Tateta 29 - Buki Kimaasabaina

Vatulúkwana Tonúwala adi kimasaba manuna

¹ E Yauwe tuwaina kana, ‘E ame kuguinūwe tutayana bolamo dedevidi aiyuwo kwabīdi.

² Ikavava, parawa dedevina kwābi, mumuna tuwo. Maniyedi oribe mumuna taiyao kupopolīdi. E nakae maniyedi kakaaraiidi go, oribe mumuna kokikilīdi.

³ Ikavava, berediyadi bayao tayamo goi kudodōidi, e bayaoyana kūme guna Kaba Valoboda totomna goi tutayana bulumakauyana be nakae sipiyadi bolamo aiyuwo bego kukasaledi yau yaigu.

⁴ Go Eroni ma natunao, e adi kasala manuna kumēdi guna Kaba Valobodayana totomna goi kuvaisivēdi.

⁵ Kuvaisivedi ikavava, baige Tonúwala ana kwama kwabīdi, e Eroni kuvalōsi ame nakae: Mainao kwama saidibuna maanawena, namlieta kwama maanawena buruu kuvalōsi. Ikavava, e tolobona ana kwama kuvalōsi baige kasikasina ana saisaira kuvalōsi. Madabokina ikavava, e dedevina kusīko.

⁶ Kusiko ikavava, e ana peperu kooitupoina dabana goi kukailagāsi. Niga dabayogigi kimaasabaina peperu goi kusīko.

⁷ Ikavava, pútuma aba kwābi, Eroni dabana kuputūmi bei tauyana kiinavaina yau umagu.

⁸ Go Eroni natunao kumēdi, kwama saidibuna maanawedi kuvalosīdi.

⁹ Nakae adi gigipáiwala kusikōidi, adi peperu dabadi goi kwailagasīdi. Moeko goi itoboinedi sietonúwala go, paisewayana guna lovina goi ikaiyako vata kidi ma natudiyao be tubudiyao yaidi. Tauna nakae paisewayana Eroni ma natunao nimadi goi kuyāto.

¹⁰ E bulumakauyana kūme guna Kaba Valoboda totomna goi go, Eroni ma natunao kulatuwokōidi bulumakauyana dabana goi nimadi siyatōidi.

¹¹ Niga bulumakauyana matagu goi kukaumāte go, ikaikaina idau ina noko goi kusaligōgo.

¹² Kukaumate ikavava, ikaikaina goi nimam kusavakutūi, e goi kumigīdi go, aba kasalayana unana goi ikaikayana madabokina kusiwōi.

¹³ Ikavava, posinaena be diyauwouwosina be nakae vivina aiyuwo ma sabalidi kukabīdi, aba kasala goi kugabūdi, e bei aubowoidi ituko ima. Moe idi vininabeso yau yaigu.

¹⁴ Go bulumakauyana iwoina, sakavaina be nakae taena, e kwabīdi, kunavēdi imi tunagu moetala goi kugabusavēdi. Moe bágala adi vininabeso.

¹⁵ E sipi bolamo tayamo kukābi, e dabana goi Eroni ma natunao nimadi siyatoidi.

¹⁶ Ikavava, sipiyana kukaumāte go, ikaikaina kwābi, yoguyogu ana kaba kasala kuseulinibīsi.

¹⁷ Go sipiyana moe kupilūmi. Ikavava, talainao liliudi be kaga liliuna posinae sinaena be nakae aena kunikīdi. Ikavava, talainao be bulubuluna yatadi goi kuyatōidi.

¹⁸ Kuyatoidi ikavava, sipi talainaoyadi kugabūdi be kuvakasavēdi. Moe sikasale Yau yaigu. Tutayana kugabu, aubowoina ituko ima mainina dedevina anove, ivauyaonegu.

¹⁹ E sipi bolamo aiyuwoina kukābi, e dabana goi Eroni ma natunao nimadi siyatoidi.

²⁰ Ikavava, sipiyana kukaumāte go, ikaikaina noko goi kusaligōgo. Ikavava, Eroni ma natunao taiyadi be nimatubutubudi be nakae aetubutubudi kakataidi kumigīdi. Ikavava, ikaikayana madabokina kwābi, aba kasala kuseulinibīsi.

²¹ Go ikaikayana maniyena aba kasala goi be nakae pútuma aba kaipaku kwabīdi, Eroni ma natunao madi kwama kuseulīdi. Moe nakae kidi madi kwama kukimasabedi yau umagu.

²² E sipiyana sabalina, yuyuna sabalina, posinaena, diyauwouwosina, vivina aiyuwo ma sabalidi be nakae dibuwatuna kakataina kwabīdi. Ame sipiyana moe tauyadi adi kimasaba yau umagu manuna.

²³ E moe dogoiyadi kwabīdi be nakae beredi geya adi istimo ma bayaoina Yau Yauwe matagu goi ikaaiyaka, e beredi aito kwabīdi, tayamo pokaka, tayamo oribe mumuna taiyao be tayamo oribe mumuna kukikīli.

²⁴ E kwabīdi, Eroni ma natunao nimadi goi kuyatōidi go, nimadi sikatulagasidi, dogoiyadi sikasaledi Yau Yauwe yaigu.

²⁵ Ikavava, dogoiyadi kwabimnēidi, sipi bolamo vakuumgoina aba kasala goi, e yatana kuyatōidi, kugabūdi kuvakasavēdi. E tutayana aubowoina ituko ima, Yau Yauwe mainina dedevina anove bei ivauyaonegu.

