1 Corintios 9 - Tüpä Ñe'ëngagwer

Pablo omombe'u tekokwer oyesendar

¹ Supiete che aikatu avei Jesús ñe'ë mombe'usar upendar mba'e pɨsɨ agwä viña, esepia che Jesús ñe'ë mombe'usar aiko. Supiete che asepia yande Yar Jesús iyavei che poravɨkɨsa pɨpe sui ni'ä peroya yande Yar peiko.

² Yepe nda'ei Jesús ñe'ë mombe'usar e'i ambuae ava yuvɨreko cheu viña; peü narä rumo che a'e ite aiko, esepia che remimombe'u pɨpe sui ni'ä yande Yar peroya peiko, ipɨpe sui avei ikwasa tuprɨ Jesús ñe'ë mombe'usar che rekosa peü.

³ Evokoiyase ko ñe'ësa amboyevɨ ava che reroɨrösar upe yuvɨreko:

⁴ Yareko ite ni'ä opakatu yaipɨsɨ va'erä tembi'u mba'e yaɨ'u va'erä avei,

⁵ iyavei inungar ambuae Jesús ñe'ë mombe'usar vɨraso ite gwembireko oyeupi yuvɨreko yepi, Jesús rɨvrɨ eta avei egwë e'i yuvɨreko, egwë e'i avei Pedro.

⁶ ¿Ore gweraño tie Bernabé rese oroporavɨkɨra ambuae mba'e rese ore rekove agwä?

⁷ ¿Uma sundao pi'ä omboepɨra oporavɨkɨ pɨpe tëi gwekove agwä viña? ¿Uma uvatɨ̇sar pi'ä, ndo'ui chira gwemitɨ̇ uva viña? ¿Uma ovesa rärösar pi'ä ndoɨ'ui chira ikambɨ omo'ëse viña?

⁸ Che nda'ei cheyesui tëi aipo a'e peü, esepia ni'ä Moisés porokwaita pɨpe avei aipo e'i yandeu.

⁹ Esepia oime ite ikwaprɨ Moisés porokwaita pɨpe: “Pemondo eme tɨvi yuru rese mba'e ikaru e'ɨ̇sa mba'e rä'ɨi oikambese yuvɨreko peü.” Supiete ko Tüpä aipo e'i va'e nda'ei tɨvi upeño,

¹⁰ yande reko tuprɨ agwä rese ni'ä aipo e'i yandeu. Esepia porokwaita ikwachiasa yandesui tëiete, akoi ava omongu'i va'e ɨvɨ iyavei akoi oikambe va'e mba'e rä'ɨi, oyoya osärö mba'e oipɨsɨ va'erä oporavɨkɨsa sui oyeupe narä yuvɨreko.

¹¹ Evokoiyase ore avei oroñotɨ̇ Tüpä ñe'ëngagwer pe pɨ'a pɨpe ore pe mbo'ese, sese avɨyeño aveira oroipɨsɨse mba'e pe sui oreyeupe narä viña.

¹² Esepia ambuae oikatu mba'e pɨsɨ agwä oyeupe narä yuvɨreko pe sui, evokoiyase ore avei ni'ä oroikatu mba'e pɨsɨ agwä pe sui ore poravɨkɨsa pɨpe viña. Ore rumo egwë ndoro'ei ete, esepia ore oroñemosaño ite tiñe'ë marä eme ko ñe'ësa Cristo rese yuvɨreko ore yapave.

¹³ Pe ni'ä peikwa ite akoi oporavɨkɨ va'e tüpäro rese yuvɨreko, a'e tüpäro sui avei ni'ä yuvɨrekove. Esepia oporavɨkɨ va'e mba'e mɨmba yukasa reropove'ësave, a'e yuvɨro'u avei mba'e mɨmba ro'o seropove'ëprɨ Tüpä upendar yuvɨreko yepi.

¹⁴ Egwë e'i avei yande Yar orekwai toipɨsɨ mba'e ipane va'e ko ñe'ësa mombe'usa pɨpe sui yuvɨreko oyeupe narä oyapave.

