EZabbuli 16 - Bbaibbuli y'oLugwere

OKibbumba niiye oguneesiga

EZabbuli ya Dawudi.

¹ Oo Kibbumba onkuume, olwʼokubba njirukira eeri niiwe okunkuuma.

² Mbutula eeri oMusengwa nti, “Niiwe oMusengwa wange, ebintu ebisa byonabyona ebindinabyo bizwa eeri niiwe.”

³ Abo abatuukirirye abali oku kyalo, niibo abakiraku obusa era mwibo niimwo eisangaalo lyange lyonalyona omuliri.

⁴ Abasinza abakibbumba abandi baabbanga nʼebingi ebibaleyerya. Tinabeegaitengeku omu kuwaayo esadaaka gyabwe egyʼomusaaye, era tinasinzenge abakibbumba baabwe.

⁵ Musengwa, niiwe ongabirira byonabyona. Era niiwe osalawo ebiri nʼokuntuukaku.

⁶ Ebyobusika ebyompaire bisa ino, mazima omugabo gwange musa ino.

⁷ Nawuujanga oMusengwa oyo annungamya, nʼobwire omwoyo gwange gunjegesya.

⁸ Mmaite nti oMusengwa aneekubbembera bulijo, olwʼokubba ali na nze okumbeera kaisi tiwaabbaawo ekintukutya omwoyo.

⁹ Kagira omwoyo gwange gwizwire isangaalo era ni njaagaana, ntyo ni mba mwidembe.

¹⁰ Ekyo kityo olwʼokubba tiwalireka omwoyo gwange e magombe, waire okuganya omubiri gwʼoMutukulyewo okuvunda.

¹¹ Ondagire enzira yʼobwomi. Era olwʼokubba oli na nze wanjizulya eisangaalo. Era nga ndi oku lubba lwʼengaloyo endiiro nʼabba nʼeisangaalo emirembe gyonagyona.