دانیال 6 - کیتاب مقدّس به گیلکی (رشتی)دانیال، شیرأنٚ چاهٚ دورون 1 داریوش صلاح بدأنسته کی صد و بیست‌تأ اوستاندارَ تومامٚ خو مملکتٚ رِه تعیین بوکونه. 2 و سه‌تأ وزیرم اینتخاب بوکوده کی اوشأنَ نظارت بوکونید کی دانیال ایتأ جٚه اوشأن بو. پادشا دستور بدَه کی تومامٚ اوستاندارأن، وأستی او وزیرأنَ حیساب کیتاب پس بدید تا پادشا ضرر و زیانی نیدینه. 3 پادشا خوأستی دانیالَ مسئولٚ تومامٚ خو مملکت چأکونه چونکی الباقی وزیرأن و استاندارأنٚ جأ باهوشتر و داناتر بو. 4 هَنٚ وأسی وزیرأن و اوستاندارأن بهانه دونبأل گردستیدی کی دانیالٚ حکومتی کارأنٚ وأسی اونٚ جأ شکایت بوکونید ولی نتأنستیدی هیچ بهانه‌یی جورَ کونید کی اونَ محکوم بوکونید چونکی دانیال امین بو و هیچ خطا یا ایشتباهی اونٚ جأ سر نزه‌یی. 5 پس همدیگرَ بوگفتیدی: «هیوخت نتأنیم دانیالٚ متهم کودنٚ وأسی هیچ عیب و ایرادی بیأفیم، مگه اَنکی ایتأ ایراد اونٚ خودا شریعتٚ دورونی وأمجیم.» 6 بأزین وزیرأن و اوستاندارأن همدیگرٚ اَمرأ بوشوییدی پادشا ورجأ و بوگفتیدی: «داریوشٚ پادشا تا اَبد زنده بمأنه. 7 اَمأن، تومامٚ وزیرأن، حاکمأن، اوستاندارأن، مشاورأن و فرماندارأن همدیگرٚ اَمرأ مشورت بوکودیم و صلاح بیده‌ییم کی پادشا ایتأ حوکم بده و قدغن بوکونه کی اگه کسی تا سی روز جٚه خودا یا جٚه اینسأنی به جز شومأن، اَی پادشا، درخوأستی بوکونه، شیرأنٚ چاهٚ دورون تأودَه ببه. 8 اَی پادشا، هسأ دستور بدید اَ حوکم بینیویشته ببه و اونَ مُهر بوکونید تا اَطویی مادأن و پارسأنٚ قانونٚ میأن جٚه بین نیشه و تغییر نوکونه.» 9 داریوشٚ پادشا دستور بدَه او حوکمَ بینیویسید و اونَ مُهر بوکوده. 10 وختی دانیال بیشنأوسته کی او حوکم مُهر بوبوسته، فأرسه بخانه و بوشو خو بالاخانه کی اونٚ پنجره‌یأن اورشلیمٚ طرف وازَ بوستی، چونکی همه‌تأ روز عادت دأشتی هویه سه بار زانو بزنه و خودا حوضور دوعا و ستایش بوکونه. 11 وختی او مردأکأن همدیگرٚ اَمرأ بموییدی، بیده‌ییدی کی دانیال خو خودا ورجأ دوعا کودن دره و کومک درخوأست کودن دره، 12 بوشوییدی پادشا ورجأ و اونٚ حکمٚ وأسی پادشا اَمرأ گب بزه‌ییدی: «اَی پادشا، مگه شومأن شیمی حوکمَ مهر نوکودید کی هر کی اَ سی روزٚ میأن جٚه خودا یا هر اینسأنی به جز شومأن، اَی پادشا، درخوأست بوکونه، شیرأنٚ چاهٚ دورون تأودَه ببه؟» پادشا بوگفته: «به قانونٚ مادأن و پارسأن، اَ فرمان جٚه بین نیشه و پا بر جا مأنه.» 13 اوشأن، پادشایَ بوگفتیدی: «دانیال، کی جٚه یهودی اسیرأن ایسه، اَی پادشا، شمرَ ایطاعت نوکونه و شیمی حوکمَ کی مُهر بوبوسته‌بو، پشتٚ گوش