1 Corintios 14 - Tüpä Ñe'ëngagwer

Yaseka katura Tüpä suindar ñe'ësa mombe'u agwä

¹ Peseka katu pe yeaɨsu tuprɨ agwä peiko, a'eseve avei peporandura mba'ekwasa Tüpä Espíritu remimbou rese, ichuindar ñe'ësa mombe'u agwä.

² Akoi ava oñe'ë va'e ñe'ësa ndikwasai va'e pɨpe, a'e Tüpä upe oñe'ë; nda'ei ava upe tëi oñe'ë, esepia ndipoi ete ava iñe'ë rendukwapar. A'e rumo oñe'ë mba'e ndikwasai va'e rese espíritu rerekosa pɨpe, ndipoi ete rumo ava iñe'ë rendukwapar.

³ Esepia akoi ava omombe'u va'e Tüpä suindar ñe'ësa yasendukwa va'e pɨpe, a'e oipɨtɨ̇vɨï ambuae ava Tüpä rese iyeroya agwä, oporomongere'ɨ̇ katu oporombovɨ'a katu avei.

⁴ Akoi ava oñe'ë va'e ñepëi ñe'ësa ndikwasai va'e pɨpe, oyeupe narä tëi egwë e'i oiko; akoi ava omombe'u va'e rumo Tüpä suindar ñe'ësa ikwaprɨ, a'e ombopɨ'añemoñeta katu Tüpä rese Cristo reroyasar yuvɨrekoi va'e.

⁵ Che aipota opakatu peñe'ë va'erä ñe'ësa ndikwasai va'e pɨpe viña; avɨye katu rumo pemombe'ura Tüpä suindar ñe'ësa ikwaprɨ va'e peiko; esepia a'e avɨye katu ñe'ësa ndikwasai va'e sui, oimese rumo ava ñe'ësa ndikwasai va'e rendukwa uka tuprɨ agwä, a'ese avɨyeño oñe'ë Jesús reroyasar rovake ipɨpe sui ipɨ'añemoñeta katura Tüpä rese yuvɨreko.

⁶ Sese che rɨvrɨ eta, asose pe repia añe'ëse ko ñe'ësa ndikwasai va'e pɨpe peü, ndapesendukwai chira che ñe'ë viña, amombe'use rumo Tüpä oikwa uka va'e cheu mba'ekwasa supi tuprɨ va'e resendar, anise ñe'ësa Tüpä suindar, anise avei ambuae porombo'esa a'ese pesendukwara viña.

⁷ Mba'e yande remimombe'u rumo inungar akoi mba'e porasei rekasar imoñe'ëprɨ viña, inungar mimbɨ, arpa avei, esepia ndoyoya tuprɨise iñe'ëgwer yuvɨreko, ndayasendukwai ete evokoiyase mba'e-mba'e sapukaisa osä'a yuvɨreko.

⁸ Anise ko inungar mimbɨ nomoñe'ë tuprɨise vavasave narä yuvɨreko viña, ndipoi chietera ava oyemoigätu voi va'erä ovava agwä.

⁹ Pe ni'ä egwë peye avei peiko: akoi peñe'ëse ava upe ñe'ësa ndayasendukwai va'e pɨpe, ¿marä e'ira sendukwa peñe'ë yuvɨreko? ¡Evokoiyase peñe'ëño tëiete!

¹⁰ Supiete, seta iteanga ko ɨvɨ pɨpe oime ambuae-ae tëi ava ñe'ësa, oime avei rumo ava osendukwa va'e aipo nungar ñe'ësa.

¹¹ Akoi che ndasendukwaise ambuae ava ñe'ë, aikora evokoiyase inungar ambuae tekwa pendar tëi chupe, a'e ava evokoiyase inungar ambuae tekwa pendar tëi sekoira cheu.

¹² Pe ni'ä peipota pereko va'erä mba'ekwasa Tüpä Espíritu suindar yepi, sese peporandu katu mba'ekwasa Espíritu suindar rese opakatu Jesús reroyasar pɨtɨ̇vɨï agwä Tüpä rese yuvɨrekoi tuprɨ katu va'erä.

¹³ Sese akoi ava oñe'ë va'e ñe'ësa ndikwasai va'e pɨpe, toporandu rane Tüpä upe ambuae ava upe sendukwa uka tuprɨ agwä rese.

