Madiu 23 - Buki Kimaasabaina

Yeisu Yaubada ina Katukeda ana tovatulukwanayao be Parisi ibowoidi

¹ E tuwo kina ilatuwokoima idigo kana,

² ‘Kidi Yaubada ina Katukeda ana tovatulukwanayao be nakae madi lovina Atukedayana silumavivisi.

³ Tauna kaga liliuna sivatulukoimi, nakae koguuinūwe be kokabiikaōne go, idi guinuwa taabu kovatotoowonēdi. Bogina koyagoi. Tauyadi kaga sidigedige geya siguinuweyeta.

⁴ E lovina badabadaidi tomota sivinidi go, lovinayadi moe kónana moumoudi nakae itomatedi. Tomota sivavabedi bego sikavaledi go, geya kada tayaamo vaita sivinidi geya.

⁵ E kaga liliuna siguuinuwedi moe bego tomota sigitedi bei siyapaliyedi. Nakae idi tomwana dedeogaidi siwodugudi gagaidi, dabadi goi o nimadi goi sisikoidi. Adi kwama adi kura sikimanavedi bego tomota siyapaliyedi.

^6-7 E tuwaina áika gagaidi goi sisiu wowoina basekoina goi siitusobu. Tapwaroro ana kaba tugúguna sinaena wowoina basekoina goi siitusobu bei tomota siyapaliyedi. Aba maketi goi tomota sima sikatoomoyaedi be nakae siduduwedi kadi, “Tovatulúkwana Toolagaim.” Ame guinuwayadi kidi nuwodi sikabi.

⁸ E komi go taabu tomota kotaagonēdi siduduwemi tovatulúkwana toolagaimi. Imi tovatulúkwana tayamo toito. Nakae komi madabokimi boda tayamo, kovavasa.

⁹ Geya vatau tayaamo poyapoya ame goi kodudūwe tamami. Komi Tamami tayamo; Tauyana yábana goi ikaaiyaka.

¹⁰ Taabu tomota sikatoomoyaēmi. Komi imi Tomoya tayamo toito; Tauyana moe .

¹¹ E toolagaidi komi yaimi goi moe bei tauyadi imi tovaitayao.

¹² Go avatauwa neta toinidi sikilagalagasidi, e niga Yaubada bei ikisobuyedi. Go avatauwa neta toinidi sikisobusobuyedi, e niga Yaubada bei ikilagasidi.

¹³ E komi Yaubada ina Katukeda ana tovatulukwanayao be nakae Parisi, imi vatulúkwana goi tomota kosanaabodedi, e goi geya sisiuta. Moitamo. Komi geya latuwomi kosiu go, avatauwa neta latuwodi sisiu, komi kosanabodedi. Tauna komi tokibobwata polapola! Oo komi ami toovalugo ae? [

¹⁴ Komi Yaubada ina Katukeda ana tovatulukwanayao be Parisi, kóbuya idi vada be konadi kovaaobudi namlieta kokawanoi tuta maanawena bego tomota sigitemi. Tauna imi liuna gagaina toina bei kobabane. Komi tokibobwata polapola! Oo komi ami toovalugo ae?]

¹⁵ Komi Yaubada ina Katukeda ana tovatulukwanayao be nakae Parisi, dadava liliudi goi kovanibiníbita bego tomota tayamo kotamyabi goi go, tauyana itoboinedoko. Tauna komi tokibobwata polapola. Oo komi ami toovalugo ae?

¹⁶ Komi tovakeda kebokeboimi kodigo kami, “Avatau neta nimana ikatulágata be Vada Kimaasabaina yoina goi ikatótula, moe atotula besobeso. Go avatau neta nimana ikatulágata go, Vada Kimaasabaina sinaena sikaaiyaka yoidi goi ikatótula, e tauyana mana tasíkwana ina katotulayana iguinuwe.” Oo komi ami toovalugo ae?

¹⁷ Komi yaaluwoimi be tokebo! Gourayadi kimaasabaidi unana Vada Kimaasabaina pasina. Tauna nako dogoi gagaina, gourayadi gea Vada Kimaasabaina? Vadayana ae?

¹⁸ Aiyuwoina komi kovatulúkwana kami, “Avatau neta nimana ikatulágata be Yaubada ina yoina goi ikatótula, moe dogoi besobeso. Go avatau neta nimana ikatulágata be vininabeso aba kasalayana yatana yoina goi ikatótula, e tauyana mana tasíkwana ina katotulayana iguinuwe.”

¹⁹ Komi tokebo! Vininabesoyana kimaasabaina unana aba kasala pasina. Tauna nako dogoi gagaina, vininabesoyana gea aba kasala? Aba kasalayana ae?

²⁰ Tauna avatau neta nimana ikatulágata be Yaubada ina kaba kasala yoina goi ikatótula, moe nakae aba kasala yoina be nakae kaga liliuna sikaaiyaka aba kasalayana yatana yoidi goi ikatótula.