تأوده. اون همه‌تأ روز سه دفَه دوعا کونه.» 14 پادشا وختی اَ گبأنَ بیشنأوسته، اونَ خیلی غیظَ گیفته و تصمیم بیگیفته کی دانیالَ نجات بده و تا غروب اونٚ نجاتٚ وأسی تقلا کودی. 15 بأزین او مردأکأن دوواره همدیگرٚ اَمرأ بوشوییدی پادشا ورجأ و بوگفتیدی: «اَی پادشا، دأنیدی کی مادأن و پارسأنٚ قوانین اَطویی ایسه کی هر حکمی یا دستوری کی پادشا صادر بوکونه، عوضَ نیبه.» 16 هَنٚ وأسی پادشا فرمانٚ اَمرأ دانیالَ بأوردید و تأودَه‌یید شیرأنٚ چاه دورون. پادشا دانیالَ بوگفته: «ببه کی تی خودا کی اونَ همیشه پرستش کونی، ترَ نجات بده.» 17 ایتأ پیله سنگم بأوردیدی بنَه‌ییدی چاه دَهنه سر و پادشا خو انگوشتری و خو اَمیرأنٚ انگوشترأنٚ اَمرأ چاه دَهنه‌یَ مُهر و موم بوکوده تا دانیالٚ وضع و اوضاع عوضَ نبه. 18 بأزین پادشا وأگردسته بوشو خو قصرٚ دورون تومامٚ شب هیچی نوخورده و هیچ خوشگذرانی‌یی اونٚ رِه فراهم نوکودید و نتأنسته بوخوسه. 19 خروس خوأن پادشا ویریزه و عجله اَمرأ شه شیرأن چاه سر. 20 وختی چاه سر فأرسه، ناله اَمرأ دانیالَ دوخوأنه و اونٚ جأ وأورسه: «اَی دانیال، خادمٚ خودایٚ زنده، تی خودا کی تو اونَ همیشه پرستش کونی بتأنسته ترَ شیرأنٚ جأ نجات بده؟» 21 دانیال جواب بدَه: «پادشا تا اَبد زنده بمأنه! 22 می خودا خو فرشته‌یَ اوسه کوده کی شیرأنٚ دهنَ دَوده تا مرَ زخمی نوکونید چون خودا ورجأ بی‌گوناه بوم و هَطویم، اَی پادشا، شیمی ورجأ، هی ذره ایشتباه نوکودم.» 23 پادشا خیلی خوشحالَ بوسته و فرمان بدَه دانیالَ چاه جأ بیرون بأورید. وختی اَ کارَ بوکودیدی، بیده‌یید دانیال هی ذره صدمه نیده، چونکی خو خودایَ توکل بوکوده‌بو. 24 پادشا دستورٚ اَمرأ تومامیٚ کسأنی‌یَ کی دانیالَ ایفترا بزه‌بید، بأوردید و اوشأنَ زن و زأکأنٚ اَمرأ شیرأنٚ چاه دورون تأودَه‌یید. اوشأن چاه تأن فئنرسه‌بید کی شیرأن اوشأنَ فُتُرکستیدی و تومامٚ اوشأنٚ خاشأنَ بشکنه‌ییدی. 25 بأزین داریوشٚ پادشا به تومامٚ میلتأن و قومأن و زبانأنی کی تومامی زیمینٚ دورون زندگی کودید اَطویی بینیویشته: «سلامتی‌یٚ فراوان بر شومأن! 26 فرمان دهم کی تومامٚ مردومأنٚ سرتاسرٚ می پادشایی وأ دانیالٚ خودا جُلُو ترسان و لرزان بیبید! چونکی اون خودایٚ زنده و اَبدی ایسه. اونٚ پادشایی نابودَ نیبه و اونٚ قودرت پایانی نأره. 27 اونه کی نجات دهه و آزادَ کونه. آسمان و زیمینٚ سر نیشأنه‌یأن و معجزه‌یأنَ انجام دهه. اون دانیالَ، شیرأنٚ چنگالٚ جأ نجات بدَه.» 28 هَنٚ وأسی دانیال، داریوش و کوروشٚ پارسی سلطنتٚ میأن موفق بو. |
© 2010-2019 Gilak Media
Gilak Media