¹⁴ Esepia akoi che ayerurese ñe'ësa ndikwasai va'e pɨpe, supiete ayerure che espíritu pɨpe tëi, ipɨpe sui rumo ndasendukwai ete che yeruresa.

¹⁵ ¿Mba'e vo evokoiyase che ayapora? Supiete ayerurera pɨ'a ñemoñetasa avɨye va'e pɨpe, arakwasa pɨpe avei. Asapukaira pɨ'a ñemoñetasa avɨye va'e pɨpe, arakwasa pɨpe avei.

¹⁶ Esepia akoi nde eremboeteise Tüpä pɨ'a ñemoñetasa avɨye va'e pɨpe tëi, iyavei ñepëi ava osenduse nde ñe'ë, ndosendukwaise rumo nde yeruresa ndasekoi chietera nde rupi, esepia ni'ä ndosendukwai ete nde ñe'ë yuvɨreko.

¹⁷ Nde yeruresa revo avɨyeai viña, ipɨpe sui rumo ndereipɨtɨ̇vɨï ete ambuae ava eiko.

¹⁸ Avɨye ndeu a'e Tüpä upe esepia añe'ë katu ñe'ësa ndikwasai va'e pɨpe opakatu pe sui;

¹⁹ Jesús reroyasar ñemonu'äsave rumo aipota amombe'u va'erä poyandepo rupindar ñe'ësa sendukwa tuprɨ agwä, ambuae ava mbo'e tuprɨ agwä rese, ko ñe'ësa ndikwasai va'e ambuae diez mil ñe'ë rägwer yuvɨrekoi va'e sui.

²⁰ Che rɨvrɨ eta, pepɨ'añemoñeta eme chi'ïvä'emi pɨ'añemoñeta nungar pɨpe. Iyakatu rumo peikora kwakwa va'e pɨ'añemoñeta nungar pɨpe, peyemochi'ïvä'e katuñora rumo peiko mba'e naporäi va'e apoe'ɨ̇ agwä.

²¹ Ikwachiaprɨ araka'endar pɨpe aipo e'i: “Añe'ëra ko ava yuvɨrekoi va'e upe ñe'ësa ndikwasai va'e pɨpe, iyavei ambuae ava yuvɨrekoi va'e ñe'ë pɨpe, ichui rumo ndache mboyeroyai yuvɨreko, e'i yande Yar.”

²² Evokoiyase ko ñe'ësa ndayaikwai va'e pɨpe oñe'ëse ava a'e Jesús reroyasare'ɨ̇ yuvɨrekoi va'e upe narä, nda'ei rumo ava Jesús reroyasar yuvɨrekoi va'e upendar. Omombe'u va'e ñe'ësa avɨye va'e Jesús reroyasar yuvɨrekoi va'e upe, nda'ei rumo ava seroyasare'ɨ̇ yuvɨrekoi va'e upe.

²³ Esepia akoi Jesús reroyasar oñemonu'äpase yuvɨreko, oyoya gwasu peñe'ëse ñe'ësa ndikwasai va'e pɨpe tëi, ipare yuvɨroikese pe pa'üve Jesús reroyasare'ɨ̇ ndosendukwai va'e Tüpä suindar mba'e yuvɨreko, opakatu ko ndayarakwai va'e tëi e'ira yuvɨreko peü.

²⁴ Opakatu rumo peñe'ëse Tüpä suindar ñe'ësa yasendukwa va'e pɨpe, yuvɨroikese evokoi Jesús reroyare'ɨ̇ pe pa'üve anise ava ñotëise, a'e ae evokoiyase supiete ayavɨ che rekokwer Tüpä rovake e'ira peñe'ë renduse yuvɨreko.

²⁵ Egwë e'ira opɨ'a ñemoñetarai ndoyekwai va'e imbopore'ɨ̇pa uka oyeupe peñe'ë rendu ramose yuvɨreko, ipɨpe sui omboeteira Tüpä yuvɨreko, a'ese supiete katu Tüpä ite pereko peyese e'ira yuvɨreko peü.

