Tateta 15 - Buki Kimaasabaina

Mosese ina bodao taiyao idi vesi yapali

¹ E ame tutayana yau yaina kama, ‘Bei avesi Yauwe yaina; Tauyana ana yapali ituko toina. madi tokabikunuwoyao ikalisobuyedi sisou négwasa goi!

² kina guna Tokitogaga; moe Tauyana aavesiye. Tauyana imalatoyava yaigu. Ame Tauyana guna Yaubada, bei ayapaliye. Tauyana tamagu ina Yaubada, bei yoina akilagasi.

³ Yauwe kina tovayaviya tayamo. Tauyana yoina Yauwe.

⁴ be nakae ina tovayaviyayao liliudi, e ikalisobuyedi Négwasa Kayakayaina goi. Ina tovakumgoyao dedevidi toidi kina Yauwe Négwasa Kayakayainayana goi ikausalilidi.

⁵ Négwasa dimowonina ilataoidi. Gurewa nakae sisalilibóbwata sisou sina dimówana tututu goi.

⁶ Yauwe, Nimakakataim toogagaina toina. Nimakakataimyana goi im kaleyayao kukauvisivisidi.

⁷ Im togaga ana kakainaki goi im kaleyayao kutogooisavedi. Im egamogamogu yeu sabeninimina nakae kuetune ina tauyadi limou nakae ivakasavedi.

⁸ Kubum ipulu yawoim kusalauwe, e négwasa iwotai, dadavina e dadavina ilatokotoko ituko ina. E elu isayata ona inuwa; négwasa vaboda nakae itaoya. E negwasayana dimówana goi ikule ikasa.

⁹ Ida kaleyayao sigagágasa kadi, “E tavatapiyēdi tasakavatēdi tayoisīdi. Idi esaesa tanebōidi takaiguyauyēdi bei giya sisi goi takaumatedi. Ida togaga goi tamtulīdi, e baige gamoda inuwa.”

¹⁰ Go Yauwe, Yawoim goi négwasa kusalauwe, e da Itipita ilataoidi. Tauna kainum nakae sisalilibóbwata négwasa toogagaidi goi.

¹¹ Yauwe, Ava yaubada idi yaubadayao yaidi goi kom nakae? Geya ae? Avatau kom nakae? Kom kaausaraina. Kom aba matoita be aba yapali. Kom aba kainaopa ana toguinuwa. Geya tayaamo yaubada kom nakae!

¹² Tutayana nimakakataim kuyosale, e poyapoya ima kaleyayao itonoidi.

¹³ Im goi kai im bodao boi kutaatetema kuvakedema. Im togaga goi kuvakumgoiyema kama im kaba kaiyaka kimaasabaina goi.

¹⁴ Ituli ta boda valem sinove, bei sitatátava. Nakae kidi da Palisiti ateyova gagaina bei iyoisidi.

¹⁵ Amo tutayana da Idom adi tolovinao bei simatoita gagaina. Da Moabe nakae adi tolovinao matoita goi sitatátava. Kidi Kenani goi sikaaiyaka luludi bei sitameya.

¹⁶ Ame tauyadi matoita gagaina toina bei iyoisidi. Yauwe, Nimam toogagaina ana guinuwa pasina odi ikámasa gurewa nakae ana kadókana kai im bodao, tauyama bogina kuvanatunema, kavadámana.

¹⁷ Nava kai im bodao bei kumema kama toinim im koya goi kuyatoima kalokasa. Yauwe, Ame koyayana kukinave im kaba kaiyaka manuna. Tomoya, Im kaba kimasaba nimam goi toinim kumadagi.

¹⁸ Yauwe bei ikalibubuna vata!’

¹⁹ Ame vesiyana unana Pero ina nakae ina sariyotayadi madi tokabikunuwoyao sipoikíkina bego négwasa nauyayanaina goi sivadámana, e negwasayana Yauwe ikaluvilemnei da Itipita ikautumdi. E kai go Isileli tubunao kaketoiya poyapoya sayasayaina négwasa nauyayanaina goi.

²⁰ E tayamo, girada ikabi ilauláuwo go, vevina liliudi mlina goi madi girada silauláusa.

²¹ E Miriyamyana vesi ame ivesiye yaidi idigo kana, ‘Tavēsi Yauwe yaina! Tauyana ana yapali ituko toina! Osi madi tokabikunuwoyao ikalisobuyedi sisou négwasa goi.’

Mosese ina bodao taiyao sinonoina yoyowo goi tetelina ( ) Isileli tubunao sikaukuulukúluwo bwae pasina tetelina

²² E Isileli tubunao alatuwokoidi kataoya Négwasa Kayakayaina kakalave kana Sura yoyowoina goi. Amoko goi kaaketoiya nakae maliyalina aito go, geya tayaamo bwae kababane.

²³ Tuwo kaketoiya kama asa Mara goi bwae kababane go, geya itoboinemeta kanim. Bwaeyana itamatama. Moe pasina asayana kaduduwe Mara.

²⁴ Tuwo tomota liliudi sikaukulukúluwo yau yaigu sidigo kadi, ‘Bei kaga kanim?’

²⁵ Sikaukulukúluwo go, atumadádana Yauwe yaina vaita manuna. Tuwo alova tayamo ivatulukoigu kana, ‘Alova gomoe kwalisobūye bwaeyana goi.’ Tuwo alovayana akabi, alave bwae goi, e bwaeyana isadibidibi. E tuwo ameko goi Yauwe vatulúkwana be lovina ivinima yawoima manuna go, ivakakonema,

²⁶ idigo kana, ‘Yau Yauwe imi Yaubada, ami tokidedevina. Tauna neta konovedokoigu go, kaga dedevina matagu goi koguinuwe be nakae guna lovina konovedi be guna katukeda liliudi kokabikaonedi, e vísiya liliudi boi da Itipita aavinidi geya avinimita.’

²⁷ Ibóbwara ikavava, kataoya, Mara kakalave kana asa Elim goi. Amoko goi doelu ana badabada yawou aiyuwo be nakae deiti alovaidi seventi (70) sikaaiyaka. Tuwo amoko bwae kikina goi katunagu.