoi ndovɨroyai va'e rumo Tüpä, semiräñeteai va'e nungar tëi vɨreko, esepia ndovɨroyai Tüpä ñe'ë Ta'ɨrɨ resendar.

¹¹ Ko Tüpä remimombe'u, a'e ombou yandeu tekovesa apɨre'ɨ̇ va'e, iyavei ko tekovesa Ta'ɨrɨ rese sekoi.

¹² Akoi oipɨsɨ va'e Tüpä Ra'ɨrɨ opɨ'a pɨpe, a'e vɨreko avei ko tekovesa; akoi ndoipɨsɨi va'e Tüpä Ra'ɨrɨ opɨ'a pɨpe, ndovɨrekoi ete tekovesa oyese.

Poromboarakwasa ipa va'e

¹³ Ko aikwachia peü, peroya va'e Tüpä Ra'ɨrɨ, peikwa agwä pe supiete pereko tekovesa apɨre'ɨ̇.

¹⁴ Yande rumo yayeroya Tüpä rese, esepia yaporanduse mba'e rese Tüpä remimbotar rupi, evokoiyase a'e osendu yande ñe'ë.

¹⁵ Esepia yaikwa ni'ä Tüpä osendu yande yeruresa, yaikwa avei mba'e yande porandusa ombou va'erä yandeu.

¹⁶ Akoi osepia va'e yande mboetasa Tüpä reroyasar oyemboangaipa va'e, a'e rumo nda'ei manosave narä, oyerurera sese, evokoiyase Tüpä omondora sekove agwä chupe, oime rumo angaipa a'e gweru manosa, peyerure evokoi nungar angaipa rese nda'ei peü.

¹⁷ Opakatu mba'e-mba'e tëi a'e angaipa; oime rumo angaipa ndayande rerasoi va'e manosave.

¹⁸ Yaikwa ni'ä vɨreko va'e Tüpä opɨ'a pɨpe, a'e ndoyapo iri angaipa, esepia Tüpä Ta'ɨrɨ osärö evokoi nungar, ichui karugwar ndopokoi ete sese.

¹⁹ Yaikwa ni'ä yande Tüpä ra'ɨrɨ yaikose, iyavei opakatu ava ndovɨroyai va'e Tüpä, a'e karugwar povrɨ pendar tëi yuvɨrekoi.

²⁰ Yaikwa avei ni'ä Tüpä Ra'ɨrɨ ouse ko ɨvɨ pɨpe, ombou arakwasa yandeu yaikwa va'erä Tüpä supiete va'e. Yaiko avei Ta'ɨrɨ Jesucristo rese, a'e avei Tüpä supiete va'e iyavei tekovesa apɨre'ɨ̇ va'e.

²¹ Che ra'ɨreta, peñearö tuprɨ katu akoi tüpä oroiko e'i tëi va'e sui.