۱پطرس 5 - کیتاب مقدّس به گیلکی (رشتی)

روحأنی رهبرأن یا ریش سیفیدأن و جوانأن

¹ من کی خودم روحأنی رهبرأنٚ جأ ایسم و مسیحٚ رنج کشئنٚ شاهدم و هَطویم او جلالٚ جأ کی آشکار به، شیریکم، شیمی روحأنی رهبرأنَ تأکید کونم:

² خودا گله‌یَ کی شیمی دس بیسپرده بوبوسته، شبانی و نظارت بوکونید نه به زور بلکی میل و رغبتٚ اَمرأ، هوطویی کی خودا خوأیه، نه نامشروعٚ نفعٚ وأسی، بلکی ایشتیاقٚ اَمرأ.

³ کسأنی‌یَ کی شیمی دس بیسپرده بوبوستید سروری نوکونید، بلکی گله رِه نمونه بیبید،

⁴ کی او وختی کی شبانأنٚ رئیس ظوهور کونه، تاجٚ جلالَ کی هیوخت جٚه بین نیشه، اونٚ دسٚ جأ فیگیرید.

⁵ اَی جوانأن، شومأنم روحأنی رهبرأنٚ جأ ایطاعت بوکونید. همه‌تأنْ کس‌کسٚ وأسی، شیمی کمرَ فروتنی اَمرأ دٚوٚدید، چره کی «خودا مغرورٚ آدمأنٚ جُلُو ایسه، ولی فروتنٚ آدمأنَ فیض بخشه.»

⁶ پس خودا قودرتمندٚ دسأنٚ جیر فروتن بیبید کی خوروم وختٚ رِه شمرَ سربولندَ کونه.

⁷ تومامٚ شیمی نیگرانیأنَ خوداوندَ بیسپأرید چونکی شومأن اونٚ رِه ارزش دأریدی.

⁸ شیمی حواس بمأنه و شمرَ بپأیید چره کی شیمی دوشمن، ایبلیس، ایتأ شیرٚ مأنستن کی نعره زنه، گردستَن‌دره و کسی دونبأل گرده کی اونَ فٚوٚره.

⁹ پس شیمی ایمأنٚ دورون قایم بیبید و اونٚ جُلُو بِیسید، چره کی دأنیدی شیمی برأرأنم دونیا همه جا اَ رنجأنٚ دورون دکفتیدی.

¹⁰ بعدٚ اَنکی ایتأ کوجه مودّت زمأت رنج بکشه‌ییدی، خودایی کی تومامٚ فیض اونٚ جأ ایسه، کی شمرَ در مسیح دعوت بوکوده کی خو جلالٚ اَبدی دورون شریک بیبید، خودش شمرَ دوواره راستَ کونه و شمرَ اوستوار، قودرتمند و پا بر جا کونه.

¹¹ توانایی تا اَبد خودا شین ببه. آمین.

آخری سلامأن

¹² سیلاسٚ یاری اَمرأ کی مِره ایتأ برأرٚ امین ایسه، اَ چن خطَ خولاصه شِمرِه بینیویشتم کی شمرَ تشویق بوکونم و شهادت بدم کی هَن خودا حقیقی فیضه. اونٚ دورون اوستوار بِیسید.

¹³ او خأخوری کی شیمی اَمرأ اینتخاب بوبوسته و بابِلٚ میأن ایسَه شمرَ سلام رسأنه و هَطویم مَرقُس کی خو ایمأنٚ وأسی می پسره.

¹⁴ سلام علیکٚ موقع، کس‌کسَ موحبتٚ اَمرأ مأچی بدید. سلامتی و آرامش تومامٚ شِمرِه ببه کی مسیحٚ شین ایسید.