Yayapora mba'e opakatu yande kwaita rupi ñemonu'äsave

²⁶ Che rɨvrɨ eta, peñemonu'äpase, oimera pe pa'ü pendar osapukai pota va'e sapukaisa Tüpä upendar, ambuae evokoiyase oipota ite ava mbo'e yuvɨreko, anise ambuae omombe'u pota ava upe mba'e oyeupe omboyekwa uka va'e Tüpä, ambuae oipota ite oñe'ë ñe'ësa ndikwasai va'e pɨpe, anise ambuae osendukwa uka pota avei ambuae ava upe ñe'ësa ndikwasai va'e. Opakatu rumo ko mba'e yayapora ambuae Jesús reroyasareta seroya katu agwä yuvɨreko.

²⁷ Akoi ava oñe'ëse ñe'ësa ndikwasai va'e pɨpe, toñe'ë ñuvɨrïo gweraño yuvɨreko, anise mbosapɨ ñepëi-pëi rupi; ñepëi evokoiyase osendukwa ukara iñe'ë ava upe oiko.

²⁸ Akoi ndipoise ite rumo ambuae ava a'e ñe'ësa ndikwasai va'e rendukwa uka agwä, ndiyai a'e oñe'ëra yuvɨreko pe ñemonu'äsave; oyeupeñomi evokoiyase a'e oñe'ëra ipɨpe yuvɨreko Tüpä upe.

²⁹ Egwë e'i tuprɨ aveira, oimese Tüpä ñe'ë mombe'usar, toñe'ë ñuvɨrïo anise mbosapɨ yuvɨreko, ambuae evokoiyase pe pa'ü pendar oyapɨsaka tuprɨra sese yuvɨreko supiete pi'ä o'esave.

³⁰ Akoi oipɨsɨ va'e Tüpä sui ñe'ësa ambuae ava ogwapɨ va'e a'eve öi, a'e evokoiyase topɨtu'uño ñe'ësa mombe'usa sui.

³¹ Evokoiyase egwë peyera, peñe'ë ñepëi-pëi opakatu ambuae osendu va'e mbo'e agwä, iyavei imongere'ɨ̇ katu agwä.

³² Akoi omombe'u va'e ñe'ësa Tüpä suindar, a'e oikatu aveira oñe'ë mombɨtu'u agwä,

³³ esepia Tüpä sekoi Tüpä mba'e avɨye va'e aposar ite, nda'ei mba'e naporäi va'e aposar. Iya ite rumo yayapora mba'e avɨye va'e Jesús reroyasar yande rekosa pɨpe,

³⁴ kuña upe rumo ndiyai ete iñe'ë agwä ñemonu'äsave, esepia ndipotasai ete iñe'ë agwä yuvɨreko chupe. A'e kuña yuvɨrekoira omer porokwaita rupi ete, inungar Moisés porokwaita pɨpe omombe'u va'e.

³⁵ Oikwa potase kuña mba'e yuvɨreko, iya omer upe oporandura gwëtäve yuvɨreko; esepia kuña upe ndiyai ete iñe'ë agwä mba'e rese pe ñemonu'äsave yepi.

³⁶ Peyapɨsaka katu ko ñe'ësa rese, nda'ei ni'ä pe rane pemombe'u Tüpä ñe'ëngagwer ava upe peiko, nda'ei avei peüñomi ou Tüpä suindar ñe'ësa.

³⁷ Akoi pe pa'ü pendar che Tüpä ñe'ëngagwer mombe'usar aiko e'iño tëi va'e, anise aikwa Espíritu suindar mba'e e'i va'e, iya rumo oikwa tuprɨ ko aikwachia va'e imondo peü, a'e yande Yar porokwaita resendar.

³⁸ A'e ndoyapɨsaka potaise rumo che ñe'ë rese, yande Yar avei ndoyapɨsakai chira iñe'ë rese.

³⁹ Sese che rɨvrɨ eta, peyemongere'ɨ̇ katu Tüpä suindar ñe'ësa ikwaprɨ va'e mombe'u agwä, ndiyai rumo ndapeipotai ambuae ava upe ñe'ësa ndikwasai va'e pɨpe iñe'ë agwä;

⁴⁰ peyapora rumo opakatu mba'e ñepëi-pëi pe kwaita rupi mba'e tuprɨ pɨpe.