¹⁵ Che rumo ndaporandui ete mba'e pe rembiereko rese vichiko peü yepi, nda'ei tombou mba'e yuvɨreko cheu che yapave aipo aikwachia imondo peü. Che rumo evokoi nungar mba'e rese ayembovɨ'año ite. Yepe che yukaprɨ tëira tɨepore'ɨ̇ viña, ndaporandui chietera rumo mba'e rese peü ¡Esepia namokañɨ potai ete ko che yembovɨ'asa cheyesui!

¹⁶ Che rumo amombe'use ko ñe'ësa pɨsɨrösa resendar ava upe, ndiyai ayeeko mboɨvateai ipɨpe, esepia ni'ä che kwaita ite yapo agwä iyavei, ¡che paraɨsu itera ndamombe'uise ava upe ko ñe'ësa viña!

¹⁷ Tüpä ndache kwaise oñe'ë mombe'u agwä viña, che rumo che kere'ɨ̇sa pɨpe amombe'use; a'ese aipɨsɨra ichuindar porerekosa, egwë nda'ei rumo, esepia che amboavɨye ite Tüpä porokwaita vichiko.

¹⁸ Ndaporanduise mba'e rese peü amombe'use ko ñe'ësa pɨsɨrösa resendar, ipɨpe ayembovɨ'a a'e che vɨ'asa porerekosa nungar cheu; yepe aikatu mba'e rese che porandu agwä viña, che rumo egwë nda'ei ete.

¹⁹ Yepe che nda'ei ava povrɨve tëi aiko viña, che rumo che remimbotar rupi opakatu ava rembigwai nungar ayeereko, taseta katu ava ikere'ɨ̇ va'e Cristo reroya agwä che yapave.

²⁰ Esepia aikose judío pa'üve sekokwer rupi aikoveño, Yar upe imongere'ɨ̇ katu agwä yuvɨreko; egwë a'e ite, aikose ava Moisés porokwaita povrɨve yuvɨrekoi va'e pa'üve che avei ete mborokwaitavrɨve nungar aiko, nda'ei rumo iporokwaita povrɨve ite aiko imboavɨye agwä.

²¹ Iyavei ava ndoyuvɨrekoi va'e Moisés porokwaita povrɨve, che avei aiko inungar a'e yuvɨrekoi, egwë a'e tuprɨ avei imongere'ɨ̇ agwä yande Yar Tüpä upe vichiko, esepia ni'ä che rekokwer Cristo porokwaitavrɨve ite sekoi.

²² Iyavei no aikose ava yande Yar ndovɨroya tuprɨ vɨtei va'e pa'üve sekokwer nungar tuprɨ avei aiko Yar upe imongere'ɨ̇ katu agwä. Egwë a'e opakatu ava upe toñepɨsɨrö katu a'e avei yuvɨreko viya.

²³ Che ayapo ko opakatu mba'e ñe'ësa avɨye va'e pɨsɨrösa resendar, aipɨsɨ va'erä avei mba'e avɨye va'e ichui.

²⁴ Peikwa ni'ä gwayɨsa oimese, ava opakatu gwasu yuvɨnoñase yuvɨreko, ivava katu va'e gweraño rumo oipɨsɨ porerekosa yepi. Evokoiyase inungar ko ivava katu va'e, egwë peye avei pe rekokwer pɨpe Tüpä porerekosa pɨsɨ agwä peiko.

²⁵ Iyavei opakatu oyemoigätu va'e ogwayɨ agwä oñearö tuprɨ opakatu mba'e tëi sui oyemomarä e'ɨ̇ agwä yuvɨreko. A'e egwë e'i porerekosa ndipokopɨi va'e pɨsɨ agwä tëi yuvɨreko, yande rumo yayemomborarara porerekosa apɨre'ɨ̇ va'e pɨsɨ agwä yaiko.

²⁶ Evokoiyase che avei, nda'ei ava oya'uva-uva tëi va'e nungar aiko Tüpä remimbotar apo agwä iyavei che ndaikoi ava igwayɨ tëi va'e nungar.

²⁷ Che rumo mbigwai nungar che retekwer areko, amboyeroya uka pɨ'a ñemoñeta tuprɨsa upe, esepia ndaipotai ambuae ava mbo'e pare imomboprɨ tëi nungar gwayɨsa sui che yereko agwä.