عِزرا 1 - کیتاب مقدّس به گیلکی (رشتی)

کوروش پارسی دستور

¹ کوروش، پارسٚ پادشا اوّلی سالٚ سلطنتٚ میأن، اَنٚ وأسی کی خوداوندٚ کلام کی اِرمیا زوانٚ اَمرأ بوگفته بوبوسته‌بو، به انجام فأرسه، خوداوند، کوروش، پارسٚ پادشا روحَ لمس بوکوده و اونم ایتأ دستور، خو تومامٚ سرزیمینأنَ اوسه کوده کی اَطویی اونٚ دورون بینیویشته بو:

² «کوروش، پارسٚ پادشا، اَطو فرمأیه: یهوه، آسمانأنٚ خودا، تومامٚ دونیا سرزیمینأنَ می دس بیسپرده و مرَ فرمان بدَه اورشلیمٚ میأن کی یهودا اوستانٚ دورون نهَه، ایتأ معبد اونٚ رِه چأکونم.

³ شیمی میأنی، هر کی اونٚ قوم شینه - خودایم اونٚ اَمرأ ببه - تأنه بشه اورشلیم کی یهودا اوستانٚ میأن نهَه و یهوه معبدَ چأکونه، ایسرائیلٚ خودا کی اویه حوضور دأره.

⁴ تومامٚ اوشأنی کی بِئسَه‌ییدی، هر جایی کی زندگی کونیدی، او سرزیمینٚ مردومأن وأستی اوشأنَ نقره و زر و مال و منال و چارپایأن فأدید و خوشأنٚ میلٚ اَمرأیم معبد رِه کی اورشلیمٚ میأن چأکوده به، پیش‌کشی‌یأنی‌یم تقدیم بوکونید.»

⁵ یهودا و بنیامینٚ خاندأنأنٚ پیله کسأن و کاهنأن و لاویأن، ینی تومامٚ کسایی کی خودا اوشأنٚ روحَ لمس بوکوده‌بو، ویریشتیدی کی بیشید اورشلیم و معبدَ اویه چأکونید.

⁶ تومامٚ اوشأنٚ همساده‌یأن، نقره و زر و مال و منال و چارپایأن و گیرانٚ چیزأن فأدنٚ اَمرأ اوشأنَ کومک بوکودیدی و هَطویم خوشأنٚ میلٚ اَمرأ پیش‌کشی‌یأنم فأدَه‌ییدی.

⁷ کوروشٚ پادشایم، خوداوندٚ معبدٚ ظرفأنَ کی نبوکدنصر اوشأنَ اورشلیمٚ جأ اوسأده‌بو و خو خودایأنٚ معبدٚ دورون بنَه‌بو، بیرون بأورد.

⁸ کوروش، پارسٚ پادشا، اوشأنَ خو خزانه‌دار، میترِداتٚ دسٚ اَمرأ بیرون بأورده، بأزین بیشمرده و فأدَه یوهودیأنٚ فرماندار، شِیشبَصَّرٚ دس.

⁹ ظرفأنی کی تحویل بدَه بوبوسته اَشأن بید: سی‌تأ لگن طلا جأ، هیزارتأ لگن نقره جأ، بیست و نُه‌تأ ظرفَ کی بوخور سوجأنه‌ییدی،

¹⁰ سی‌تأ پیاله طلا جأ، چأرصد و ده‌تأ جورواجورٚ پیاله نقره جأ و هیزارتأ ظرف و ظروفٚ دیگر.

¹¹ تومامٚ ظرف و ظروفأنٚ طلا و نقره، سرٚ هم پنج هیزار و چأرصدتأ بو. شِیشبَصَّر تومامٚ اوشأنَ، تبعید بوسته‌یأنٚ اَمرأ کی بابِلٚ جأ وأگردستَن دیبید اورشلیم، خو اَمرأ ببرده.