Nuwogau 1 - Buki Kimaasabaina

Livala ana kaba vatowo ( ) Buki ana masi

¹ Buki ame moe Yaubada ina nuwogau , Tauyana ina pákwana, yaigu, e aba kinana goi nuwogauyadi ivatulukoigu.

² Yaubada ina livala, moe Yeisu Guyau ina talavaita, atalavaite, e nakae kaga liliuna aagitedi atalavaitedi.

³ Buki ame ina livala Yaubada goi sima. Tuwo ana tokatuyaivayao be nakae ana totaiyakekayao neta ina livala sikabikaaonedi, e adi dedevina bei sibabane. Moitamo. Tuta ikaponapona dogoiyadi buki ame goi bei sisowóduwo, tauna livalayana konōve be kokabiikaōne.

Iyoni ina kauyagu Tomoya ana totugugunayao asa ainima aiyuwo yaidi

⁴ Yau Iyoni buki ame agini iwo komi Tomoya ana totugugunayao asa ainima aiyuwo Esiya ana dadava goi yaimi. Yaubada, Baloma ainima aiyuwo, be nakae Yeisu Guyau idi kanuwóiya be idi tuboina bei sivinimi. Yaubadayana Tokaiyako vata: Ame ikaaiyaka, boi nimatu ikaaiyaka go, tuta simamaima nakae bei ikaaiyaka. Balomayadi ainima aiyuwo Yaubada kebana esaaesaina matana goi sikaaiyaka.

⁵ Iya Yeisu .’ Yeisu imatakooiyeda, tuwo ikaikaina pasina ida goyo ana togaga goi italigeida.

⁶ Ilamgogoida taeboda tayamo bei kita ina bodayauwo ina kalibúbuna goi takaaiyaka be nakae Tauyana Tamana Yaubada ina togudalayao. Yeisuyana aba taimámina be nakae ame tuta be nakae tuta simamaima! E nakae!

⁷ Konōve! Tauyana gaota goi isou imamaima. Tomota liliudi, nakae kidi Tauyana ana toginubasinayao, bei sigite. Boda liliudi Tauyana manuna bei sitáiya. Moitamo! E nakae!

⁸ ‘Yau Alipa be Omega’, Yauwe Yaubada kaena. Tauyana Tokaiyako vata: Ame ikaaiyaka, boi nimatu ikaaiyaka go, tuta simamaima nakae nava bei ikaaiyaka. Tauyana Tokalika.

Yeisu isowóduwo Iyoni yaina tauyana ikawoi ( ) Iyoni ina kalayáusa goi Yeisu igite

⁹ Yau Iyoni, siyami be nakae imi tosavaiyuwo ida Yeisu taiyao pasina ame nakae: Ada gedageda tayamo, ida Tomoya ina kalibúbuna goi taiyao takaaiyaka be nakae ida mesayágana tayamo ida mou pasina. E, boi tomota siyoisigu, sinavegu simla Patimo goi sikaisobuyegu akaaiyaka unana Yaubada ina livala, moe Yeisu ina talavaita, ataalavaite.

¹⁰ Tuta tayamo ida Tomoya ana maliyalina goi Baloma Kimaasabaina iyoisigu, e mligu goi níyana gagaina ana taiyakeka síula nakae anove.

¹¹ Niyanayana idigo kana, ‘Kaga kuugitedi buki bilibilina goi kuginīdi. Ikavava, kuetunēdi sina Tomoya ana totugugunayao ame asayadi goi: Epeso, Simona, Pegamasi, Tuwatira, Sadesi, Piladelipiya, Laodiseya.’

¹² Tuwo atugavila; latuwogu agite avatau ivaadigoigu. Atugavila, rampa ana kaba yata ainima aiyuwo agitedi go,

¹³ rampayadi nauyayanaidi goi tayamo tomalatomota maisiyana agite iitaoya. Tauyana ana kwama maanawena ilosi, nakae valavana goi isou ina aena goi go, ina goura.

¹⁴ E kununa poowouna tooina unuununa nakae go, matana yeu sabeninimina nakae.

¹⁵ Aena barasa aiigabuna e yaayaina ina námala nakae. Niyana gagaina ana taiyakeka bwae gagaidi sidududu nakae.

¹⁶ Nimakakataina goi utuna ainima aiyuwo iyooisidi. Tobuna goi sisi matana aiyuwo go, sooinina isowóduwo. Maisina níyala niinimina dine nakae.

¹⁷ Tutayana Tauyana agite, aena goi akanakabobo yau kaamasigu nakae. Go nimakakataina goi ibisikonegu idigo kana, ‘Taabu kuumatōita. Yau Totukumgo be Totumliya.

¹⁸ Yau maa yawoigu. Boi bogina akámasa go, kunōve, maa yawoigu akaiyako vata. Magu lovina ámasa be nakae tokámasa idi dadava adi ki ayoyoisi.

¹⁹ Tauna kaga kuugitedi buki goi kuginīdi. Moe dogoiyadi ame tuta sisowóduwo be nakae dogoiyadi nava bei sisowóduwo.

²⁰ Utunayadi ainima aiyuwo nimakakataigu goi kuugitedi be nakae rampa ana kaba yata goura ainima aiyuwo adi yagoina vamoounidi kom yaim, tauna bei adi yagoina ataligei. Utunayadi moe Tomoya ana totugugunayao asa ainima aiyuwo adi aneroseyao. Rampa ana kaba yatayadi ainima aiyuwo moe totugúguna adi tugugunayadi ainima aiyuwo.’