۱پطرس 3 - کیتاب مقدّس به گیلکی (رشتی)زنأکأن و مردأکأن 1 هَطویم شومأن، اَی زنأکأن، شیمی مردأکأنٚ ورجأ موطیع بیبید کی اگه بعضی‌یأن خودا کلامٚ جأ ایطاعت نوکونید، بی اَنکی گبی بزوأن بأورید، فقط شیمی رفتارٚ وأسی ایمأن بأورید، 2 وختی دینیدی کی شومأن پاکی و خوداترسی اَمرأ زندگی کونیدی. 3 شیمی قشنگی نوأ شیمی ظاهرٚ چأکون وأکون، مثلاً ببافته گیسأن و جواهرأن و اشرافی لیباسأنٚ جأ ببه 4 بلکی وأ شیمی باطنی اینسانیتٚ جأ ببه کی روحٚ آرام و ملایم دأشتنٚ اَمرأ بزک بوبوسته دره و اَ زیبایی دوچلکستنی نی‌یه و خودا چومأنٚ جأ خیلی ارزش دأره، 5 چره کی قدیمٚ موقدّسٚ زنأکأن کی خودایَ اومید دأشتیدی خوشأنَ اَطویی چأکودیدی. اوشأن، خوشأنٚ مردأکأنٚ ورجأ موطیع بید، 6 هوطو کی سارا ایبراهیمَ گوش کودی و اونَ خو سرور دوخوأدی. شومأنم اگه خوروم کارَ بوکونید و شیمی دیلٚ دورون نترسید، اونٚ زأکأن بیدی. 7 هَطویم شومأن، اَی مردأکأن، زندگی دورون شیمی زنأکأنٚ مولاحظه‌یَ بوکونید و اوشأنٚ اَمرأ جنس ظریفترٚ مأنستن، ایحترامٚ مره رفتار بوکونید، نوکونه شیمی دوعایأن مستجاب نبه، چره کی جٚه حیاتی کی فیضٚ هدیه ایسه، شیمی مأنستن ارث بریدی. دوروستکاری وأسی رنج کشئن 8 خولاصه کی شومأن همه‌تأن هم‌دیل و همدرد بیبید، کس‌کسَ برأرٚ مأنستن دوس بدأرید و دیلسوج و فروتن بیبید. 9 بدی‌یَ بدی اَمرأ و فحشَ فحشٚ اَمرأ جواب ندید بلکی در عوض، برکت طلب بوکونید چونکی هَنٚ وأسی دعوت بوبوستیدی کی برکتَ ارث ببرید. 10 چونکی «هر کی حیاتَ ناجه دأره و خوأیه خوروم روزأن بیدینه وأسی بدی‌یَ خو زوانٚ جأ دور بدأره و جوفت و کلکَ خو لبأنٚ جأ. 11 وأسی بدی جأ رو وأگردأنه و خوروم کارأن بوکونه، آرامشٚ رِه وأمجه و اونٚ دونبأل ببه. 12 چونکی خوداوندٚ چوم پارسا آدمأنَ فندره و اوشأنٚ دوعایَ گوش دهه ولی خو رویَ بدکارأنٚ جأ وأگردأنه.» 13 اگه خُبی کودنٚ وأسی غیرت دأریدی، کی تأنه شمرَ ضرر بزنه؟ 14 ولی خوش به حالٚ شومأن، حتی اگه دوروستکاری وأسی عذاب کشیدی! «جٚه اونچی کی اوشأن ترسیدی، شومأن نوأ ترسئنید و خوفٚ اَمرأ زندگی نوکونید.» 15 وأستی شیمی دیلٚ دورون مسیحَ به عنوانٚ خوداوند، موقدّس بدأنید. همیشه آماده بیبید هر کی شیمی جأ وأورسه چره اومیدوار ایسیدی، اونٚ جوابَ بدید ولی مولایمت و خوداترسی اَمرأ. 16 شیمی ویجدانَ راحت بدأرید تا اوشأنی کی درباره‌یٚ شیمی خوروم کارأنی‌یَ کی مسیحٚ وأسی انجام دیهید، ناجورٚ گبأن زنیدی، خوشأنٚ گبأنٚ وأسی شرمنده بیبید. 17 چره کی اگه خودا بخوأیه، بهتره خوروم کارأنٚ وأسی رنج بکشید تا ناجورٚ کارأنٚ وأسی. 18 چره کی مسیح هم ایوار گونایأنٚ وأسی رنج بکشه، ایتأ پارسا، بدکارٚ آدمأنٚ وأسی، کی شمرَ خودا ورجأ بأوره. جٚه نظرٚ جسمأنی بمرده ولی جٚه نظرٚ روحأنی زندَه بوسته، 19 و هَطویم بوشو و اَ ماجرایَ اسیرٚ روحأنَ اعلام بوکوده، 20 هو روحأنی کی قدیمٚ روزأن نافرمانی بوکوده‌بید، او وختی کی نوحٚ روزگارٚ دورون کشتی بساخته بوستَن دوبو و خودا، صبر و حوصله اَمرأ اینتظار کشه‌یی. او کشتی دورون فقط هشت نفر آبٚ جأ دوأرستیدی و نجات بیأفتید. 21 و او آب ایتأ نمونه‌یه جٚه تعمیدی کی هسأیم شمرَ نجات دهه، نه اَنکی تعمید جانٚ کثیفی‌یَ پاکَ کونه، بلکی تعمید ایتأ تیمیزٚ وجدانی تعهد ایسه خودا جُلُو. اَ تعمید عیسی مسیحٚ قیام کودنٚ اَمرأ شمرَ نجات بخشه، 22 هونی کی بوشو آسمان و خودا راستٚ دس ایسَه و فرشته‌یأن و رئیسأن و قودرتأن اونٚ موطیع بوستیدی. |
© 2010-2019 Gilak Media
Gilak Media