1 Corintios 12 - Tüpä Ñe'ëngagwer

Mba'ekwasa Tüpä espíritu suindar

¹ Che rɨvrɨ eta, che aikwa uka pota peü ko mba'ekwasa resendar ñepëi-pëi peü Espíritu omondo va'e.

² Pe ni'ä kurïtëi peikwa tuprɨ ite yɨpɨndar Tüpä rese peiko e'ɨ̇ vɨtese, peyembopa uka mba'e ra'anga egwë e'i tëi noñe'ëi va'e upe peiko.

³ Sese, che aipota peikwa va'erä kurïtëi: “¡Ndipoi chietera Jesús naporäi sekokwer e'i va'e!”, esepia ni'ä oñe'ë Tüpä Espíritu pirätäsa pɨpe. Iyavei ndipoi chietera ava: “¡Jesús che Yar sekoi e'i va'e!”, esepia ni'ä noñe'ëi ete Espíritu Maräne'ɨ̇ pirätäsa pɨpe yuvɨreko.

Opakatu mba'ekwasa oyoya tuprɨ

⁴ Oime seta ambuae-ae tëi mba'ekwasa Espíritu suindar yande Jesús reroyasar yaiko va'e upe narä, a'e Espíritu rumo ñepëiño ite imondosar sekoi.

⁵ Seta avei oime mba'e yayapo va'erä yande Yar upe, a'e yande Yar rumo ñepëiño ite sekoi.

⁶ Iyavei seta oime ambuae mba'e Tüpä oyapo va'e yande rese opirätäsa pɨpe, Tüpä rumo ñepëiño ite sekoi. A'e oyapo opakatu ko mba'e ñepëi-pëi yande rese.

⁷ Tüpä rumo omboyekwa yande Espíritu rerekosa ñepëi-pëi yandeu opakatu yande reko tuprɨ agwä.

⁸ Espíritu pirätäsa pɨpe Tüpä omondo ñepëi vɨroyasar upe iñe'ë agwä arakwasa rese; iyavei ambuae upe omondo iporombo'e tuprɨ katu agwä omba'ekwasa pɨpe.

⁹ Ambuae upe evokoiyase omondo oyese yeroya tuprɨ katu agwä Espíritu pɨpe sui avei, ambuae upe omondo opirätäsa imba'easɨ va'e mbogwera agwä.

¹⁰ Ambuae oipɨsɨ pirätäsa mba'e poromondɨisa oyapo va'erä yuvɨreko. A'e ichui avei vɨreko ambuae ava omombe'u va'erä ñe'ësa Tüpä suindar yuvɨreko. Ambuae upe Tüpä omondo mba'ekwasa espíritu naporäi va'e iyavei Espíritu supi tuprɨ va'e kwa tuprɨ agwä, ambuae evokoiyase ichui avei oikatu ñe'ësa ndikwasai va'e Tüpä suindar pɨpe oñe'ë agwä; a'e ichui avei ambuae oikatu a'e ñe'ësa ndikwasai va'e mombe'u tuprɨ agwä ava upe.

¹¹ Egwë e'i Espíritu ñepëiño ite gwemimbotar rupi omondo ñepëi-pëi yande Jesús reroyasar yaiko va'e upe ko mba'ekwasa.

¹² Inungar yande retekwer resendar seta mba'e oime viña, a'e rumo ñepëiño ite. Egwë e'i avei Cristo.

¹³ Egwë ya'e avei opakatu, yepe yande pa'üve oime judío, nda'ei va'e judío, mbigwai nda'ei va'e avei mbigwai, yande rumo opakatu ñapirämombrɨ yaiko ñepëi va'e nungar yande reko agwä Espíritu ñepëi va'e pɨpe; a'e ñepëi Espíritu avei opa yaipɨsɨ.

¹⁴ Supiete yande rete resendar nda'ei ñepëiño mba'e, oime avei seta mba'e sese.

¹⁵ Iyavei yepe yande pɨ revo aipo e'ira yandeu viña: “Che nda'ei ndepo aiko, sese nda'ei nde rete resendar e'ira viña”, nda'ei chira rumo ichui tëi ndaseko iri chira yande rete rese.

