Tateta 30 - Buki Kimaasabaina

Vatulúkwana insensi ana kaba kasala ana madágina manuna

¹ E Yauwe tuwaina kana, ‘Tomota kulatuwokōidi gaigíyala taalaidi sikabidi, simadagi bei yatana insensi sigabugabu.

² Aba kasalayana ana mamanao be nakae ana papaeva moe aba katugúyala go, ana tukotuko panetayataya kasikasi. Go ana aivasi matakubuna goi siyatoidi. Go sakusakuyadi be aba kasala alova tayamo goi simadagidi.

³ Simadagi ikavava, maavadaina go, paaevaidi sikabidi, aba kasalayana goi sikaupatukoidi. Tauna madabokina goura. Sikaupatukoidi ikavava, e kinababaina goi ana papa goura sikaupatuko.

⁴ Ikavava, e aiyuwo goura simadagidi, ana papa kikina go, sobuyekoina goi sikaupatukoidi, dadavina tayamo, dadavina tayamo. Riniyadi moe aitakeo manudi.

⁵ Sikaupatukoidi ikavava, e aba kasalayana ana kaitakeo aiyuwo gaigíyala sibobóidi, goura paaevaidi goi sipaimidi.

⁶ E aba kasalayana vabodaupa kaarekoina toluyena goi siyatogamogamone. Vabodaupayana mana kaba núwala itabode. Amoko goi bei avalobodem.

⁷ Nobuyana tamo tamo goi bei isiusiu ima rampa ivadadedi bei insensi mainina dedevina iiyatoidi aba kasalayana yatana goi igabudi sivakaubowo.

⁸ Tutayana Eroni isiu lavilavi tamo tamo goi bego rampayadi ikatubayasidi, e aba kasala yatana goi insensi bei igabu. Nakae bei iguuinuwe tuta ame be nakae tuta simamaima, e bei insensiyana ivakaaubowo Yau yaigu.

⁹ Go aba kasalayana goi taabu insensi besobeso igabugābu. Aiyuwoina yoguyogu vininabeso manuna taabu yatana goi igaabusāve. Nakae kutukutu vininabeso manuna taabu yatana goi igabugābu. vininabeso manuna nakae taabu yatana goi iisiwōi.

¹⁰ Go tala tamo tamo goi sivatayamo aba kasalayana bei ikimavade ame nakae: E tomota idi bágala adi núwala manuna yoguyogu ikaumate go, ikaikaina ikabi, insensi ana kaba kasalayana ana sakusaku imigidi. Tauna nakae bei iguuinuwe tala tamo tamo ame tutayana be nakae tuta simamaima. Ame aba kasalayana moe kimaasabaina toina Yau Yauwe umagu.’

Vininabeso Aba Kaiyaka ana rugwáuta manuna

¹¹ E Yauwe ilatuwokoigu idigo kana,

¹² ‘Tutayana kwatuyaividi yaviya manuna, e koroto tamo tamo yawoidi sitatetēdi yau yaigu, govila bei sivailai tutayana kwatuyaividi.

¹³ Ava koroto neta kwatuyaivi, Kimaasabaina ana lovina goi sisikere.

¹⁴ Kidi adi tala tuwenti (20) nakae ituko, neta kwatuyaividi, e idi vininabeso bei sikasale Yau Yauwe yaigu.

¹⁵ E kidi go toesaesa taabu idi vininabeso sivaaitūwe. Kidi go tookaidi taabu idi vininabeso sikupokūpo. Go sem liliudi nakae siriba tayamo sivinibesoigu adi núwala manuna.

¹⁶ Núwala ana vininabeso mani Isileli tubunao yaidi goi kwabīdi. Vininabesoyadi moe guna Kaba Valoboda ana rugwáuta manuna. Ame vininabesoyadi moe Isileli tubunao idi kaba nuwokavata yau matagu goi adi núwala manuna.’

Vatulúkwana nokobaba kopa ana madágina manuna

¹⁷ E Yauwe ilatuwokoigu idigo kana,

¹⁸ ‘Tomotayadi kulatuwokōidi ma kaena kopa simadagi. Nokobabayana moe aba níkina. Simadagi ikavava, guna Kaba Valobodayana be aba kasala kopa go, nauyayanaidi goi siyato. Go nokobabayana goi bwae sisiwoi.

¹⁹ E bwaeyana goi Eroni ma natunao nimadi be aedi sinikidi.

