استر 2 - کیتاب مقدّس به گیلکی (رشتی)

استر شهبانو به

¹ چند وخت کی بوگوذشته، خشایارشاه غیظم کمَ بوسته و شهبانو وشتی کردکارأن و دستوری‌یَ کی اونٚ وأسی فدَه‌بو، پادشایَ یاد بمو.

² پادشا مشاورأن کی اونَ خدمت کودیدی، بوگفتید: «اَی پیله پادشا، ایجازه بدید شِمره خوشگلٚ دُخترأنی بیأفیم.

³ شومأن تأنیدی مامورأنی اینتخاب بوکونید کی تومامٚ ولایتأنٚ میأنی خوشگلٚ دُخترأنَ جمَ کونید و حرمسرا دورون کی شوشٚ قلعه میأنی ایسَه، بأورید. او دُخترأنَ خواجه هیجای دس فدید کی شیمی حرمسرایَ سرپرستی کونه و اسبابٚ سورخ آب سیفید آب اوشأنٚ اختیار بَنید.

⁴ او دُختری‌یَ کی پادشایَ خوش بأیه وأستی شهبانو وشتی جایَ بیگیره.» پادشا اَ پیشنهادَ قوبیل بوکوده و اونَ انجام بدَه.

⁵ شوشٚ قلعه میأنی، ایتأ یهودی جٚه بِنیامینٚ قبیله زندگی کودی کی مردخای نام دأشتی. مردخای، یائیرٚ زأی، یائیر، شمعی زأی و شمعی، قِیسٚ زأی بو.

⁶ قِیس جٚه اسیرأنی بو کی نبوکدنصر - پادشا بابِل - اوشأنَ اورشلیمٚ جأ پادشا یهودا اَمرأ کی اونٚ نام یهویاکین بو، به اسارت ببرده‌بو.

⁷ مردخای، قِیسٚ نتیجه، ایتأ عمو دُختر دأشتی کی اونٚ نام هَدَسه بو ولی اونَ «استر» دوخوأدیدی. استر خوش هیکل و خوش برو رو بو. مردخای بعدٚ اَنکی استرٚ پئر و مار بمَردیدی، اونَ خو دُخترٚ مأنستن پیلَه کوده.

⁸ وختی کی پادشا خو دستورَ اعلام بوکوده، دُخترأنٚ زیادی‌یَ کاخٚ شوشٚ میأنی بأوردید و هیجایَ کی دُخترأنٚ سرپرست بو، بیسپردیدی. اوشأنٚ میأنی استرم ایسَه‌بو.

⁹ هیجای استرٚ جأ اَنٚ خوش بمو و اونَ پسندَ کوده. هَنٚ وأسی هو وخت اونَ اسبابٚ سورخ آب سیفید آب فدَه و ایتأ برنامه‌یٚ غذای مخصوص اونٚ‌ره تعیین بوکوده و هفت‌تأ ندیمه، پادشا کاخٚ جأ اونٚ اختیار بنَه. بأزین استرَ و اونٚ ندیمه‌یأنَ بهترین جاجیگای حرمسرا اوسه کوده.

¹⁰ استر خو قوم و خو فامیلَ کسی‌یَ نوگفته‌بو، چره کی مردخای اونٚ جأ اَطویی بخوأسته‌بو.

¹¹ مردخای هر روز حرمسرای صحنٚ جُلُو رأ شویی تا بیدینه استرٚ احوال چوطویه و اونٚ جأ خبر بیگیره.

¹² یک سال زمان ببرده کی دُخترأنَ پادشا رِه چأکون وأکون بوکونید. اوشأن شیش ماه روغنٚ مُرٚ اَمرأ و شیش ماه عطرأن و اسبابٚ سورخ آب سیفید آبٚ اَمرأ بزک بوستیدی تا اوشأنٚ نوبت فأرسه کی خشایارشاه ورجأ بیشید.

¹³ اَطویی بو کی هر دُختری، حرمسرا جأ پادشا کاخٚ دورون شویی، تأنستی خو اَمرأ هرچی اَنٚ دیل خوأیه ببره.

¹⁴ هو دُختر، شب کی پادشا کاخٚ دورون شویی و صُب اویه جأ بیرون اَمویی، ایتأ بخشٚ دیگرٚ حرمسرا شویی کی پادشا خواجه، شعشغاز، اونٚ رئیس بو و پادشا زنأکأنَ سرپرستی کودی. او زنأی دِه نتأنستی پادشا ورجأ وأگرده، مگر اَنکی پادشایَ اونٚ جأ خوش بمو بی و اونَ به نام دوخوأده‌بی.

¹⁵ وختی نوبتٚ استر، ابیحایلٚ زأی و مردخای عمو دُختر، فأرسه تا پادشا ورجأ بشه، اون تنها چیزأنی‌یَ بخوأسته کی هیجای، اونَ بوگفته‌بو. اَطویی همه‌تأن کی اونَ ده‌ییدی، اوشأنٚ نظر جلبَ بوسته.

¹⁶ پس دهمی ماهٚ میأنی، کی ماهٚ طیبت گفتیدی، هفتمی سالٚ خشایارشاه پادشایی، استرَ کاخٚ دورون، پادشا ورجأ ببردیدی.

¹⁷ خشایارشاه استرَ جٚه دُخترأنٚ دیگر ویشتر خوش بمو و اونَ دوس بدأشته. هَنٚ وأسی شهبانو وشتی تاجَ اونٚ سر بنَه و اونَ شهبانو بوکود.

¹⁸ بأزین پادشا استرٚ وأسی، ایتأ پیله‌دأنه مهمانی خو اَمیرأن و سردارأنٚ‌ره بیگیفته. هو روز خشایارشاه دستور بدَه کی تومامٚ ولایتأنٚ میأنی تعطیل ببه و خو کرَمٚ جأ مردومَ هدایایی فَده.

مردخای، هامانٚ نقشه‌یَ لو دهه

¹⁹ وختی کی دُخترأنَ ایوار دِه جمَ کودیدی، پادشا مردخای‌یَ ایتأ پیله مقام فدَه.

²⁰ ولی استر هنوز هیکسٚ‌ره خو قومیّت و خو فامیلی‌یَ آشکارَ نوکوده‌بو، چره کی مردخای اونٚ جأ بخوأسته‌بو هیکسَ اَ رازَ آشکارَ نوکونه و استر هنوزم مردخای جأ کی اونٚ ورجأ پیله بوسته‌بو دستور فیگیفتی.

²¹ او وختأن کی مردخای پادشا ورجأ خدمت کودی، دو نفر جٚه خواجه‌یأن کی اوشأنٚ نام بغتان و ترش بو و کاخٚ پرده‌دار بید، پادشا جأ کینه به دیل دأشتیدی و نقشه بکشه‌ییدی کی اونَ بوکوشید.

²² ولی مردخای اَ نقشه جأ وأخبرَ بوسته و شهبانو استرَ بوگفته. استرم، مردخای گبأنَ پادشا رِه تعریف بوکوده.

²³ وختی واورس داورس بوکودید و دوروستی‌یٚ اَ نقشه آشکارَ بوسته، او دوتأ خواجه‌یأنَ دار بزه‌ییدی و اَ ماجرا تاریخٚ کیتابٚ دورون، پادشا جُلُو بینیویشته بوبوسته.