۱پطرس 4 - کیتاب مقدّس به گیلکی (رشتی)

خودا وأسی زندگی کودن

¹ پس جٚه اَ خأطر کی مسیح خو جسمٚ دورون رنج بکشه، شومأنم هَه تصمیمٚ اَمرأ مسلح بیبید، چونکی او کسی کی خو جسمٚ دورون رنج بکشه دِه گوناه اَمرأ کاری نأره.

² و اَطویی بقیه‌یٚ خو عمرَ جسمٚ دورون، نفسٚ ناجورٚ خوأسته‌یأنَ خدمت نوکونه بلکی خودا ایراده انجام دَئنٚ وأسی گوذرأنه.

³ چره کی هر کاری کی خودا نشناسٚ قومأن دوس دأریدی و شومأن قبلٚ اَن شیمی عمرٚ دورون انجام بدَه‌یید، وسته، ینی شیمی روزأنَ اَ کردکارأنٚ اَمرأ گوذرأنه‌ییدی: هرزگی، نفسٚ شهوتأن، مشروب‌خوری، عیش و نوش و بُت‌پرستی کی خجالت‌‌آوره.

⁴ اوشأن قاقَ بیدی کی هسأ تومامٚ اَ لاابالی‌گری سیلٚ دورون شومأن دِه اَشأنٚ اَمرأ شرکت نوکونیدی و شمرَ فحش و فلاکت دیهیدی.

⁵ ولی اوشأن او کسی‌یَ کی آماده‌یه زنده‌یأن و مورده‌یأنَ داوری بوکونه، وأ حیساب پس بدید.

⁶ هَنٚ وأسی‌یه کی حتی اوشأنی‌یَ کی الأن بمردیدی بشارت بدَه بوبوسته کی اگه چی جٚه نظرٚ جسمأنی تومامٚ مردومأنٚ مأنستن محکوم بوبوستید، ولی جٚه نظرٚ روحأنی خودا ورجأ زندگی کونید.

⁷ همه چی تومامَ بوستن نزدیکه. پس شیمی حواسَ جمَ کونید و پرهیزکار بیبید کی بتأنید دوعا بوکونید.

⁸ جٚه هر چی مهمتر اَنه کی کس‌کسَ دیل و جانٚ اَمرأ موحبت بوکونید، چره کی موحبت ایتأ عالمه گونایأنَ پوشأنه.

⁹ کس‌کسَ بی‌غُرغُر و شکایت دعوت بیگیرید.

¹⁰ هر تأ جٚه شومأن هر عطایی اَمرأ کی خودا جأ فیگیفتیدی، کس‌کسَ خدمت بوکونید و اَطویی خودا جورواجورٚ فیضٚ وأسی خوروم سرکارگرأن بیبید.

¹¹ اگه کسی موعظه کودَن‌دره، وأ جوری گب بزنه عینٚ خیالٚ خودا گب زِئن دره؛ و اگه کسی خدمت کونه، او قوّتٚ اَمرأ خدمت بوکونه کی خودا اونَ فدِه، کی همه‌تأ کارٚ دورون خودا نام عیسایٚ مسیحٚ وأسی جلال بیأفه. جلال و قوّت خوداوندٚ شین ببه تا اَبدالاباد. آمین.

ایمأنٚ وأسی رنج کشئن

¹² اَی عزیزأن، جٚه اَ آتشی کی آزمایش بوستنٚ وأسی شیمی میأن رأ دکفته، قاقَ نیبید و خیال نوکونید کی ایتأ عجیبٚ ایتفاق شمرَ دکفتن دره،

¹³ بلکی جٚه اَ خأطر خوشحال بیبید کی عیسی مسیحٚ رنجأنٚ دورون شریکیدی، کی اونٚ جلالٚ ظوهورٚ وخت، تومام و کمال شاد بیبید.

¹⁴ خوش به حالٚ شومأن اگه مسیحٚ نامٚ وأسی شمرَ فحش و فلاکت دیهیدی، چره کی روحٚ جلال کی خودا روح ایسه، بر شومأن قرار گیره.

¹⁵ اگه رنج کشیدی، نوکونه کی آدم‌کوشی، دوزدی، شرورٚ کارأن یا حتی فوضولی وأسی ببه.

¹⁶ ولی اگه مسیحی بوستنٚ وأسی رنج کشئن دریدی، خجالت زده نیبید بلکی جٚه اَ خأطر کی اَ نام شیمی سر نهَه، خودایَ جلال بدید.

¹⁷ چونکی هسأ وختی ایسه کی داوری وأ خودا خانه جأ شروع ببه؛ و اگه اونٚ شروع اَمی جأ ببه، آخر عاقبتٚ اوشأنی کی خودا انجیلٚ جأ ایطاعت نوکونیدی، چی به؟

¹⁸ و «اگه دوروستکارٚ آدم سختی اَمرأ نجات یأفه، خودا نشاسأن و گوناهکارأنٚ سر چی اَیه؟»

¹⁹ پس اوشأنی کی خودا ایراده اَمرأ رنج کشیدی، وأستی خوشأنٚ جانَ خودایَ بیسپأرید کی امینٚ خالق ایسه و خوروم کارأنَ ایدامه بدید.