²⁰ Tutayana guna Kaba Valobodayana goi bego sisiu o tutayana sivalabelabena aba kasala kopa bego vininabeso sigabu sikasale Yau Yauwe yaigu,

²¹ mainao nimadi be aedi sinikidi, govila bei sikámasa. Ame lovinayana ikaiyako vata Eroni ma natunao be nakae tubunao yaidi.’

Vatulúkwana pútuma aba kaipaku ana madágina manuna

²² E Yauwe ilatuwokoigu idigo kana,

²³ ‘Tomotayadi kulatuwokōidi latuwogu alova maniyedi sakavaidi be náuna lamna maa mainidi dedevidi sikabidi, sikelidi pauda nakae. Alovayadi be naunayana ame nakae: Alovamamaina sisina kilo ana badabada ainima tayamo, alova sinamoni kilo aito, alova kalamasi kilo ana badabada aito,

²⁴ e alova kesiya kilo ana badabada ainima tayamo sikabidi. Liliudi adi moumou sisiikeredi nakae yau guna Kaba Kaiyaka Kimaasabaina ana lovina goi sisikeredi. Alovayadi sikabidi ikavava, mumuna lita aivasi sikabidi

²⁵ go, avatau neta pútuma ana tokatanaki sivini, e pútuma aba imadagi namlieta ikimasabe yau umagu.

²⁶ E putumayana kukābi, kónana liliudi kuputumīdi bei konanayadi kiinavaidi paisewa yau umagu. Konanayadi ame nakae: Guna Kaba Valoboda yoyou be aba vatulúkwana dedeogaina,

²⁷ teboro ma konanina, rampa adi kaba yata ma konanina, insensi ana kaba kasala ma konanina,

²⁸ aba kasala vininabeso ana kaigabu manuna ma konanina be nakae nokobaba ma kaena kopa, e ame konanayadi liliudi kwaipakuyēdi.

²⁹ Ikavava, kukimasabēdi yau umagu bei liliudi kimaasabaidi toina. Tauna avatau neta ibisikonedi, e itoboine tauyana bogina kimaasabaina Yau umagu. Neta ava kónana ibisikonedi, e itoboine konanayana nakae bogina kimaasabaina Yau umagu.

³⁰ E pútuma kwābi, Eroni ma natunao goi kusiwōidi be kukimasabēdi yau umagu bei kidi Tonúwala nakae sipaaisewa yau manugu.

³¹ E Isileli tubunao kulatuwokōidi kam, “Pútuma aba kaipaku ame moe kimaasabaina yau umagu, tauna guna paisewa manuna ame tuta be nakae tuta simamaima.

³² Taabu tomota besobeso goi koosiwōidi. Taabu putumayana ana pópwala kovatootowōne bei pútuma tayamo nakae komadagi. Putumayana kimaasabaina yau umagu, tauna kowowōine.

³³ Avatau neta putumayana ivatotowone bego tayamo pútuma imadagi o avatau neta putumayana ikabi, tomota besobeso goi isiwoi, e amo tauyana geya yau guna boda geya, tauna yaimi goi kolivisīye go, kovatapīye.”’

Vatulúkwana insensi ana madágina manuna

³⁴ E Yauwe tuwaina ilatuwokoigu idigo kana, ‘Tomotayadi kulatuwokōidi latuwogu sina náuna sitakite sisina, kapikapiwo valakikidi sikabidi, situtudi be nakae náuna galabanum bwaena be aidekoko sisina sikabidi. Tamo tamo adi moumou nakae.

³⁵ E sikabidi, insensi ana tomadágina, tauyana tokatanaki, sivini insensi imadagi. Ikavava, isiwoi. E insensiyana maavadaina be nakae kimaasabaina yau umagu, tauna guna paisewa manuna.

³⁶ Insensi sikabi, situtu pauda nakae. Ikavava, e maniyena sikabi, sime guna Kaba Valoboda goi sisiu, e aba vatulúkwana dedeogaina matana goi siyato. Amoko goi bei avalobodem. Go ame insensiyana moe kokimasabe bei kimaasabaina toina yaimi.

³⁷ Ame insensiyana bei siimadagi, tomota taabu siimadāgi nakae toinidi manudi. Ame insensiyana kimaasabaina Yau Yauwe umagu.

³⁸ Avatau neta insensiyana imadagi toinina ina pútuma manuna, e tauyana geya yau guna boda geya, tauna yaimi goi kolivisīye go, kovatapīye.’