²¹ Aiyuwoina avatau neta nimana ikatulágata be Vada Kimaasabaina yoina goi ikatótula, moe nakae Vada yoina be nakae ana Tokaiyaka yoina goi ikatótula.

²² Nakae avatau neta nimana ikatulágata be yábana yoina goi ikatótula, moe nakae Yaubada kebana esaaesaina yoina be nakae ana Totulaga yoina goi ikatótula.

²³ Komi ana tovatulukwanayao be Parisi, Atukedayana bogina komatakavaatedoko. Nakae imi vininabeso pai, minta be dira be nakae kumina bogina Yaubada koviinibeso go, moe guinuwa giyaiina. Go guinuwa gagaidi Yaubada ina Katukedayana goi bogina kokalavedi. Guinuwa gagaidiyadi moe kivavasa, nuwokapisi be aba numisa. E itoboine guinuwayadi gagaidi be giyaidi madabokina koguinuwedi. Tauna komi todedevimi polapola! Oo komi Parisi ami toovalugo ae?

²⁴ Komi tovakeda kebokeboimi. Komi manumánuwo ami bwenata goi kokabi, kokalave go, kotono.

²⁵ Komi Yaubada ina Katukeda ana tovatulukwanayao be Parisi, komi keiga be noko nakae. Toluyedi koonikidi go, sinaedi, báila ivakayaodeidi, bailayana moe matakónana be piki. Tauna komi tokibobwata polapola! Oo komi ami toovalugo ae?

²⁶ Komi Parisi matami kebokeboidi. Mainao keiga be noko sinaedi konikīdi bego toluyedi nakae simavada.

^27-28 Komi Yaubada ina Katukeda ana tovatulukwanayao be Parisi, komi valiwoga ana kaba kinana nakae. Tomota sipentedi poowoudi bei toluyedi adi kaigigita kaausaraidi go, sinaedi tokámasa luludi be nakae kaga kaga baailidi sikayaoda. Komi nakae. Ami kaigigita koroto go, sinaemi moe pola be apipilova sikayaoda. Tauna komi Parisi tokibobwata polapola! Oo komi ami toovalugo ae?

²⁹ Komi Yaubada ina Katukeda ana tovatulukwanayao be Parisi moe tokibobwata polapola! Latuwomi tomota siyapaliyemi bego komi todedevimi, tauna Yaubada ina adi valiwoga adi kaba kinana polapola kowoodugudi. Aiyuwoina tauyadi tokibóbwata adi valiwoga adi kaba kinana kovaapasedi bei tokamasayadi kowowoinedi. Oo komi ami toovalugo ae?

³⁰ Kodigo kami, “Neta kai boi nimatu tubumao idi tuta goi kakaaiyaka, e tubumao geya kasiukoidita bego tokabivalavalayadi kakaumatedi.” Tauna komi tokibobwata polapola! Oo komi ami toovalugo ae?

³¹ Tauna imi guinuwayadi goi toinimi kotalavaitemi bego Yaubada ina tokabivalavalayao adi tokaumatayao moe komi tubumiyao adi , tauna komi nakae.

³² Tuwo moe dedevina. Kaga tubumiyao siikaboge, komi kolukavāve!

³³ Komi moteta nakae! Moitamo siyasiyaimi! Komi manakaemi bei ami liuna asagabugabu goi kosiya? Geya!

³⁴ Ame pasina tauna tokabivalavala be tonanamsa be nakae Yaubada ina Katukeda ana tovatulukwanayao mooitamoidi bei aetunedi siwo yaimi. Maniyedi bei kokaumatedi, maniyedi bei kerose goi kotupatukoidi go, maniyedi imi kaba tugúguna goi bei kodabidi. Ago maniyedi asa tamo tamo goi sikaaiyako bei koyogedegededi.

³⁵ Tauna tokibobwatayao liliudi ikaikaidi adi dau poyapoya ame goi moe komi imi puwoya. Tauna adi katumapu bei kobabane. Amo tokibóbwata Ebeli ina kámasa ima Berekiya natuna Sakaraiya ina kámasa. Sakaraiyayana boi nimatu Vada Kimaasabaina be aba kasala go, nauyayanaidi goi tubumiyao sikaumate.

³⁶ U, moe nakae siguuinuwe go, ame alatuuwokoimi konōve: Moe goyoyadi liliudi adi katumapu komi be nakae toogoyoidi komi nakae bei kobabane.

³⁷ Oiyoi komi da Yerusalema e! Boi Yaubada ina tokabivalavala kokaumatedi, nakae ina lobutu ana tolokoina ietunedi siwo yaimi goi go, komi gurewa goi kokaumatedi. Tuta liliuna latuwogu bego natumiyao alamgogoidi nakae kamkam bovavina natunao panepanena goi ilamgogoidi go, komi kokatae.

³⁸ Konovēgu. Imi vada Yaubada ikalave itugavile bei ana toovalugo.

³⁹ Moe moitamo go, ame alatuuwokoimi konōve: Geya tuwaina bei kogitemneigu ana kadókana kodigo kami, “Tauyana !”’ Same 118:26