²⁶ E sipiyana bolamo aiyuwoina Eroni ana kimasaba manuna, e kukuna kwābi, kwatulagāsi kukasāle Yau Yauwe yaigu. Moe talainayana kom im kaiguyau.

²⁷ Tutayana koroto kukimasabe Tonúwala yau umagu, mainao sipi bolamo guna Tonuwalayao adi kimasaba manuna, e kukuna kailaagasina be nakae dibuwatuna kaasalaina kukabīdi kukimasabēdi yau umagu.

²⁸ E ame tutayana be nakae tuta simamaima lovina ame ikaiyako vata: Neta tomota idi yoguyoguyao vininabeso abivekoveko manuna sikasaledi yau yaigu, e yoguyoguyadi kukudi be dibuwatudi moe Eroni mana bodao Tonúwala adi kaiguyau unana vininabesoyadi sikatulagasidi sikasaledi Yau Yauwe yaigu.

²⁹ E Eroni ina kámasa mlina, ina obáila kimaasabaidi natunao bei sikabidi, e bei Eroni ana katumapu tayamo ilosidi. Ikavava, pútuma aba kaipaku kwābi, kukaipakūye be paisewayana nimadi goi kuyāto.

³⁰ Go ava natuna bei itaoya Tonúwala, e tutayana igimiima guna Kaba Valoboda goi isiu ima goi núwala ana paisewa iguinuwedi yau yaigu, kwamayadi iilosidi maliyalina ana badabada ainima aiyuwo.

³¹ E sipi bolamo Eroni ana kimasaba manuna go, iwoina kwābi, kūme guna Kaba Valoboda ana moteo kimaasabaina goi kuvaipolūye.

³² Ikavava, Eroni ma natunao bei sima guna Kaba Valoboda totomna goi sipi bolamo iwoinayana be berediyadi ma bayaoidi sikáika.

³³ Amo nakae vininabesoyadi bei sikáika. Vininabesoyadi goi idi goyo sinuwolidi boi tutayana Eroni ma natunao nimadi goi paisewayana kuyato be nakae kukimasabedi yau umagu. Tauna nakae bei sikáika go, tomota besobeso taabu sikanikāni. Iwayayana be nakae berediyadi moe kimaasabaidi yau umagu.

³⁴ Go neta vanuwo itomo iwoinayana be nakae berediyadi Tonúwala adi kimasaba manuna kesakesaidi, e kukabīdi, kugabusavēdi. Taabu tomota siikanīdi. Iwoinayana be nakae berediyadi moe kimaasabaidi yau umagu.

³⁵ E tauna nakae kuguinūwe Eroni ma natunao yaidi nakae kaga liliuna bogina alatuwokoim. Maliyalina ana badabada ainima aiyuwo goi moe guinuwayadi kuguuinuwēdi tutayana paisewayana nimadi goi kuyato.

³⁶ Go bulumakau tomota idi bágala adi núwala manuna maliyalina tamo tamo goi kukaumāte kugabusāve. E nakae aba kasalayana kukimavāde. Ikavava, pútuma aba kaipaku kwābi kuputūmi bei kukimasabe yau umagu.

³⁷ E maliyalina ainima aiyuwo goi nakae kuguuinūwe, e bei aba kasalayana kimaasabaina toina yau umagu. Kaga neta ibisikone, itoboine dogoiyana bogina kimaasabaina yau umagu.’

Vatulúkwana vininabeso maliyalina tamo tamo manuna

³⁸ E Yauwe tuwaina kana, ‘Guna Tonuwalayao kulatuwokōidi aba kasala goi ame sigabusavedi sikasaledi maliyalina tamo tamo yau yaigu: aiyuwo, tamo tamo adi tala tayamo bogina sibabane.

³⁹ Lami tayamo nobuyana goi sikasale yau yaigu go, lami aiyuwoina lavilavi.

⁴⁰ Go lami vakuumgoina ana kasala manuna parawa dedevina ma nokoina giyaina be oribe mumuna dedevina toina lita tayamo taiyao sikabidi, sipopolidi. Ikavava, siyato lamiyana taiyao. E nakae lita tayamo sikabi, sisiwoi aba kasala goi lamiyana taiyao sikasaledi yau yaigu.

⁴¹ Go lamiyana aiyuwoina moe lavilavi goi sikasale Yau Yauwe yaigu. Ago imi vininabeso kutukutu be nakae oine kokasalēdi nobuyana nakae. Tauna tutayana sigabu, aubowoina ituko ima, e mainina dedevina anove ivauyaonegu.

⁴² Ame tuta be nakae tuta simamaima guna Tonuwalayao bei sima guna Kaba Valoboda totomna goi yoguyogu sigabudi sivakasavedi go, sikasaledi Yau Yauwe yaigu. Guna Kaba Valobodayana goi bei avalobodemi be avadigoimi.

⁴³ Komi Isileli tubunao amoko goi bei avalobodemi go, guna togaga ana ikimasabe yau umagu.

⁴⁴ Moitamo. Guna Kaba Valobodayana be nakae aba kasalayana bei akimasabedi yau umagu. Aiyuwoina Eroni ma natunao akimasabedi yau umagu, e bei tauyadi itoboinedi guna Tonuwalayao nakae sipaisewa yau yaigu.

⁴⁵ Bei akaaiyaka Isileli tubunao yaimi. Yau bei imi Yaubada.

⁴⁶ Komi bei koyagoigu Yau Yauwe imi Yaubada boi Itipita goi akabimi amemi, e bei itoboinegu akaaiyaka yaimi. Yau Yauwe imi Yaubada.’