فیلیپیان 1 - کیتاب مقدّس به گیلکی (رشتی)1 جٚه پولُس و تیموتائوس، عیسی مسیحٚ ختمتکارأن، تومامٚ فیلیپی موقدسأن و اسقفأن و شماسأنٚ رِه کی مسیحٚ اَمرأ موتحد ایسید: 2 فیض و سلامتی جٚه اَمی پئر خودا و عیسی مسیح کی خوداوند ایسه بر شومأن ببه. دوعا و شوکرگزاری 3 هر وخت شمرَ بخأطر اَورم، می خودایَ شوکر کونم 4 و همیشه می تومامٚ دوعایأنٚ دورون شیمی همه‌تأنٚ رِه شادی اَمرأ دوعا کونم، 5 چره کی جٚه اوّلی روز تا هسأ، خوروم خبرٚ رسأنئنٚ میأن اَمی اَمرأ شریک بید. 6 یقین دأرم اونی کی ایتأ خوروم کار شیمی زیندیگی دورون شروع بوکوده، اونَ عیسی مسیحٚ وأگردستنٚ روزٚ رِه کامیلَ کونه. 7 مِره روایه کی در موردٚ تومامٚ شومأن اَطویی فیکر بوکونم، چره کی می دیلٚ دورون جا دأریدی، چونکی شومأن همه‌تأن می اَمرأ خودا فیضٚ دورون شیریکیدی، چی زنجیلٚ مره دٚوٚسته ببم و چی خوروم خبرٚ جأ دفاع کودَن‌دیبیم، یا اونٚ راست و دوروستی‌یَ ثابت کودَن‌دیبیم. 8 خودا شاهده کی خودٚ عیسی مسیحٚ دیلٚ ایحساسأنٚ اَمرأ، شیمی همه‌تأنٚ رِه موشتاقم. 9 می دوعا اَنه کی شیمی موحبت هَطو هَی ویشترَ به و شنأختن و خُب و بدٚ دأنستنٚ اَمرأ همرأه ببه، 10 کی بتأنید بهترینَ تشخیص بدید و مسیحٚ وأگردستنٚ روزٚ رِه، پاک و بی‌عیب 11 و پور جٚه پارسایی ثمره‌یأن بیبید کی عیسی مسیح شیمی زندیگی دورون به بار اَوره و اونٚ نتیجه خودا ستایش و جلال به. پولسٚ زینجیلأن و خوروم خبرٚ پخشَ بوستن 12 اَی برأرأن، خوأیم بدأنید، اونچی کی می سر بمو، برعکس باعیث بوبوسته کی اینجیلٚ کار پیش بوشو، 13 جوری کی تومامٚ کاخٚ نیگهبانأنَ و همه کسٚ رِه آشکارَ بوسته کی مسیحٚ وأسی زنجیلٚ دورون دٚرٚم؛ 14 و می زنجیلأن باعیث بوبوستید کی ویشترٚ برأرأنی کی مسیحٚ اَمرأ موتحد ایسیدٚ دیل قورصَ بٚه، کی تومامٚ دیل و جورأتٚ اَمرأ خودا کلامَ اعلام بوکونید و هیچی جأ نترسید. 15 اَنم بگم، بعضی‌یأن حسودی و ریقابت کودنٚ وأسی مسیحَ موعظه کونیدی، ولی بعضی‌یأنم خوروم نیتٚ اَمرأ؛ 16 اَشأن موحبتٚ جأ اَطو کونیدی، چره کی دأنیدی من خوروم خبرٚ دفاع کودنٚ وأسی اَیه دکفتم. 17 ولی اوشأن، پست و مقامٚ وأسی مسیحَ موعظه کونیدی، نه خالصٚ نیتٚ اَمرأ، اَ گومانٚ اَمرأ کی می درد و رنجأنَ زندانٚ دورون ایضافَه کونید. 18 ولی عایب نأره، مهم اَنه کی تومامٚ رأ و روٚشأنٚ اَمرأ مسیح موعظه ببه، چی قصد و نیت دوروست ببه، چی غلط! منم هَنٚ وأسی خوشحالم. بله، و بازم خوشحالی کونم، 19 چونکی دأنم شیمی دوعایأنٚ اَمرأ و عیسی مسیحٚ روحٚ کومکٚ اَمرأ، اَشأن باعیث بیدی من نجات بیأفم، 20 هَطو کی می دیل و جانٚ اَمرأ اینتظار کشئن‌درم و اومید دأرم کی هیچی وأسی شرمنده نبم، بلکی شوجاعتٚ تومامٚ اَمرأ، الأنم همیشه مأنستن، مسیح می جانٚ دورون جلال یأفه، چی بیمیرم، چی بمأنم. 21 چره کی مِره زندگی کودن مسیحه و مردن ایستفاده. 22 اگه وأستی اَ جانٚ دورون می زندگی‌یَ ایدامه بدم، اَن مِره ایتأ پور ثمرٚ کار و کوششه، پس نأنم کویتأیَ اینتخاب بوکونم! 23 چون اَ دوتأ میأن خیلی فأکش دکشَ درم: چره کی ناجه دأرم می بار و کوجَ اَ دونیا جأ جمَ کونم و مسیحٚ اَمرأ بِئسم، کی خیلی بهترم ایسه؛ 24 ولی می ایسَن اَ جانٚ دورون شِمرِه ویشتر لازمه. 25 چونکی اَنٚ جأ یقین دأرم، دأنم کی شیمی پیشرفت کودن و خوشحالی وأسی کی ایمأنٚ دورون ایتفاق دکفه، زنده مأنم و شیمی همه‌تأنٚ اَمرأ ایسٚم، 26 کی وختی دوواره بأیم شیمی ورجأ، شیمی ایفتخار در مسیح عیسی می وأسی لب به سرَ به. 27 فقط شیمی جأ خوأیم کی شیمی رفتار مسیحٚ اینجیلٚ اَمرأ جور در بأیه، کی چی بأیم و شمرَ بیدینم و چی نِئسم و شیمی جأ بشتأوم، می خیال جم ببه کی ایتأ روحٚ دورون قایم ایسَه‌ییدی و ایتأ جانٚ مأنستن، شانه به شانه اینجیلٚ ایمأنٚ وأسی جنگیدی، 28 و هیچ کارٚ دورون موخالفأنٚ جأ نوأ ترسئنید، کی هَن اوشأنٚ هلاکَ بوستن و شیمی نجاتَ نیشأن دهه، و اَن خودا جأ ایسه. 29 چونکی اَ ایفتخار شمرَ عطا بوبوسته کی نه فقط مسیحَ ایمأن بأورید، بلکی اونٚ وأسی عذابم بکشید. 30 چره کی شومأنم هو جنگَ کودَن‌دریدی کی مرَ اونٚ دورون بیده‌ییدی و اَسأ اشتأویدی کی هنوزم هونَ انجام دَئن‌درم. |
© 2010-2019 Gilak Media
Gilak Media