Nuwogau 11 - Buki Kimaasabaina

Yaubada ana totalavaita adi taiyuwo

¹ Amo ikavava, duriduri tayamo aba valivaliva ivinigu; duriduriyana ana kaigigita aituko nakae. Ivinigu ikavava, níyana tayamo anove idigo kana, ‘Kutāoya kūna Yaubada ina Vada Kimaasabaina be kuvalivelivēdi be nakae tauyadi sinaena sisaakululu kwatuyaivīdi.

² Kidi Yerusalema sikibaaibaili be siloovinae. Tauna Vada Kimasabainayana kikina moteo tuwo, kwalāve, moe Totuyoyowoyadi manudi. Taabu kuvaliivelīve.

³ Ago guna totalavaitayao adi taiyuwo madi atagonedi maliyalina ana badabada tayamo tausani tu andedi siksti (1,260) sinaedi guna livala sitaalavaite.’

⁴ Ame adi taiyuwokova alova aiyuwo be nakae rampa adi kaba yata aiyuwo go, adi taiyuwokova madi katubayásina siitaoya poyapoya ina Tomoya matana goi.

⁵ Ago avatau neta ipoikíkina bego tauyadi iyogedegededi, e tobudi goi yeu isowóduwo adi kaleyayana igabu. Tauna nakae neta adi kaleyayao bego siyogedegededi, itoboinedi sivailai.

⁶ Moe adi taiyuwokova madi lovina kúwana yábana goi sitabode idi tuta poyapoya goi sitaalavaita, bwae sikaigaviledi simalaikaika, be mou liliudi da poyapoya sivinidi. Go moe siguinuwedi nakonakae latuwodi.

⁷ Tutayana idi talavaita silukavave, woiwoi masiyana gagaina goi bei isowóduwo ima ivayaviya adi taiyuwokova yaidi goi go, bei itogaga, e ikaumatedi.

⁸ Ikaumatedi ikavava, asa gagaina sinaena enao goi wowodi bei sikaaiyaka go, moe aba omayamaya. Ago toni kasa idi sinapu igoyo nakae kidi da Sodoma be nakae tomota mou sivinidi nakae kidi da Itipita. Tauna livalakaibala goi amo asayana yoina moe Sodoma be Itipita. Asayana goi boi idi Tomoya kerose goi situpatuko.

⁹ Koroto adi taiyuwo wowodiyadi sikaaiyaka go, tomota badabadaidi nakae boda liliudi be nakae kantri liliudi goi, dala liliudi be aníyana liliudi bei sima siigitedi maliyalina aito be nakae tupwana goi. Siigitedi go, geya vatau tayaamo sitagone bego wowodiyadi ikabidi, tukubu goi ivaliwogedi.

¹⁰ Moe adi taiyuwokova boi sima go, da poyapoya sitaoya siyogedegededi, tauna kidi da poyapoyayadi bei siuyáwana gagaina adi taiyuwo idi kámasa pasina. Bei áika gagaina siwodugu, tuwo idi yabobona bei sikaiguyauyedi sediyao yaidi.

¹¹ Maliyalina aito be nakae tupwana sikavava, Yaubada yawoina ivaisiu adi taiyuwokova yaidi goi, e sitaoyamna. Sitaoyamna go, tomota sigitedi simatoita gagaina.

¹² Ago níyana tayamo gagaina yábana goi sinove, adi taiyuwokova ilatuwokoidi idigo kana, ‘Kotūko kōma ameko!’ Tuwo moitamo gaota goi situko sina yábana go, adi kaleyayao sikandolaga sigitedi situkotuko.

¹³ Amo tutayana goi nikuniku gagaina itátava go, asayana dadava tayamo itauwe go, dadava ainima aivasi dedevidi. Ago nikunikuyana goi tomota ana badabada ainima aiyuwo tausani (7,000) sikámasa. Go ava tomotava nava maa yawoidi simatoita gagaina, e Yaubada totobukukui yábana goi ina togaga ana sikamoitamoe.

¹⁴ Moeko goi mou aiyuwoina bogina ikavava go, kunōve! Mou aitonina giyakainava bei isowóduwo!

Síula ainima aiyuwoina

¹⁵ Amo ikavava, anerose ainima aiyuwoina ina síula iuwe, e yábana goi níyana gagaidi sidigo kadi, ‘Ame tuta da poyapoya idi lovina bogina ikavava! Ida Tomoya bogina sietokalibúbuna. Bei sikalibubuna vata: Ame tuta be nakae tuta simamaima.’

¹⁶ Amo ikavava, tauyadi tomoyamoya tuwenti poa (24) kebadi esaaesaidi yatadi siitulaga Yaubada matana goi, e kebadiyadi goi sisou aedi sivatugúyala be Yaubada yaina madi yapali sisakululu,

¹⁷ sidigo kadi, ‘! Kom kwaiyako vata: Boi nimatu be nakae ame tuta! Kom im togaga gagaina bogina kuvagitakoe, e kuetokalibúbuna! Tauna kakauyagu yaim.

¹⁸ Tuwo kidi go Totuyoyowoyadi siegamogamoguyem gagaina. Kom im egamogamogu ana tuta bogina isowóduwo. Tokámasa adi tuta bogina ima bei kutakinoidi ame nakae: Tokamasayadi moe im tokabivalavala, nakae im kimasabayao madi wowoina simatoitem, moe youtagau be nakae kidi maa yoidi gagaina. Ame tauyadi idi tuta bogina ima bei adi vaiwówana kwaiguyauyedi! Go da poyapoya adi tomtulayao idi tuta nakae bogina ima bei kumtulidi!’

¹⁹ Amo ikavava, Yaubada ina Vada Kimaasabaina yábana goi ikatupáeva go, ina ikúwana.