Tateta 35 - Buki Kimaasabaina

Yauwe Isileli tubunao yaidi goi ikaaiyaka tetelina ( ) Maliyalina aba waiwasi ana lovina

¹ E madabokidi ataligogoidi alatuwokoidi adigo kagu, ‘Ame sinapuyadi iilovina taguuinuwedi:

² Maliyalina ana badabada ainima tayamo goi ida paisewa taguinūwe go, maliyalina ainima aiyuwoina moe aba waiwasi, e paisewa goi tasayāta. Amo maliyalinayana kimaasabaina Yauwe umana. Avatau neta amo maliyalinayana goi ipaisewa, takaumāte.

³ E nakae maliyalina aba waiwasi ana tuta taabu ida yoyou sinaedi goi yeu tadiimilīdi.’

Tomota idi vininabeso Aba Kaiyaka manuna

⁴ E tuwaina Isileli tubunao liliudi alatuwokoidi adigo kagu, ‘Ame dogoiyana Yauwe ilovina koguinuwe:

⁵ E imi vininabeso Yauwe manuna kolamgogōidi. Avatauwa neta atedi sitagona, e idi vininabeso sikabīdi simēdi Yauwe yaina sikasalēdi. Vininabesoyadi ame nakae: be nakae kopa,

⁶ búyala noyanoyaidi buruu, kalaakovidi toidi be kayakayaidi. Nakae areko dedevidi toidi, unuunudi,

⁷ bolamo sakavaidi go, sakavayadi bogina sikaredi kayakayaidi. Tomadao sakavaidi, gaigíyala,

⁸ .

⁹ Gurewa esaaesaidi ana kwama manudi. Kwamayadi aiyuwo, tayamo tolobona ana kwama, e tayamo kasikasina ana saisaira.

¹⁰ Komi tokatanaki, liliumi kōma kaga liliuna bogina Yauwe ilovina komadagīdi.

¹¹ Dogoiyadi ame nakae: Yauwe ina , ana vabodakalova, ana logógana be ana kówala madi kaba taoya.

¹² Dedeoga mana kaitakeo, aba núwala, vabodaupa kaarekoina,

¹³ teboro ma konanina, ana kaitakeo be nakae kimaasabaidi yau umagu.

¹⁴ Rampa adi kaba yata ma konanina be nakae rampa giyaidi be oribe mumuna rampayadi manudi.

¹⁵ Insensi ana mana kaitakeo, pútuma aba kaipaku, insensi mainina dedevina be nakae ina Kaba Kaiyaka ana kaba siu kaarekoina.

¹⁶ Aba kasala ma vatalina kopa vininabeso ana kaigabu manuna, ana kaitakeo, konanina, ma kaena,

¹⁷ ali ana taboda areko, ina kówala, ina kaba taoya be nakae ina kaba siu ana taboda kaarekoina,

¹⁸ nakae ina Kaba Kaiyaka ana kaba kokavata nakae ina kali ana kaba kokavata kowodugūdi be nakae adi búyala kowodugūdi.

¹⁹ Kwama dedevidi paisewa tauyana Tonúwala ana kwama kimaasabaina ina paisewa manuna be nakae natunao adi kwama, e bei Tonúwala ana paisewa siguinuwe.’

²⁰ E abóbwara ikavava, Isileli tubunao liliudi sikalavegu go, sisáwala sina.

²¹ Avatauwa neta atedi sitagona, e idi vininabeso simedi. Vininabesoyadi moe Yauwe ina Kaba Valoboda manuna nakae ina paisewa liliudi manudi be nakae Tonúwala ana kwama kimaasabaidi manudi.

²² Koroto nakae vevina, avatauwa neta atedi sitagona, e idi vininabeso goura simedi Yauwe yaina. Vininabesoyadi ame nakae: Mawuwu, gipolu, rini, nimatuwetuwe be nakae kónana goura liliudi. Tauna nakae tomota tamo tamo idi vininabeso goura simedi sikasaledi Yauwe yaina.

²³ Avatauwa neta madi búyala buruu, kalaakovidi toidi be kayakayaidi, o neta madi kareko dedevidi toidi o neta madi goti unuunudi o sipi bolamo sakavaidi siikaredi kayakayaidi o adi tomadao sakavaidi, e madabokidi simedi sikasaledi Yauwe yaina.

²⁴ Avatauwa neta itoboinedi siriba be kopa sikabidi, e simedi sikasaledi Yauwe yaina. Avatauwa neta madi gaigíyala paisewayana manuna, e nakae simedi.

²⁵ Ava vevinava neta tokatanaki, e búyala buruu, kalaakovidi toidi be kayakayaidi sinoedi be nakae areko dedevidi toidi sigilumidi simedi.

²⁶ Ava vevinava neta atedi sitagona be nakae madi katanaki, goti unuunudi sigíluma.

²⁷ E kidi go tomoyamoya gurewa esaaesaidi anikisi be nakae ituli ta gurewa esaaesaidi simedi tonúwala tolobona ana kwama be nakae kasikasina ana saisaira manudi.

²⁸ Tuwaina alova sisina be oribe mumuna rampa manudi be alova sakavaidi pútuma aba kaipaku manuna be nakae pútuma insensi manuna simedi.

²⁹ Isileli tubunao liliudi, koroto be nakae vevina, neta atedi sitagona, e idi vininabeso simedi sikasaledi Yauwe yaina. Vininabesoyadi moe Yauwe ina paisewa manuna nakae boi yau sopagu goi bogina ilovina siguinuwe.

³⁰ E simedi ikavava, alatuwokoidi adigo kagu, ‘Gwa! Kure, ma Yuda, natuna moe Uri, e tubuna moe Besaleli. Ame tauyana Yauwe bogina ikinave.

³¹ Balomaina goi Besaleliyana bogina ivakayaodei, tauna mana nanamsa be mana katanaki be nakae ana kaipata paisewa liliudi dedevidi iyagoidi be iguinuwedi.

³² Tauyana ana kabitam goura be siriba be nakae kopa adi paisewa goi.

³³ Nakae gurewa esaaesaidi adi paisewa be nakae alova ana gínina bogina ana kaipata iguinuwedi.

³⁴ Go Akisamaki ma Dani natuna Oliyavi be nakae Besaleli madi nanamsa. Nanamsayana moe Yauwe nukotodi goi bogina iyato, tauna itoboinedi sivatulúkwana.

³⁵ Paisewa liliudi adi katanaki bogina ivinidi, tauna itoboinedi gurewa ana gínina be nuwonúwana paisewa manuna, búyala noyanoyaidi buruu, kalaakovidi toidi be kayakayaidi goi be nakae areko dedevidi adi gíluma be wóina dedevina ana paisewa siguinuwedi. Kidi paisewa liliudi siyagoidi be siguinuwedi.’