1 Corintios 2 - Tüpä Ñe'ëngagwer

Ñe'ësa imombe'uprɨ Cristo atɨka agwer kurusu rese

¹ Iyavei che rɨvrɨ eta, che asose añe'ëse peü Tüpä suindar ñe'ësa supiete va'e yɨpɨndar ndikwasai va'e pɨpe, nañe'ëi ko ɨvɨ pɨpendar tëi ava mba'ekwasa pɨpe, ñe'ësa ɨvateai va'e pɨpe avei.

² Esepia akoi aikose pe pa'üve, ndachepɨ'añemoñetai ete ambuae mba'e rese, Jesucristo rekokwer rese, yatɨka agwer rese katu ite che pɨ'añemoñeta vichiko.

³ Iyavei ndachepirätäi, arɨrɨi avei che sɨkɨyepave peü asose,

⁴ iyavei akoi añe'ëse ñe'ësa pɨsɨrösa rese peü, ndaiporui ete rumo ñe'ësa ɨvateai va'e pe pɨ'a ñemoñetasa rerova agwä. Che rumo, Tüpä Espíritu pirätäsa pɨpe añe'ë peü,

⁵ a'ese peporeroyasa sekoira Tüpä pirätäsa rupi ete iyavei nda'ei chira ava ɨvɨ pɨpendar mba'ekwasa rupi tëi.

Tüpä oikwa uka mba'e ndikwasai va'e Espíritu pɨpe

⁶ Supiete, ore rumo oromombe'u ko ñe'ësa vɨreko va'e upe ñoite yeroyasa opɨ'a pɨpe oroñe'ë avei mba'e ikwaprɨ va'e rese. Nda'ei rumo ava mba'ekwasa ko ɨvɨ pɨpendar tëi nda'ei avei mborerekwar mba'ekwasa ko ɨvɨ pɨpendar a'e imborerekwasa rumo okañɨ tëi va'erä ite yuvɨreko.

⁷ Oroñe'ë katu arakwasa Tüpä suindar ndikwasai va'e rese, a'e yɨpɨve vɨreko va'e ɨvɨ apoe'ɨ̇ vɨteseve, a'e ko omboyekwa ramo va'e yandeu yaiko va'erä teko orɨ apɨre'ɨ̇ va'esave.

⁸ Ko ɨvɨ pɨpendar ava mborerekwareta rumo ndosendukwai ete ko ñe'ësa yuvɨreko, osendukwase rumo yuvɨreko viña, ndoyatɨka ukai chira yande Yar seko ɨvate, porañete va'e kurusu rese yuvɨreko viña.

⁹ Inungar Ikwachiaprɨ pɨpe aipo e'i: “Tüpä omoigätu mba'e ava gwaɨsupar upe a'e rumo mba'e ndosepiai va'e ite ava yuvɨreko yepi, iyavei ndipɨ'a ñemoñetai ete sese yuvɨreko.”

¹⁰ Tüpä rumo oikwa uka ite mba'e Espíritu pɨpe yandeu, esepia Espíritu oikwa tuprɨ ite opakatu mba'e ndikwasai va'e Tüpä suindar oiko.

¹¹ ¿Uma ava pi'ä oikwa ambuae ava pɨ'a ñemoñetasa, esepia espíritu gweraño ite ava pɨ'a ñemoñetasa oikwa? Egwë e'i avei Tüpä Espíritu gweraño ite oikwa Tüpä pɨ'a ñemoñetasa.

¹² Yande evokoiyase nda'ei ko ɨvɨ pɨpendar tëi espíritu yaipɨsɨ, egwë e'i rumo Espíritu Tüpä suindar ite yaipɨsɨ, yaikwa va'erä avei Tüpä porerekosa oporoaɨsusa pɨpe ombou va'e yandeu.

¹³ A'e ni'ä oromombe'u Tüpä Espíritu ore mbo'e va'e, nda'ei ñe'ësa ava tëi arakwasa sui. Egwë oro'e ko supiete va'e ñe'ësa espíritu suindar oromombe'u espíritu rese yuvɨrekoi va'e upe yepi.

¹⁴ Akoi ava ndovɨrekoi va'e Tüpä Espíritu opɨ'a pɨpe, ndoipɨsɨi ete mba'e Tüpä Espíritu suindar yuvɨreko, esepia chupe evokoi mba'e avɨye egwë e'i tëi va'e. Iyavei ndosendukwa katui ete yuvɨreko, esepia evokoi nungar mba'e sendukwasa Espíritu pɨpeño ite.

¹⁵ Akoi ava vɨreko va'e rumo Tüpä Espíritu opɨ'a pɨpe oikatu opakatu mba'e kwa agwä, iyavei ndipoi chietera ava oikatu va'e imondo mba'e tëi pɨpe.

¹⁶ Esepia Ikwachiaprɨ pɨpe aipo e'i: “¿Uma pi'ä oikwa yande Yar pɨ'a ñemoñetasa oiko? ¿Uma pi'ä oikatura imbo'e?” Yande rumo yareko yande Yar Cristo pɨ'a ñemoñetasa.