¹⁶ Iyavei yepe yande nambi aipo e'ira viña: “Che nda'ei nde resa aiko, sese nda'ei nde rete resendar e'ira yandeu viña”, nda'ei chiaveira ichui tëi ndaseko iri chira yande rete rese.

¹⁷ Esepia opakatu tuprɨ yande rete sesa päve tëise, ndayasendui chietera evokoiyase mba'e viña. Anise yande rete yapɨsakwar päve tëise, ndayasëtui chietera evokoiyase mba'e viña.

¹⁸ Tüpä rumo ñepëi-pëi yande rese mba'e omondo senarä rupi tuprɨ gwemimbotar rupi.

¹⁹ Yande opakatu ñepëi ava rete resendar nungar päve tëise, nda'ei evokoiyase opakatu tuprɨ ava rete nungar yaiko.

²⁰ Supiete yepe seta mba'e yande rete rese, ñepëiño ite rumo yande rete.

²¹ Iyavei yande resa ndiyai aipo e'ira yande po upe: “Nde egwë ere tëi va'e eiko”; anise yande akä avei: “Nde egwë ere tëi va'e eiko.” nde'i chira yande pɨ upe.

²² Esepia, yande rete resendar mba'e avɨye nipirätäi va'e yandeu, a'e sese rumo yayeroya katu;

²³ iyavei yande rete rese mba'e ndayasaɨsu tuprɨi va'e, a'e rumo yamboyemonde tuprɨai sereko. Iyavei no yande rete resendar mba'e ndayamboyekwai va'e ava rembiepiave, a'e yayopɨ tuprɨ sereko,

²⁴ oime rumo ambuae yande rete resendar ndayayopɨi va'erä. Egwë e'i Tüpä yande rete resendar mba'e imoigätu tuprɨ, evokoiyase yande rete resendar mba'e ndayasaɨsu tuprɨi va'e imboeteiprɨ katu sekoi,

²⁵ tipo eme pɨ'a ñemoñetasa ndoyoyai va'e pe pa'üve, oyoya pe'añeko tuprɨ ñepëi-pëi peyese.

²⁶ Evokoiyase ñepëi yande pa'ü pendar upe mba'e tasɨse, opakatu ambuae upe avei tasɨ; anise ñepëi imboyeroyaprɨ sekoise, ambuae avei opakatu oyembovɨ'a yuvɨreko sese.

²⁷ Supiete pe inungar Cristo rete peiko, egwë peye ite ñepëi-pëi chupendar peiko.

²⁸ Tüpä oipota vɨroyasar pa'üve toime rane yɨpɨndar Jesús ñe'ë mombe'usar; ipare toime ava che ñe'ëngagwer mombe'u agwä, ichui ambuae upe iporombo'e agwä, ipare ambuae mba'e ndayasepiai va'e apo agwä, iyavei ambuae ava imba'easɨ va'e mbogwera agwä, ambuae ava pɨtɨ̇vɨïsar tasekoi, ambuae ava rekokwer rerogwata tuprɨ agwä tasekoi, ambuae ava evokoiyase toñe'ë ñe'ësa ndikwasai va'e pɨpe yuvɨreko.

²⁹ Nda'ei rumo opakatu ava Jesús ñe'ë mombe'usar yuvɨrekoi, iyavei nda'ei opakatu Tüpä ñe'ë mombe'usar yuvɨrekoi. Nda'ei opakatu oporombo'e yuvɨreko, ndaopakatui avei oyapo mba'e ndayasepiai va'e yuvɨreko,

³⁰ nda'ei opakatu vɨreko pirätäsa oporombogwera agwä yuvɨreko, iyavei nda'ei opakatu ndikwasai va'e ñe'ësa Espíritu suindar pɨpe oñe'ë yuvɨreko, ndaopakatui avei oikwa evokoi ñe'ësa rendukwa uka agwä ambuae ava upe yuvɨreko.

³¹ Peseka ru Espíritu suindar mba'ekwasa avɨye katu va'e peyeupe narä. Che rumo amombe'ura tekokwer avɨye katu va'e peü.